“Arap Ngeni Kot, Iwe, Epwe Arap Ngenikemi”
Mwan Me Mwirin Manauan A Unusen Siwil
MWA met ren ngauen me lamotongauen manauen Matsepang! I emon kukkun nengnginin Lesotho, eu fonu lukanapen South Africa. Matsepang a maarita ussun emon Katolik. Nge ese fen kuna alillis ren an epwe arap ngeni Kot pokiten ekkewe nienkatek ra kirikiringau me ra michi i pwe epwe fori lisowu mwaal ren fitu ier.
Mwiriloon, Matsepang a lichipung ren lamalam meinisin me ese tongeni luku won emon Chon Forata mi tong mi wesewesen tongei ekkewe aramas a fen forir. Pokiten nafangauen tumun me an aramas kirikiringau ngeni, a mmen watte an Matsepang feiengau lon pekin memmeef me a meefi pwe i a unusen lamotongau. Lupwen a maarita a fokkun mwanesol me sikesik. Lapalapan a emmwen ngeni an atai alluk.
Lo, lo, lo, Matsepang a fiti eu gangin sola seni ekkewe aramas mi wawa ekkewe kusa. A ares me mwirin an kapwung a kalapus lon South Africa. Mwirin, a deport ngeni wesetan fonuan, Lesotho, me ikena ie a chok sopweilo an atai alluk, unnupuch, foffor mi akachofesa, me lisowu mwaal.
Lon eu fansoun Matsepang a fokkun letipechou, iwe a tingormau fan iten an Kot alillis. A pwonei pwe, “Kot, ika ua manau, upwe angang ngonuk ren ukuukun ai tufich.”
Ekisilo chok, ruuemon misineri Chon Pwarata Jiowa ra chuuri Matsepang. Ra awewe ngeni ach kokkotun kaeo Paipel ngeni aramas. Seni an kaeo, a miritiiti pwe Kot a wesewesen afanni meefien aramas me a tongeer. Ren enletin, a miritiiti pwe Setan, ewe “semen kapas chofona,” a aea an tipatchem sola le efisata lon letipen ekkoch aramas ewe memmeef pwe ra lamot mwaal me efisata ar luku pwe Jiowa ese tongeni tongeer.—Jon 8:44; Efisus 6:11.
Nge, a ifa me watteen ewe auruur Matsepang a meefi lupwen a kaeo pwe sipwe tongeni uoch ika sipwe aier seni ach kewe tipis, omusomus ngeni Kot, me achocho le apwapwai letipan. A kuna alillis le weweiti pwe “Kot mi lapalap seni letipach” me an Kot ekiek ussuch a fokkun sokko seni ach ekiek ussun pwisin kich.—1 Jon 3:19, 20.
Matsepang a pwapwa le alleani kapasen ewe soumak kol mi fel Tafit: “Ewe SAMOL a chok arap ngeni chon letipeta, a pwal amanaua ekkewe mi ta lon ngunur.” (Kol Fel 34:18) Pokiten i emon me lein ekkewe “mi ta lon ngunur,” a miritiiti pwe Jiowa ese likitalo noun kewe chon angang, inaamwo ika ekkoch me leir ra letipechou are ra meefi pwe esor lamoter. A apwapwai letipan lupwen a kaeo pwe Kot a tongei noun kewe siip meinisin me a alisiir lon fansoun weires. (Kol Fel 55:22; 1 Piter 5:6, 7) Ekkeei kapas a fokkun achungu letipan: “Arap ngeni Kot, iwe, epwe arap ngenikemi.”—Jemes 4:8.
Lo, lo, lo, manamanen an Kot we Kapas, ewe Paipel, a pwapwalo lon manauen Matsepang. A poputa le fiffiti an chon Kraist kewe mwich me a likitalo fofforun kewe rese tipeeu ngeni Paipel. Iwe met mwiriloon? Ese chuen meefi pwe ese fich ngeni an Kot tong me chen. Seni an wiliiti emon Chon Pwarata Jiowa lupwen a papatais, a fen esilefeili ewe kapas allim ussun ewe Muu ren fite ngerou awa. Inaamwo ika a feiengau watte lon pekin memmeef me loom nge, iei Matsepang a pwapwa me menemenoch. Mwa met ren manamanen ewe Paipel a pwalo ren an amurinnolo manauen aramas!—Ipru 4:12.
[Blurb on page 31]
“Kot, ika ua manau, upwe angang ngonuk ren ukuukun ai tufich”
[Box on Page 31]
Kapasen Alongolongun Alluk Seni Paipel Mi Alillisoch
Ekkewe kapasen alongolongun alluk a fen aururu chokkewe mi feiengau seni an aramas kirikiringau ngeniir ra mak mwirin:
“Lupwen letipei a aureki chommong mettoch, om [an Kot] kewe kapasen achipa ra apwapwai nguni.” (Kol Fel 94:19) An Jiowa kewe “kapasen achipa” lon an we Kapas ra fokkun aururukich. Ach chechchemeniir lupwen sia ekkekieki ekkewe poraus mi lamot me atun sia iotek, epwe alisikich le awesi ekkewe mettoch sia aureki me amaarata ach lukuluk pwe Kot Chiechiach a fen weweitikich.
“[Jiowa] a apochokkulata ir ekkewe mi letipeta, o a finiti ar kewe kinas.” (Kol Fel 147:3) Ika sia kilisou ngeni Kot pokiten an umoumoch me met a awora ren an epwe pwoluelo ach kewe tipis ren an Jises asorun moon kepich, sipwe tongeni arap ngeni Kot fan lukuluk iwe letipach esap chuen apwungukich. Ei mettoch epwe tongeni awora auruur mi fokkun watte me pwal akinamwelo ekiekich.
“Esor emon epwe tongeni feito rei [Jises Kraist], ika ewe Sam mi tinieito esap emmwenato i. Nge ngang upwe auta i lon ewe sopolon ran.” (Jon 6:44) Ren an ngun mi fel me ren ewe angangen afalafala ewe Muu, Jiowa a pwisin emmwenikichelo ngeni Noun we me a ngenikich ewe apilukulukun manau esemuch.