‘Ami Oupwe Iotek Iei Ussun’

EN MI silei ekkewe kapas lon ewe Iotekin Ach Samol? Ina eu iotek Jises a awewei fan iten an aramas repwe appiru. Iei alon Jises lon an we afalafal mi itefoulo, ewe mi iteni Afalafal won ewe Chuuk: “Iwe, ami oupwe iotek iei ussun.” (Mattu 6:​9, New World Translation) Pokiten ena iotek a popu seni Jises, fan chommong aramas ra eita ngeni Iotekin Ach Samol, nge a pwal iteni Semach.​—Kapasen Latin, Paternoster.

Chommong, chommong aramas won unusen fonufan ra amwochulukun ewe Iotekin Ach Samol, iwe, fan chommong ra eani ena iotek, nge eli iteiten ran meinisin. Lon ekkewe ier kanoto chok, chommong ra eani ena iotek lon sukul me lupwen chommong aramas ra mumufengen. Pwata aramas ra fokkun aucheani ewe Iotekin Ach Samol?

Lon an we katekis, ewe lamalamen Katolik a apasa pwe ewe iotek itan Semach, ina “longolongun an chon Kraist iotek.” Iwe nge, sipwe affata pwe chommong mi eani ewe Iotekin Ach Samol rese unusen weweiti ena iotek. Iei alon ewe simpung lon Canada itan Ottawa Citizen: “Ika en mi silei ussun ewe lamalamen Kraist, neman ka tongeni muttir apasawu ewe Iotekin Ach Samol, nge eli epwe weires om kopwe ammanga om apasawu eu me eu kapasan me weweiti ekkena kapas.”

A ita wesewesen lamot ach sipwe weweiti ach kewe iotek ngeni Kot? Met popun Jises a awora ngenikich ewe Iotekin Ach Samol? Met lamoten ena iotek ngonuk? Iei sipwe pi poluen ekkena kapas eis.