Ewe Mettoch Angang Iei Eu Feioch are Eu Anumamau?
“Ren emon mwan esor och mettoch mi murinno seni an epwe . . . kuna pwapwa pokiten an angang weires.”—An Salomon Afalafal 2:24, NW.
“UNUSEN molulu le muchun ranin angang.” A ina ussun meefien eu na aulungatin chon angang me ren eu minen kuttaen an aramas memmeef. Esap ina eu poraus mi amairu pun aramas ra kuna watte osukosuk lon ar leenien angang, iwe, a pwal ttamalo fansoun ar ra angang, me a wattelo ewe angang ra uwei ngeni imwer, nge nour kewe pos rese lien apasa ar kilisou ngeniir.
Akkaean ekkan mwesin fan iten forun pisek a ameef ngeni chommong chon angang pwe ese lien auchea ar kewe angang lon ekkan watteen sopai. Fan chommong a pinepin ar ekiekieta me forata minefoon pisekin are kokkotun angang. Iwe, ena mettoch a angaua an aramas ekiek ussun ar angang. A kan mecheresin kukkunulo ar efich ar angang. Eli epwe mecheres an epwe kukkunulo ar ekiekiochu ar angang. Eli epwe morolo ar tipeni pwe repwe angangoch lon ar angang. Ekkena mettoch repwe tongeni efisata an aramas mangaueiti ar angang, iwe, lo, lo repwe wesewesen oputalo.
Atittina Ach Ekiek
Pwungun pwe esap tufich ach sipwe siwili nonnomuch fansoun meinisin. Iwe nge, kese tipeeu pwe sia tongeni siwili ach ekiek? Ika ka kuna pwe ka fen ekis piitelo ren an aramas ekiek mi mwaal ussun angang, epwe och om kopwe mwo nengeni ekiekin Kot me an kewe kapasen alongolongun alluk fan iten ena mettoch. (An Salomon Afalafal 5:18) Chommong ra kuna pwe ar kaeo ekkena mettoch a atoto ngeniir pwapwa lon ar angang.
Kot ewe Nampa Eu Chon Angang. Kot emon mi achocho le angang. Eli ese ina ussun ach ekiek ussun i, nge a ina ussun an Kot akkomen fos ussun pwisin i lon Paipel. Ewe poraus lon puken Keneses a poputa ren an Jiowa forata lang me fonufan. (Keneses 1:1) Ekieki mwo ekkewe sokkopaten angang Kot a eani lupwen a keran poputa le forata mettoch meinisin, weween, i emon sou alapalap, sou akkot, sou ak, sou chunga, sou silelap pisekin angang, sou rau, sou silelap ira me fetil, sou silelap man, sou silelap fos, me met kkan mwo.—An Salomon Fos 8:12, 22-31.
Mei fet an Kot angang? Ewe Paipel a apasa pwe a “och” me a “fokun och.” (Keneses 1:4, 31) A fokkun pwung pwe ekkewe mettoch mi foruta ra “aporausa usun lingen Kot,” iwe, kich sipwe pwal mwareiti i!—Kol Fel 19:1; 148:1.
Iwe nge, an Kot angang ese ukutiu mwirin an we forata lang me fonufan me ewe akkaewin pean aramas. Iei alon Noun Jiowa we, Jises Kraist: “Semei a chok angang tori ikenai.” (Jon 5:17) Ewer, Jiowa a chuen akkangangolo ren an akkawora minne forian kewe repwe manau ren, me an foffori minne forian kewe repwe sopwosopwolo ren, me pwal ren an akkamanaua ir kewe mi tuppwol le fel ngeni i. (Nehemaia 9:6; Kol Fel 36:6; 145:15, 16) A pwal mwo nge nonnounou aramas, weween, “chienen Kot kewe chon angang,” pwe repwe awora alillis le apwonueta ekkoch sokkun angang.—1 Korint 3:9.
Epwe tufich pwe angang epwe eu feioch. Esap pwe Paipel a apasa nge angang eu anumamau? Me ren Keneses 3:17-19, a ussun ita Kot a apwungu Atam me If pokiten ar fofforun u ngeni i ren an isetiu woor angang mi weires. Iei alon Kot ngeni Atam lupwen a apwungu ekkena popun aramas: “Kopwe mongo anom fan molonom tori om kopwe wiliti pwul ka for seni.” Ita ina och kapas mi affata pwe mi ngau sokkun angang meinisin?
Aapw. Nge, pokiten Atam me If rese tuppwol, choufetalin ewe Paratis itan Ichen esap fis lon ena atun. Kot a anumamaua ewe ppwul. Aramas repwe angang weires fan iten ar repwe angei tufichin manauer seni ewe ppwul.—Rom 8:20, 21.
Ewe Paipel ese apasa pwe ewe mettoch angang eu anumamau, nge a affata pwe ina eu feioch aramas repwe aucheani. Ussun an a mak me asan, Kot emon mi achocho le angang. Pokiten an foratiu aramas lon lapalapan, Jiowa a ngeniir tufichir me nemenier fan iten ar repwe wiisen tumunu forian kewe won fonufan. (Keneses 1:26, 28; 2:15) Kot a awiisa ngeniir ena angang mwen an apasawu minne a mak lon Keneses 3:19. Ika pwe ewe mettoch angang eu anumamau me eu mettoch mi ngau, sap minne Jiowa epwe pesei aramas ar repwe angang. A mmen watte ewe angang Noah me an we famili ra fori mwen me pwal mwirin ewe Noter. Lon ewe fansoun an a poputa ewe lamalamen Kraist, a wor kapasen pesepes ngeni noun Jises kewe chon kaeo pwe repwe achocho le angang.—1 Tesalonika 4:11.
Nge sia silei pwe lon ei fansoun, ach angang epwe tongeni chounikich. Ikkeei ekkoch mettoch mi ussun chok “irafolufol me potowolingau” lon ach leenien angang: osukosuk, mettoch mi efeiengau, tipitipingau, lichipung, ewe ngunun emiisfengen, foffor mi otuputup, me foffor ese pwung. Nge sap minne ewe mettoch angang eu anumamau. Lon An Salomon Afalafal 3:13, ewe Paipel a apasa pwe angang me uwaan kewe eu liffang seni Kot.—Pi ena refiref itan “Ifa Ussun Sipwe Tongeni Likiitu fan Osukosuken lon Ach Leenien Angang.”
En mi tongeni alinga Kot ren om angang. Fansoun meinisin aramas ra kan mwareiti ir kewe mi angoch me lipwakoch lon ar angang. Ewe mettoch lipwakoch, iei eu longolong fan iten ach sipwe eani ekiekin Paipel ussun angang. Kot a mmen lipwakoch lon an kewe angang. A ngenikich chommong sokkun silelap me tufich, iwe, a mochen ach sipwe aea tufichich kewe fan iten angang mi murinno. Ren chok awewe, lupwen a kau ewe imwen fel mangaku lon Israel lom lom, Jiowa a awora ngeni aramas, awewe chok ren Pesalel me Oholiap, mirit, tipachchem, me silelap pwe repwe tufichin apwonueta en me wiisan fan iten forun pisek mi aling me angang mi fokkun lamot. (Ekistos 31:1-11) Ena mettoch a affata pwe a sokkolo watteen an Kot ekilapei alongolongun, silelapen, me alapalapen ar angang, me ekkewe pwal fitu mettoch mi kapachelong lon.
A mmen watte an ena poraus kku ach ekiek ussun pwisin tufichich kewe me lapalapen ach foffori ach angang. A alisikich ach sipwe weweiti pwe ir liffang seni Kot, iwe, sisap ekieki pwe rese lien lamot. Ina minne, a wor ei fon ngeni chon Kraist pwe lupwen repwe fori ar angang, epwe ussun ita Kot a chosani ar angang: “Nge minne oupwe fori, oupwe achocho ngeni, seni lon letipemi, usun chok fan asengesin ach Samol, nge esap fan asengesin aramas.” (Kolose 3:23) Mi alluk ngeni noun Kot kewe chon angang pwe repwe tinikken lon ar angang, iwe, epwe ina ussun an epwe lapalo lingen an chon Kraist poraus ngeni chiener kewe chon angang me io kkan mwo.—Pi ena refiref “Ach Akkapwonueta An Paipel kewe Kapasen Alongolongun Alluk lon Ach Leenien Angang.”
Pokiten ach weweiti ena mettoch, epwe murinno ach sipwe eisini pwisin kich ika mei fet lapalapen ach angang, weween, ika sia lipwakoch me tinikken lon. Kot epwe ita pwapwa ren ach angang? Sia ita wesewesen efich lapalapen ach foffori ach kewe angang? Ika esap ina ussun, iwe, a wor popun ach sipwe amurinnolo ach angang.—An Salomon Fos 10:4; 22:29.
Sipwe itepok me ruuepek fan iten angang me mettochun ngun. Inaamwo ika a murinno tinikken lon angang, nge a wor pwal eu mettoch mi lamot fan iten ach sipwe kuna pwapwa lon ach angang me manauach. Iei ewe mettoch kaeo ussun Kot. Iei kunaen King Solomon, ewe mi tinikken le angang, iwe, a pwal nom ren sokkun wouun fonufan meinisin me sokkun minen apwapwa meinisin: “Niuokkusiti ewe Kot mi enlet me alleasochisi an kewe alluk. Popun, pun ina unusen wiisen aramas.”—An Salomon Afalafal 12:13, NW.
A ffat pwe sipwe afanni letipen Kot lon mettoch meinisin sipwe fori. Ach kewe foffor ra ita tipeeu ngeni letipan, are ra u ngeni? Sia ita akkachocho le apwapwai Kot, are sia chok ekiekin apwapwai pwisin kich? Ika sise foffori letipen Kot, iwe, lo, lo sipwap kuna riaffoun ewe sokkun manau mi lamot mwaal me poon.
Steven Berglas a apasa pwe epwe och ika ekkan meilapen sopai mi tori akkamuchun tufichir repwe ‘kut och mettoch mi auchea ra wenewenen tipeni, iwe, repwe pacheelong lon manauer.’ Esor eu mettoch mi auchea seni ach angang ngeni ewe Emon mi liffang ngenikich ekkewe sokkun silelap me tufich fan iten ach foffori angang mi auchea. Ach foffori ekkewe sokkun angang mi apwapwai ewe Chon Forikich esap ameef ngenikich pwe mi poon manauach. Ekiekin Jises pwe ewe angang Jiowa a awiisa ngeni a murinno, lamot, me auchea ussun chok mongo. (Jon 4:34; 5:36) Pwal chechchemeni mwo pwe Kot, ewe Chon Angang mi Lapalap seni meinisin, a etiwakich pwe sipwe wiliiti “chienan kewe chon angang.”—1 Korint 3:9.
Ach fel ngeni Kot me ach mammaarita lon pekin ngun a kan akkammonlakich fan iten angang me wiis mi auchea. Pokiten fan chommong ach leenien angang eu leenien osukosuk, fitikoko, me mettoch mi aweiresikich, ach lukuluk mi pochokkul me ach akkomwa mettochun ngun epwe tongeni apochokkulakich fansoun ach sipwe achocho ngeni ach amurinnolokich lon wiisach we, wiisen chon angang are pos. Nge enletin nonnomun aramas lon ei otot mi towau seni Kot epwe tongeni anneneloi mesach pwe sipwe kuna tefen lon manauach epwe lamot an epwe mammaarita ach luku.—1 Korint 16:13, 14.
Ewe Fansoun Lupwen Angang Epwe eu Feioch
Chokewe mi angang weires iei fan iten Kot ra tongeni nennelo ngeni ewe fansoun lupwen i epwe forsefallieta ewe Paratis, iwe, unusen fonufan epwe ur ren angang mi auchea. Aisea, emon noun Jiowa soufos, a makkei ei oesini ussun manauen aramas lon ena fansoun: “Iwe, repwe aueta imwer o nonom lon, repwe pwal fotuki iran wain o ochei uan. Esap fis pwe repwe aueta imwer, nge eman lukur epwe nom lon. Esap pwal fis pwe repwe fotuki ira, nge eman lukur epwe mongo seni. . . . Nge nei chon fil repwe pwapwaiti feiochun angangen pour fansoun langattam.”—Aisea 65:21-23.
Epwe ifa me watteen feiochun angang lon ena fansoun! Amwo kopwe nom lein noun Jiowa kewe aramas mi feioch me kukkuna fansoun meinisin ‘pwapwa lon om angang weires’ ren om kakkaeo ika ifa letipen Kot ngonuk me om atipeeufengenni manauom me letipan.—An Salomon Afalafal 3:13.
[Lios lon pekin taropwe 8]
Kot ewe Nampa Eu Chon Angang: Keneses 1:1, 4, 31; Jon 5:17
[Lios lon pekin taropwe 8]
Epwe tufich pwe angang epwe eu feioch: Keneses 1:28; 2:15; 1 Tesalonika 4:11
[Lios lon pekin taropwe 8]
En mi tongeni alinga Kot ren om angang: Ekistos 31:1-11; Kolose 3:23
[Lios lon pekin taropwe 8]
Epwe itepok me ruuepek ach angang me ach kakkaeo ussun Kot: An Salomon Afalafal 12:13; 1 Korint 3:9
[Lios lon pekin taropwe 4]
Japan Information Center, Consulate General of Japan in NY
[Lios lon pekin taropwe 5]
Chommong chon angang ra meefi pwe rese lien auchea, weween, ra ussun chok pisekin lon eu mwesin
[Lios lon pekin taropwe 8]
Sasingin fonufan: seni NASA
[Lios lon pekin taropwe 6]
Ifa Ussun Sipwe Tongeni Likiitu Fan Osukosuken Lon Ach Leenien Angang
Ekkewe tokter ra anomu osukosuken lon leenien angang lon tettelin mettoch mi efeiengau. A tongeni efisata semmwenin luk me letipechou, iwe, a pwal mwo nge tongeni amwokutu aramas ar repwe pwisin nniirelo. Chon Sapan ra nounou ei kapas karoshi fan iten ena mettoch, nge a wewe ngeni “malo pokiten angata.”
Lapalap mi sokkopat lon pekin angang epwe tongeni aweiresikich. Ren chok awewe, siwilin ach kulokun are kokkotun angang, fitikoko lefilach me nouch kewe pos, siwilin wiisach are ewe sokkun angang sipwe fori, ach ukutiu seni angang, me ach katowu seni ach angang. Pokiten ar meefi weires, ekkoch ra siwili ar angang are ar leenien angang. Pwal fitemon ra tukumi ar meefi weires, iwe mwirin, ra kuna pwe weiresin letiper a pwalo lon pwal och kinikinin manauer, nge akkaewin lon ar famili. Pokiten an a kon watte letipechoun ekkoch, ra unusen fangeta.
A nom ren chon Kraist chommong sokkun alillis fan iten ar repwe likiitu fan osukosuken lon ar angang. Ewe Paipel a awora chommong kapasen alongolongun alluk mi tongeni alikiitukich lon fansoun weires, iwe, sia tongeni meefi kinamwe lon pekin ngun me pwal lon letipach. Ren chok awewe, iei alon Jises: “Ousap ourek usun ewe ran lesor, pun lesor epwe pusin anafa ourekin lon. Eu me eu ran epwe pusin wor osukosuken lon.” A peseikich ach sipwe nengenifichi osukosuken lon ei ran, nge esap ita osukosuken lesor. Epwe ina ussun ach sipwe tumunukich pwe site kon alapa ach kewe osukosuk, iwe, lapeta ach meefi weires ren.—Mattu 6:25-34.
A fokkun lamot ngeni chon Kraist ar repwe anomu ar lukuluk won an Kot pochokkul, nge esap pwisin ar. Lupwen sia meefi pwe sisap chuen tongeni likiitu, Kot a tongeni akinamweikich me atoto chengel lon letipach, iwe, pwal atipachchemakich pwe sipwe tufichin pwakini sokkun fansoun weires meinisin. Iei makkeien Paul: “Ami oupwe akkangei manaman lon ewe Samol me pwal lon wachemukun an pochokkul.”—Efisus 6:10, NW; Filipai 4:7.
Iwe, fansoun weires a pwal mwo nge tongeni efisata uwa mi murinno. Ekkan sossot ra tongeni amwokutukich pwe sipwe kulliiti Jiowa, iwe, sipwe kutta i me anomu ach lukuluk won. Ra pwal tongeni amwokutukich pwe sipwe sopweelo ach akkamaarata an chon Kraist kewe lapalap mi murinno me ach tufichin likiitu fan osukosuk watte. Iei an Paul fon ngenikich: “Sipwe mwanek lupwen sia kuna riaffou, pun sia silei pwe riaffou epwe efisata likiitu; iwe mwirin, likiitu epwe efisata itoch; iwe mwirin, itoch epwe efisata apilukulukoch.”—Rom 5:3, 4, NW.
Iwe, mettoch letipach a weires ren a pwal mwo nge tongeni wiliiti eu minen amwokut fan iten an aramas mammaarita lon pekin ngun, nge esap eu minen efisata apilukulukungau me letipechou.
[Lios lon pekin taropwe 7]
Ach Akkapwonueta An Paipel Kewe Kapasen Alongolongun Alluk Lon Ach Leenien Angang
Sorosorun me fofforun chon Kraist lon ar leenien angang epwe tongeni amwokutu chiener kewe chon angang are io kkan mwo pwe repwe efich porausen Paipel. Lon noun we taropwe ngeni Taitos, Paul a fonou ir kewe mi ussun ita chon angang pwe “repwe alleasochisi ar kewe samol [pos], o apwapwai ir ren mettoch meinisin; resap tutumwir, resap angei-mwalli och mettoch, nge repwe pwarata unusen ar tuppwel mi enlet, pwe ren mettoch meinisin repwe alinga ewe afalafal usun Kot ach Chon Amanau.”—Taitos 2:9, 10.
Ren chok awewe, nengeni mwo minne emon chon sopai a mak ngeni ofesilapen Chon Pwarata Jiowa: “Popun ai mak pun ua mochen tingor pwe oupwe mut ngeniei ai upwe nouni chon angang Chon Pwarata Jiowa. Ua mochen nouniir pun ua silei pwe ra wenechar, akitekit, me uwonuk, iwe, resap chungau. Ua luku Chon Pwarata Jiowa chok. Ouse mochen oupwe alisiei.”
Kyle emon chon Kraist mi angang lon eu sukul, nge a wiisen angang lon ewe ofes. Lupwen a poputa och fitikoko, emon chienan chon angang a okouna mwen mesen ekkoch chon sukul. Kyle a apasa pwe “Ua achocho ngeni ai usap aitengaua Jiowa.” Lon ekkewe limu ran mwirin, Kyle a ekieki ifa ussun an epwe tongeni apwonueta an Paipel kewe kapasen alongolongun alluk. Eu a mak lon Rom 12:18: “Are mi tufich, ukukun minne oua tongeni, oupwe kinamwefengen me aramas meinisin.” A tinalo echo taropwe ngeni chienan we chon angang ren an nounou computer, iwe, a omusomus ngeni ren ewe fitikoko lefiler. Kyle a tingorei chienan we chon angang pwe repwe fosfengen mwirin ssarin angang fan iten ar repwe awesi ewe fitikoko. Mwirin ar fosfengen, chienen Kyle we chon angang a tipepwotetelo, iwe, a apasa pwe a pwung minne Kyle a fori. Iei alon ngeni Kyle: “Ese mwaal ka ina ussun pokiten om lamalam,” iwe, a foropachei Kyle lupwen an a wes ar kapasfengen. Ifa meefien Kyle mwirin? A apasa pwe “Sisap tongeni mwaallilo ika sipwe apwonueta an Paipel kewe kapasen alongolongun alluk.”