Kuna Feioch Ren Om Kukkutta Minne Mi Lamot Lon Pekin Ngun
“Eman mi efich moni esap menemenoch ren an moni tolong, nge eman mi efich wou esap pwal menei mine a tori.”—An Salomon Afalafal 5:10.
ANGANG mi kon chou a tongeni emmwen ngeni aurek wachemuk, me aurek wachemuk a emmwen ngeni semmwen, pwal mwo nge malo. Lon chommong fonu, ekkewe famili ra tatakkiselo pokiten mufesen. Fan chommong, ekkena sokkun osukosuk ra fisita pokiten an aramas chei pisek. Emon mi mochenia pisek ese tongeni pwapwaiti minne a nom ren, nge a chok kukkutta mettoch mi fo, inaamwo ika manauan a tongeni feiengau seni an fori. Eu puk fan iten kalisitaan aramas a apasa: “A ussun ita pwe aramas meinisin lon fonuach ra achocho le mooni minne a nom ren chon orur fan iten ar repwe taitap, inaamwo ika chon orur we a kon akkangang me epwele heart attack lupwen ese mwo chinnap.”
Kukkuttaen pisek a tongeni nemenikich me angei senikich unusen ach chengel. A mmen pochokkul manamanen advertise me ra aumwesi ach apwangapwang ren mochenian pisek. Lon Merika, TV a ur ren porausen esilesil mi pesei aramas le mooni pisek esor lamotan ngeniir lupwen ese naf nour moni. Feiengau wachemuk a tongeni fisita.
Neman sisap muttir meefi feiengauan, nge tumunungau le nemeni ach kewe mochen a tongeni efeiengaua ekiekich ussun pwung me mwaal me ach pochokkul lon pekin aion. Ren chok awewe, ewe king mi tipatchem, Solomon, a apasa: “Eu letip mi kinamwe a awora pochokulen inis.” (An Salomon Fos 14:30) Nge pochokkulen inis me pwapwa a tongeni pout senikich pokiten ewe angang weires, aurek, me osukosuk a pop seni ach chechchei wou me pisek. Chiechioch me aramas a pwal apwangapwangelo lupwen kuttaen pisek a nampa eu lon manauach. Iwe, lupwen a wor osukosuk lon ewe famili me lefilach me aramas, a pwal kukkunutiu ewe pwapwa lon unusen manauach.
Ochchun Ach Akkomwa Ekkewe Mettochun Ngun
Fite puku ier loom, Paul a apasa: “Ousap appiru pwomwen fonufan.” (Rom 12:2) Ewe fonufan a tongei chokkewe ra lapalapeni lapalapan. (Jon 15:19) Ewe fonufan a nikinikin och ngeni mesach me selingach. Ewe fonufan a peseikich le chei pisek me a menlapei “mochenia-ingauen mesach” pwe en me ekkewe ekkoch oupwe akkomwa kuttaen pisek lon manauemi.—1 Jon 2:15-17.
Nge mei wor minne mi auchea lap seni moni, foummong, me wou. Loom, loom, King Solomon a angei chommongun pisek mi kawor seni fonufan. A aueta ekkewe imw me a fori malamal me tanipiin ira mei wor uwar. A wor chommong noun chon angang, maan, sou kol mwan me fefin, pwal chommong kolt me silifer. Solomon a alapalo woun lap seni aramas meinisin. Woun Solomon a lu seni wouoch chok. A nom ren Solomon mettoch meinisin a mochen. Iwe nge, lupwen a nengeni an pisek, woun, me an kewe foffor meinisin, ‘a meefi pwe meinisin a pon, a usun chok turufi asepwal.’—An Salomon Afalafal 2:1-11.
Pokiten watteen ewe tipatchem mi fangolo ngeni, Solomon a silei pwe menemenoch a pop seni an kutta loom ekkewe mettochun ngun. A makkei: “Iwe, oupwe rong ei kapasen lesopolan: Oupwe niueiti Kot o aleasochisi an kewe alluk, pun iei a fichiti aramas meinisin.”—An Salomon Afalafal 12:13.
Woun ewe Paipel a fokkun auchea lap seni kolt me silifer. (An Salomon Fos 16:16) Ekkewe poraus mi enlet lon Paipel ra ussun chok fau mi auchea me ra wikituk. Kopwe kutteer ussun ita kopwe ttuw ewe ppwul ren om kopwe angei ekkena fau auchea? (An Salomon Fos 2:1-6) Ewe Chon Forikich, ewe Popun mettoch mi lamot mi enlet, a peseok le fori me epwe alisuk. Ifa ussun?
Jiowa a awora ekkeei fau mi auchea, ekkewe poraus mi enlet, ren an we Kapas, me an we mwicheich. (Kol Fel 1:1-3; Aisea 48:17, 18; Mattu 24:45-47; 1 Korint 2:10) Om atittina ekkeei fau mi fokkun auchea epwe alisata om tufichin filata ewe sokkun manau mi feioch lap seni meinisin. Jiowa, ewe Chon Forikich, a silei met a lamot ngenikich pwe sipwe wesewesen pwapwa.
Ewe Paipel A Alisata Minne Mi Auchea Lap Seni Meinisin
Ewe fon mi murinno a kawor lon ewe Paipel, a tongeni alisikich me a murinno seni meinisin. Esor eu kkotun alluk ussun pwung me mwaal a murinno seni minne a kawor lon ewe Paipel. Ewe fon lon Paipel a efeiochukich fansoun meinisin. Ewe fon lon mi chuen auchea mwirin fite, fite ier. Ekkoch fon lon Paipel a peseikich ngeni wenechar me tinikken lon angang, pwe sipwe nounouochu moni me sisap tinikkop.—An Salomon Fos 6:6-8; 20:23; 31:16.
A ussun chok alon Jises: “Ousap iseni pisekimi won fonufan, ikewe macholap me paarang ra ani me ie, o chon sola ra atai o solani me ie. Nge oupwe iseni pisekimi lon lang, ikewe macholap me paarang resap ani me ie, o chon sola resap atai are solani.”—Mattu 6:19, 20.
Aucheaan ena fon ikenai a ussun chok aucheaan 2,000 ier loom. Amwo chei pisek me wou esap ssareekich, nge sipwe kuna feioch iei ren ach manaueni eu sokkun manau mi murinno seni ena. Manau mi menemenoch me ur ren pwapwa a tufich ika sia ikkisoni wou me pisek lon pekin ngun.
Minne Mi Lamot Lon Pekin Ngun A Wato Feioch
Lupwen sia alamota ekkewe mettochun ngun, iwe, sia feioch lon pekin aion, pekin memmeef, me pekin ngun. Ewe aposel Paul a makkei: “Nge ir mi mochen pisekisekilo repwe turutiu lon sosot, lon ser, lon chommong sokkun mochenia mi umwes o afeieingau, ekkewe sokkun mochenia mi akokatiu aramas lon feiengau o kiteter. Pun mochenia moni, iei ewe popun ingau meinisin. Pokiten ei sokkun mochenia, ekkoch aramas ra feilseni ewe luku, o ra tu ngeni letiper chommong sokkun lolilen.”—1 Timoti 6:9, 10.
Tongen wou me pisek a kan etipetipa aramas ar repwe alapalo wour me pisekir, ar foummong, me ar manaman, nge fan chommong ra chei ekkeei mettoch fan sola. An emon chechchei pisek a tongeni solani an we fansoun, pochokkul, me tufich. A tongeni atai an onnut fan kinamwe. (An Salomon Afalafal 5:12) Iwe nge, pochokkul lon pekin ngun a ameef ngeni i pwe aramas ra tongei, pwe a wor lamoten manauan, me a atufichi an fel ngeni ewe Kot mi tong, Jiowa.
Arapakan chok an aramas mochen wouoch epwe unusen pwonueta lon an Kot we fonufan sefo. (Kol Fel 145:16) Lon ena fansoun unusen fonufan epwe ‘urelo ren ewe sile seni Jiowa.’ (Aisea 11:9, New World Translation) An aramas aucheaani mettochun ngun epwe lapalapelo. Tongen pisek me an kewe feiengau repwe unusen morolo. (2 Piter 3:13) Lon ena fansoun ekkewe mettoch mi awora aucheaan manauach, ussun chok chowean pochokkulen inis, angang mi apwapwai kich, asoso mi murinno, tongfengen lon ewe famili, me chiechioch ren Kot, repwe wato pwapwa wachemuk mi nomofoch.
[Lios lon pekin taropwe 4]
Ewe fonufan a mochen pwe kopwe akkomwa pisek
[Lios lon pekin taropwe 5]
Ewe wou lon Paipel mi auchea lap seni kolt me silifer