Feffetal Me Kot Lon Ekkeei Fansoun Weires

“Enok a chiechifengen me Kot. Mwirin ese chüen nom, pun Kot a angei.” —KENESES 5:24, NW.

FANSOUN fitikoko watte! Ena poraus a kapas ussun ekkewe fitikooko me föfföörun akkachofesä ra tottori aramas seni poputään nemenemen Mwüün ewe Messaia lon 1914. Seni ena fansoun, aramas ra nonnom lon “ekkewe ränin le sopolon.” Ekkewe riäfföü, awewe chök, lengita, mälapalap, chechchechin fönü, me ekkewe maun ra fokkun eriäfföü aramas. (2 Timoti 3:1; Pwarata 6:1-8) Iwe, a pwal kku manauen chon fel ngeni Jiowa. Fansoun weires a kkükich meinisin. Nafangauen moni, osukosuk lefilen ekkewe mwüün fönüfan, atai allük, me semmwen ra aweiresi manauen aramas.

² Pwal och, chommong lein nöün Jiowa kewe chon angang ra fen likiitu fän chommong riäfföü pokiten an Satan mammaun ngeni “ir mi amwöchu ekkewe allükun Kot, o uwei ewe pwäratä usun Jises.” (Pwäratä 12:17) Iwe, inaamwo ika sap kich meinisin sia kuna riäfföü chapur ussun chowean ares are kawet, nge chon Kraist meinisin repwe fiffiu ngeni Satan ewe Tefil me ewe sokkün ekiek-mwääl a etipetipa aramas ren. (Efisus 2:2; 6:12) A lamot ach sipwe mammasa fansoun meinisin fän iten ach sisap tupulo ren ekkena sokkun ekiek-mwääl, puun sipwe küna lon ekkewe leenien angang, lon sukul, me ekkewe ekkoch leeni ikewe ie sipwe nom lein ir kewe rese fel ngeni Jiowa.

Feffetäl me Kot, nge Sap Ekkewe Mwuu

³ Lon ewe äeewin senturi, ekkewe chon Kraist ra pwal fiffiu ngeni ekiekin fönüfan, iwe, a asokkafeseniir seni choon lukun ewe mwichefelin chon Kraist. Paul a kapas ussun ei mettoch lupwen a makkei: “Iei minne, upwe apasa o pwarata ei afalafal lon ewe Samol, pwe ami ousap chuen manaueni manauen ekkewe Jentail lon pungun ar ekiek mwal. Ra nonnom lon rochopwak, pokiten ar ekiek, manauer mi sokkoseni manauen Kot pokiten ar tipeförea. Ra fen aporoingaualo letiper, o ra fangelo manauer ngeni angolsä, pun ra fakkun mochen föri sokkun limengau meinisin.”​—Efisus 4:17-19.

⁴ Met ren ffatöchun ekkena kapas ussün rochopwaken ei fönüfan lon peekin lükü me föffööringau​—lon fansoun Paul me lon ach ei fansoun! Ussun chök lon ewe äeewin senturi, choon Kraist ikenai rese ‘tipeeu ngeni an aramas ekiek-mwääl.’ Nge, ra pwapwaesini wiiser mi fokkun auchea, ar chiechi ngeni Kot. Pwüngun pwe ekkooch aramas repwe eis ika epwe pwüng ach sipwe apasa pwe aramas mi tekisoson me rese unusöch repwe tongeni chiechi ngeni Jiowa. Iwe nge, ewe Paipel a pwarata pwe mei tufich ngeniir. Lap seni ena, Jiowa a kütta seniir ar repwe föri. Wanupukü ier mwen uputiuen Jises, ewe soufos Mika a makkei ekkeei kapas: “Met a mochen pwe kopwe föri? A mochen pwe kopwe föri minne a pwung o eäni kirikiröch, kopwe pwal tipetekison fän mesen om we Kot.”​—Mika 6:8.

Ifa Ussun me Pwata Sipwe Feffetäl me Kot?

⁵ Ifa ussun sipwe tongeni feffetäl me chiechi ngeni ewe Kot mi fokkun manaman me monomon? A ffat pwe esap ussun chok ach chiechifengen me aramas. Lon ewe Paipel, ewe kapas “feffetäl” a tongeni wewe ngeni “aleni efoch alen manau.”a Pokiten ei mettoch, sia weweiti pwe ewe emön mi feffetäl me Kot a eäni efoch alen manau Kot a tipeeü ngeni me pwaapwa reen. Ach manaueni ena sokkün manau a asokkakichelo seni lape ngeni aramas. Nge, ina ewe kefil mi mürinnö ngeni emön choon Kraist. Pwata? Mei wor chommong popun.

⁶ Äeewin, Jiowa i ewe Chon Föörikich, Popunlapen manauach, me ewe Chon Awora tuufichin manauach. (Pwäratä 4:11) Ina popun, i chök a wor an pwüüng le erenikich ussün ewe sokkün manau sipwe manaueni. Pwal eü, ach chiechi ngeni Kot, ina ewe alen feioch lap seni meinisin. Ren ir kewe mi feffetäl me Jiowa, i a awora ewe alen omusomusen tipis, me ewe apilükülükun manau esemuch mi lüküchar. Iwe, Semach we mi tong lon läng a pwal awora ffön mi alisi ir kewe mi chiechi ngeni i ar repwe sopwöch iei, inaamwo ika rese unusöch me ra nonnom woon ei fönüfan mi nom fän manamanen Satan. (Jon 3:16; 2 Timoti 3:15, 16; 1 Jon 1:8; 2:25; 5:19) Iei pwal eü popun ach sipwe alleasochisi Kot, puun sia mochen föffööri minne epwe alisaatä kinamween me tipeeüwin ewe mwichefel.​—Kolose 3:15, 16.

⁷ Nge lap seni meinisin, lupwen sipwe feffetäl me Kot are alleasoochisi, sipwe pwäratä ach ekiek ussün ewe popun alongolongun kapwüng mi akkoom piitä lon ewe mälämälen Ichen ussun iö a wor an pwüüngun nemenem. (Keneses 3:1-6) Sia pwarata ren lapalapen manauach pwe sia peppeni Jiowa, me akkafalafal fan pwora pwe i chok ewe mi wor an pwüüngun nemenem. (Kol Fel 83:18) A ina ussun ach kewe foffor repwe tipeeu ngeni ach kewe iotek pwe iten Kot we epwe fel me epwe pwönütä letipan. (Mattu 6:9, 10) A ifa me watteen tipatchemen ir kewe mi filaatä ar repwe feffetäl me Kot! Ra tongeni luku pwe ra aleni ewe alen pwung, pun Jiowa “chok mi tipatchem.” Ese mwäälilo fän eü.​—Rom 16:27.

⁸ Iwe nge, ifa ussun epwe tufich ngenikich ach sipwe manaueni manauen chon Kraist lon fansoun fitikoko nge lape ngeni aramas rese ekiekin angang ngeni Jiowa? Sipwe küna pöluan lupwen sipwe kaeö ussün ekkewe chon luku loom loom mi akkamwöchu ar tuppwöl lon ekkewe fansoun weires. Inok me Noa, ruuemön me leir. Ar kewe fansoun ra ussun chök ach ei fansoun. A fokkun choufetal föffööringau. Lon räänin Noa we, ewe fönüfan a ur ren föfförun akkachofesä me sikepwach. Nge, Inok me Noa ra u ngeni ekiekin chon fönüfan lon ena fansoun me ra feffetäl me Jiowa. Ifa ussun ra tufichin fori ena mettoch? Ren ach sipwe pölüeni ena kapas eis, sipwe käeö ussun Inok lon ei lesen. Lon ewe lesen mwirin ei, sipwe käeö ussun Noa.

Inok A Feffetäl me Kot

lon Fansoun Fitikooko Chapur

⁹ Ewe Paipel a apasa pwe Inok, i ewe äkkäemönun aramas a feffetäl me Kot. A apasa: “Nge murin an Metusala uputiu, Enok a chiechiefengen me Kot.” (Keneses 5:22) Mwirin an kapas ussun ttamen manauen Inok​—inaamwo ika a ttam seni manauach, nge a mwochomwoch seni ttamen manauen piloon kewe​—ewe Paipel a apasa: “Enok a chiechiefengen me Kot. Murin esap chüen nom, pun Kot a angei.” (Keneses 5:24) Ese mwaal, Jiowa a amouralo Inok pwe ekkewe choon u ngeni resap tongeni efeiengaüa i. (Ipru 11:5, 13) Lukun ekkena wokisin, ewe Paipel ese kapas chommong ussun Inok. Iwe nge, seni minne sia silei, mei wor popun ach sipwe apasa pwe Inok a manau lon eu fansoun fitikoko watte.

¹⁰ Awewe chök, ekieki mwo ussun müttirin ngangaüloon aramas mwirin an Atam a tipis. Ewe Paipel a erenikich pwe nöün Atam we mwänichi, Kein, i ewe aemonun choon nniielo aramas lupwen a nniielo pwiin we Apel. (Keneses 4:8-10) Mwirin maloon Apel, Atam me If ra nounatiu pwal emon äät, iwe, ra eita ngeni Set. Sia älleääni pworausen Set, a erä: “Set a pwal nouni eman at o aita ngeni Enos. Lon ena fansoun aramas ra popueta le köri iten ewe Samol mi Lapalap.” (Keneses 4:25, 26) Iei ewe poraus mi alolilen, pwe ar “köri iten ewe Samol mi Lapalap” ese pwüüng, pwe ar köri a ussun chok an chon rikilo.b Chommong ier mwirin uputiuen Enos, emon mwirimwirin Kein we itan Lamek a makkei echo kol fan iten puluwan kewe ruuemon, iwe, a kolu pwe a nnielo emon alüwöl mi efeiengaüa i. A pwal öüröüra: “Are manauen Kein epwe mo fan fisu, manauen Lamek epwe mo fan fik me fisu.”​—Keneses 4:10, 19, 23, 24.

¹¹ Iwe, ewe poraus asan a pwäratä pwe ewe pworoingaü Satan a poputaani lon ewe mälämälen Ichen a müttir efisi chöüfetälin föfföringaü lein mwirimwirin Atam kewe. Lon ena sokkün otoot, Inok, i emön nöün Jiowa we soufoos nge aloon kewe ra lamot toori ikenai. Juta a apasa pwe Inok a oesini: “Nengeni, ewe Samol a fen feitiu eti chommong chommong noun kewe mi fel, pwe epwe fori apung ngeni aramas meinisin, o apungu ekkewe aramas ingau meinisin ren ar kewe föfför-ingau minne ra fen fori lon ar föfföör-ingaü, o pwal ren ekkewe kapas pochokkul ekkewe chon tipis mi ingau ra fen kapas pochokkul ngeni i.” (Juta 14, 15) Epwe unusen pwonuta ena oesini lon Armaketon. (Pwarata 16:14, 16) Nge sia tongeni luku pwe pwal mwo nge lon fansoun Inok, mei wor chommong “chon tipis mi ingau” ra mängaü lupwen ra rongorong an Inok we oesini. A ifa me watteen an Jiowa tong pwe a angei manauen ena soufoos pwe resap tongeni efeiengaüa i.

Meet a Apochokkula Inok pwe Epwe Feffetal me Kot?

¹² Lon ewe mälämälen Ichen, Atam me If ra auseling ngeni Satan, me Atam a u ngeni Jiowa. (Keneses 3:1-6) Nöür we äät Apel a aleni pwal efoch alen manau mi sokkolo, iwe, Jiowa a acheni i. (Keneses 4:3, 4) Nge lape ngeni mwirimwirin Atam kewe rese ussun chök Apel. Iwe nge, Inok a uputiu fitepükü ier mwirin, iwe, a aleni alen Apel. Ifa ussun Inok a sokko seni chommong mwirimwirin Atam kewe? Ewe aposel Paul a polueni ena kapas eis lupwen a makkei: “Ren luku, Inok a fen feilunusatä pwe esap kuna malo. O rese chuen kuna, pun Kot a angei i. Iwe, mwen an we feilunusatä, a fen aitöchulo i, pwe i mi apwapwai Kot.” (Ipru 11:5) Inok, i emön me lein “chommong [chon luku me mwen Jises] chon pwarata . . . ussun chok eu kuchu mi lap” mi akkamwochu ar luku. (Ipru 12:1) Lüküen Inok a atuufichi pwe epwe likiitu lon an kewe föfför mi pwüüng lap seni 300 ierin manauan, iwe, a ttam seni manauach woon fän ülüngat!

¹³ Paul a kapas ussun lüküen Inok me pwal ekkoch chon pwarata lupwen a makkei: “Iwe, luku a usun chok ach älleta minne sia äpilükülükü, o ussun chök ach ächiföüa minne sise mo kuna.” (Ipru 11:1) Ewer, luku a wewe ngeni minne sia äpilükülükü, nge a longolong won ekkewe pisekin ället pwe ekkewe mettoch sia äpilükülükü repwe pwönüetä. Pokiten a fokkun watte pöchökkülen ach äpilükülük, a kkü minne sia akkoomwa lon manauach. Inaamwo ika ekkewe ekkoch aramas rese angang ngeni Kot, nge ena sokkun luku a atuufichi Inok pwe epwe feffetal me Kot.

¹⁴ Lükü mi enlet a alongolong woon sile mi enlet. Ifa ewe sile Inok a eani? (Rom 10:14, 17; 1 Timoti 2:4) Ese mwääl, a fen silei met a fis lon Ichen. Eli a pwal rongorong ussun lapalapen manauen aramas lon ewe mälämälen Ichen, puun eli ena mälämäl mi chüen nonnom lon ena fansoun, nge a pinepin ngeni aramas. (Keneses 3:23, 24) Iwe, a pwal silei ussun otaen Kot pwe noun Atam kewe repwe choommongolo me auralo fonufan me föraalo fönüfan pwe epwe ussun chok ewe Paratis me le poputaan. (Keneses 1:28) Pwal och, ese mwääl Inok a aücheäni an Jiowa we pwon pwe epwe awora Emon pwe epwe apachacha möküren Setan me ataweei mwirimwirin an Setan kewe angaangen otupotup. (Keneses 3:15) Iwe, pwisin an Inok we oesini mi mak lon ewe puken Juta a kapas ussun taaloon mwirimwirin Setan kewe. Pokiten Inok a lükü, sia silei pwe a fel ngeni Jiowa, ewe Emön “a liwini ngeni ir ekkewe mi kükütta i.” (Ipru 11:6) Ina minne, inaamwo ika üküükün sileien Inok a kükkün seni sileiach, nge a naföch fän iten an epwe föraatä longolongun an lükü. Reen ena sokkun luku, a akkamwöchu an tuppwöl lon fansoun weires.

Appiru an Inok we Leenien Appiru

¹⁵ Pokiten kich, ussun chok Inok, sia mochen apwapwai Jiowa lon ei fansoun weires, epwe mürinnö ach sipwe appiru an Inok we leenien appiru. A lamot ach sipwe angei me akkamwochu sile mi pwung ussun Jiowa me an kewe kokkot. Nge a lamot pwal ekkoch mettoch. Sipwe mut ngeni ena sile mi pwung an epwe nemeni alen manauach. (Köl Fel 119:101; 2 Piter 1:19) A lamot ekiekin Jiowa epwe emmwenikich, me sipwe akkachocho le apwaapwaai i reen ach kewe ekiek me föfför meinisin.

¹⁶ Ewe Paipel ese apasa ika mei wor pwal ekkoch chon angang ngeni Jiowa lon fansoun Inok, nge a ffat pwe i a chök äläeemön are äkkäeemön chök ra angaang ngeni Kot. Iwe, kich mi pwal chokisikis lon ei otoot, nge sise äpilükülüküngaü ren. Ese lifilifil io kewe repwe u ngenikich, nge Jiowa epwe alisikich. (Rom 8:31) Fan pwora Inok a öüröüra aramas ussun nninniloon ekkewe aramas mi ingau. Inaamwo ika sipwe kuna esiit, turunufas, me riääfföü, nge sipwe pwal pwora lon ach afalafala “ei kapas allim ussun ewe muu.” (Mattu 24:14) Manauen Inok a mwochomwoch seni choommong piloon kewe. Nge ese eäni lukuluk woon kokkotun ena ootoot. A affota ekiekin woon och mettoch mi mürinnö seni meinisin. (Ipru 11:10, 35) Iwe, sia pwal affota ekiekich woon pwonuetään an Jiowa we kokkot. Ina popun, sise aunusalo ach äkkäeä mettochun ei fonufan. (1 Korint 7:31) Nge, sia äkkäeä ach pöchökkül me pisekich kewe fan iten ach angang ngeni Jiowa.

¹⁷ Inok a luku pwe atewe Kot a pwoneetiu epwe war lon ewe fansoun mi kefilitä me ren Jiowa. Iwe, a fen arapaakkan 2,000 ier seni fansoun a war Jises Kraist, me an awora ewe moon kepich me suuk ngenikich me ekkewe chon tuppwöl loom loom ussun chök Inok, ach tufichin küna manau esemuch. Iei i atewe mi wiiseni ewe wiis King lon an Kot we Mwuu, a fen oturätiu Satan seni lang ngeni fonufan. Iwe, sia küna ekkewe fitikoko mi popu seni. (Pwarata 12:12) Ewer, a watte sileiach seni sileien Inok. Ina minne sipwe eani ewe sokkun luku a eani. Sipwe mut ngeni ach lukuluk won pwonutaan an Kot kewe pwon an epwe nemeni ach kewe föfföör meinisin. Inaamwo ika sia manau lon eu fansoun fitikooko watte, nge sipwe ussun chök Inok le feffetäl me Kot.

[Footnotes]

Ifa Ussun Kopwe Pölüeni?

• Meet weween ach sipwe feffetäl me Kot?

• Pwata ach feffetäl me Kot, ina ewe aal mi murinnö seni meinisin?

• Meet a atuufichi Inok an epwe feffetäl me Kot lon fansoun weires?

• Ifa ussun sipwe tongeni appiru Inok?

[Ekkewe kapas eis fan iten ewe lesen]

1. Ikkefa ekkewe mettoch ra eriäfföükich lon ach ei fansoun?

2. Ikkefa ekkewe sossot ra tottoori noun Jiowa kewe chon angang?

3, 4. Ifa ussün ekkewe chon Kraist mi enlet ra sokko seni ekkewe chon lukun?

5. Ifa ussun emön aramas ese unusoch epwe tongeni feffetäl me Kot?

6, 7. Pwata ach feffetäl me Kot, ina ewe alen manau mi murinno seni meinisin?

8. Ifa ussun fansoun Inok we me ranin Noa we ra ussun chök ach ei fansoun?

9. Meet sia silei ussun Inok?

10, 11. (a) Ifa ussun an a chöüfetäl pworoingaüen aramas mwirin an Atam me If tipis ngeni Kot? (b) Ifa ewe oesini Inok a afalafala, me met meefien aramas ussun?

12. Ifa ussun Inok a sokko seni piloon kewe?

13. Meet sokkün lükü Inok a eäni?

14. Ifa ewe sile mi enlet lüküen Inok a alongolong won?

15, 16. Ifa ussun sipwe tongeni aleni alen Inok?

17. Meet sia silei nge Inok ese silei, iwe, met sipwe fori?

[Lios lon pekin taropwe 19]

Fefin, le peliemwäänich me le sopwün: FAO photo/B. Imevbore; tatiuen ewe imw: San Hong R-C Picture Company

[Lios lon pekin taropwe 21]

Ren luku, “Inok a feffetäl me ewe Kot mi enlet”

[Lios lon pekin taropwe 23]

Sia wesewesen luku pwe epwe pwönütä an Jiowa kewe pwon