Kapas Eis Seni Ekkewe Chon Allea

Pwata Aisea 30:21 a era pwe kapasen Jiowa a ussun ita nge feito seni “lukun sokurumi,” nge ewe wokisin me mwan a apasa pwe Jiowa a nonnom mwen meser ren an apasa, “mesemi repwe kuna”?

Aisea 30:​20, 21 a apasa: “Ami Soukait esap chuen op senikemi, pwe mesemi repwe kuna. Iwe, lupwen oua kul ngeni peliifich ika peliimong, selingemi repwe rongorong me lukun sokumumi, ‘Iei ewe al oupwe aleni.’ ”

Ika ewe chon allea epwe chok alleani masouen ekkewe wokisin, epwe kuna Jiowa, ewe Soukait, mwen mesan, nge epwe rongorong leuwan seni lesokurun. Iwe nge, ina eu kapas monomon, iwe, epwe ina ussun sipwe weweiti ena poraus.

2Ewe kapas monomon lon wokisin 20 a achema ngenikich ussun emon chon angang mi angang ngeni noun we masta, iwe, epwe mmolneta fansoun meinisin pwe epwe apwonueta alon noun we masta. Ussun chok emon chon angang epwe nennengeni mwokutukutun poun noun we masta pwe epwe silei letipan, epwe pwal ina ussun noun Jiowa kkewe aramas ikenai ra nennengeniochu aitien Jiowa a ngenikich ekis me ekis me ren an we mwicheich won ei fonufan. (Kol Fel 123:​1, 2) Ewer, ra mwokutukut me ren an emmwen, ese lifilifil minne Jiowa a aiti ngenir me ren “ewe chon angang mi tuppwol me tipatchem.”​—Mattu 24:45-​47.

Iwe, met weween ewe kapas noun we chon angang a rongorong seni lesokurun? Epwe pwung ach sipwe weweiti pwe ina alon Kot seni lom lom me ren minne a mak lon an we Kapas, iwe, noun we “chon angang mi tuppwol” a affata weween. (Luk 12:42) Noun Jiowa kkewe chon angang ikenai ra rongorong leuwan ren ar kakkaeofichi ewe Paipel me pwal ren ar akkapwonueta minne ra kaeo lon manauer ren alillisin ekkewe puk mi for ren “ewe chon angang mi tuppwol o tipatchem.” Ren ar eani lukuluk won ekkewe kapasen emmwen mi katou seni ewe Soukait me ar kakkaeo ewe Kapasen Kot mi mak fitepuku ier lom, noun kkewe chon angang ra kuna i mwen meser me rongorong leuwan seni lesokurur, lon kapas monomon.​—Rom 15:4.