Kapas Eis Seni Ekkewe Chon Allea

Met popun ewe Paipel a apasa pwe emon epwe puchor ika emon a sotun achomanauan?

Emon ese pwisin meefi ewe niuokkus me feiengau seni an emon achomanauan ese tongeni unusen weweiti ifa ussun ena sokkun foffor a tongeni ataielo manauan. Ena mettoch a fokkun aniuokkusu ewe mi feiengau me a tongeni aosukosuka i lon unusen manauan.a Emon fopwul chon Kraist a piin kuna achomanau fite ier me loom a apasa: “Esor och kapas a tongeni awewei ai niuokkus lon ena pwinin are ewe riaffou ua fen sotun awesi seni ena atun.” Sia weweiti ewe popun chommong rese pwal mochen ekiek ussun ei poraus. Nge, ewe tufich pwe emon a tongeni achomanauach, eu mettoch sipwe ekieki lon ei fonufan mi ingau.

Ewe Paipel ese tukumalo ekkoch porausen loom ussun achomanau are ussun sotuni le achomanau. (Keneses 19:​4-​11; 34:​1-7; 2 Samuel 13:​1-​14) Nge a pwal awora emmwen ussun met emon epwe fori lupwen emon epwe sotun achomanauan. Iei met ewe Alluk a apasa ussun ena mettoch a mak lon Tuteronomi 22:23-​27. A mak ruu porausan lon. Lon ewe aewin poraus, emon mwan a chuuri emon fopwul iwe a achomanauan. Nge, ewe fopwul ese puchor pwe aramas repwe alisi. Ina popun, a affat pwe a tipis ‘pun ese kori eman epwe alisi, nge a fen nom lon eu tilinimw.’ Ika a fen puchor, eli aramas repwe fen rongorong me repwe selani i. Lon ewe oruan poraus, emon mwan a chuuri emon fopwul lein petewel, iwe a ‘achomanauan o a kon ren.’ A ffat pwe ewe fopwul a u ngeni pun a “kokko pwe eman epwe alisi, nge esap wor eman a tongeni alisi.” A ffat pwe ei fopwul ese wesewesen tipeeu ngeni fofforun ewe chon achomanau ussun chok ewe fopwul lon ewe aewin poraus. A achocho le u ngeni ewe chon achomanau, me a kokko pwe emon epwe alisi nge, a kkuf. An puchor a annetata pwe ese tipeeu ngeni met a fis ngeni; weween ese tipis.

Inaamwo ika ekkewe chon Kraist ikenai rese nonnom fan ewe Allukun Moses, nge ekkewe kapasen alongolongun alluk a mak lon epwe emmweniir. Ekkewe poraus sia koran alleani a affata ewe lamoten ach u ngeni me ach kokko pwe emon epwe alisikich. Sipwe tipatchem ika sipwe puchor an emon epwe alisikich lupwen emon epwe sotun achomanauach. Emon sou silei ifa ussun an aramas repwe pinei atai alluk a apasa: “Ika emon a sotun efeiengaua emon fefin, an puchor ina an pisekin alillis fan iten manauan a murinno seni meinisin.” Pupuchorun emon fefin epwe esile ngeni aramas pwe repwe tongeni alisi, are an puchor epwe tongeni aniuokkusu ewe chon efeiengau pwe epwe ssu. Emon fopwul chon Kraist a aporausa ewe fansoun emon mwan a mochen achomanauan: “Atun ua fokkun puchoreta, iwe a limaramarsefal. Lupwen a liwin sefalitiei, ua puchor me ssu. Fan chommong me loom ua ekieki, ‘Ifa ussun ai pupuchor epwe tongeni alisiei ika emon mwan mi pochokkul a turufiei pwe epwe achomanauei?’ Nge ua kuna pwe ai pupuchor a fokkun murinno!”

Pwal mwo nge lupwen emon fefin a kkuf ika emon a achomanauan, an u ngeni ren an kokko an emon epwe alisi esap lamot mwaal. A ffat pwe a fen fori ukuukun an tufich ren an epwe u ngeni ewe chon efeiengau. (Tuteronomi 22:26) Inaamwo ika emon a achomanauan we nge, mwelien letipan mei limelimoch, pwal uoch, me a lukuluk pwe a limelimoch mwen mesen Kot. Eli ewe mettoch mi anniokkus a fis ngeni epwe aweiresi letipan, nge ren an silei pwe a fori ukuukun an tufich le u ngeni ei feiengau epwe alisata an pochokkulsefalilo ekis me ekis.

Ekkewe fin Kraist mi likiitu fan riaffou pokiten emon a achomanauer repwe tongeni lukuluk pwe Jiowa a wesewesen weweiti ar riaffou. Ar etiwa ewe tong me alillis seni chiener kewe lon ewe mwichefel epwe pwal alisata ar likiitu fan ar riaffou. (Hiop 29:12; 1 Tesalonika 5:​14) Pwal och, achochoon ekkewe mi feiengau pwe repwe eani ekiek won mettoch mi murinno epwe alisiir le kuna “an Kot we kinamwe, ewe mi somelo seni ach ekiek meinisin.”​—Filipai 4:​6-9.

[Footnotes]