An Aramas Akkawora Monien Asor Tori Ar Osupwangelo

“KOPWE tongeni era pwe ngang emon chon tingor moni, nge sap minne upwe osukosuk ren. Ngang mi tingor moni fan iten Jises.” Ina alon emon nouwiis lon pekin Pirostan, nge a menlapei ewe osukosuk mi weneiti kaworen monien alillis fan iten lamalam. A ussun ita nge epwe tongeni sopwosopwolo angangen ekkewe lamalam watte ren chok ar akkangei watte monien alillis. Epwe kamotiu liwinin chon angang, a pwal lamot an epwe kau imwen fel me epwe kawor moon alimelim me met kana fan asengesir, iwe, epwe pwal katowu monien ar angangen afalafal. Ifa ussun repwe kunakun ena moni mi lamot ngeniir?

Ren chommong lamalam, ra kan akkangei monien alillis seni ewe mettoch asorun eu le engol.a Ewe sou afalafal Norman Robertson a apasa pwe “Ewe asorun eu le engol, iei an Kot kokkot fan iten an epwe kawor monien an we Muu won fonufan. Iei an we kokkot fan iten pekin moni, nge epwe atufichi ewe Poraus Allim an epwe afalafalfeil.” Sap minne a sau ren an achchema ngeni noun kewe chon kaeo ussun wiiser we, wiisen ar repwe akkasor, pun iei alon mi ffatoch: ‘Sap minne aramas repwe awora ewe asorun eu le engol pokiten ir mi tufichin awora. Nge ina eu fofforun alleasochis. Ika aramas resap awora ewe asorun eu le engol, iwe, repwe tipis ngeni an Kot kewe alluk. Epwe ussun ita nge repwe tipisin sola.’​—Tithing​—God’s Financial Plan.

Neman ka tipeeu pwe ewe mettoch asor epwe kapachelong lon an chon Kraist fel ngeni Kot. Iwe nge, en mi ita kuna pwe an ekkan lamalam tittingor moni a kan aosukosuka aramas, are pwal mwo nge asonger? Ewe sou aak lon pekin lamalam seni Brazil itan Inácio Striederf a tipi ngeni ekkan lamalam pwe ra forata ewe kkotun asorun eu le engol fan iten ar repwe “pwakini ar kewe fitikoko,” iwe, a apasa pwe ena esin kkot “mi atai alluk, mi kirikiringau, me ese fichiiti chon angang ngeni Kot.” Ina minne, a kuna pwe “ekkan aramas esor ar angang, ekkan fefin mi ma seniir puluwer, ekkan aramas mi nonnom lon telinimw mi torotorongau me limengau, me ekkan aramas mi miritingau ra meefi pwe Kot a fen likitiirelo me wiiser ar repwe chuen chok ukkuwei ar asor ngeni ‘ekkan sou afalafal,’ nge pwisin ar kewe famili ra osupwang ren mongo.”

Eli kopwe ekieki ei mettoch: ‘Mi wesewesen pwung me ren Paipel an ekkan lamalam achimwa aramas ar repwe akkawora ewe asorun eu le engol? Are ekkoch lamalam ra ita aea porausen an Kot apwungu chon tipis pwe repwe aniuokkusu aramas fan iten ar repwe angemwaalli moni seniir? Achiou pwe ekiekin Kot ach sipwe akkawora asor tori ach sipwe osupwangelo, ussun ekkoch repwe ita apasa?’

[Footnotes]