MANAWEN CHÓN KRAIST
Álillisfengen le Afalafal lón Ekkewe Leenien Afalafal Ikewe Aramas Ra Eáni Sókkopaten Fós
Chómmóng aramas ra kan pwapwaiti le aúseling ngeni ach afalafal usun Mwúún Kot ika ra rongorong lón pwisin fósun fénúer. Neman ina ewe popun lón Pentikost lón ewe ier 33, Jiowa a akkóta pwe “chon Juta mi niuokusiti . . . seni ekewe fanü meinisin won fanüfan” repwe rongorong ewe kapas allim lón ‘en me kapasen fanüan’ inaamwo ika ra silei fósun Ipru are Krik, ekkewe fós mi terú. (Föf 2:5, 8) Iwe, ikenái lón ekkewe leeni ia aramas ra kan eáni sókkopaten fós ie, ekkewe mwichefel mi eáni mwich lón sókkopaten fós neman ra chék eánifengeni eú leenien afalafal. Iwe nge, ifa usun ekkewe chón afalafal lón ekkena mwichefel ra tongeni álillisfengen le afalafal ngeni aramas meinisin nge pwal túmúnú pwe resap asonga ekkewe chón imw ren ar angang lón ewe leenien afalafal fán chómmóng, lón eú chék atun, are ren ar mwittir liwiniti ewe leeni nge a kerán chék wes?
Fósfengen (SF 15:22): Ekkewe chónemmweni ewe angangen afalafal repwe fósfengen me aotaéchú kókkótun án ewe kapas allim epwe esilefeil. Ika án ekkewe mwichefel mi eáni pwal eú fós territory mi chék kúkkún, neman repwe mochen oupwe likiti ngeniir ekkewe imw mi pachelong lón ar territory. Nge ika ewe leeni a watte me ekkewe aramas ra nónnóm ekis meinisin pún fán chómmóng rese kan tufichin áwesaaló meinisin ar territory, neman repwe tingor pwe oupwe afalafal ngeni ekkewe aramas nge oupwe esile ngeniir ika a wor chón pwapwa le aúseling. (od-E 93 ¶37) Are repwe tingorei ámi we mwichefel le álisiir le kútta chókkewe mi eáni án ar we mwichefel fós me ngeniir án ekkena aramas address. (km 7/12 5, pwóór) Oupwe chemeni pwe fán ekkóch chón eú imw ra eáni lap seni eú fós. Kókkótun ataween ewe territory epwe fiti met mi fich ren allúkún túmúnún néúnéún pwóróusen emén.
Álillisfengen (Ef 4:16): Fitipachei meinisin minne ewe chónemmweni ewe angangen afalafal a erá. Ka néúni emén chón káé nge pwúkún an fós esap ina met óm we mwichefel a eáni? Neman ewe chón káé epwe kon feffeitá ika kopwe akkóta án ewe mwichefel are kúmi mi kkan me eáni an fós epwe káé ngeni.
Ammólnatá (SF 15:28; 16:1): Ika ka chuuri emén chón imw lón óm territory nge mi eáni pwal eú fós, féri úkúkún óm tufich le afalafala ngeni ewe kapas allim. Ka tongeni ammólnatá ren óm ekieki menni ekkewe fós aramas ra eáni lón óm we leenien afalafal me download me mwan ekkewe puk ra fen afféú me ekkewe video. Ka pwal tongeni néúnéú ewe JW Language app le káé le kapong lón ekkóch fós.