Ifa Ussun Sipwe Tongeni Esilla Fel mi Enlet

LAPE ngeni ekkewe lamalam ra erä pwe met ra eäni afalafal a popu seni Kot. Ina minne, a fokkun lamot sipwe aüselingöch ngeni alon nöün Jises aposel itan Jon, a makkei: “Ämi chiechiei kana mi achengicheng, ousap lükü chokewe meinisin mi apasa pwe ra eäni Ngünmifel, nge oupwe sotuniir o küttaöchü are ekewe ngün ra feito seni Kot. Pun chomong soufos chofona ra feilfetal won fanüfan.” (1 Jon 4:1) Ifa ussun sipwe etittina eü mettoch pwe sipwe silei pwe a feito seni Kot?

Mettoch meinisin a feito seni Kot epwe pwäri napanapan kewe, äkkäeüin, napanapan we mi kon lamot seni meinisin, tong. Ren chök awewe, ach tufichin tini mettoch a atufichikich le silei pwonnen irä, pöön irä, are pilawa mei kerän umw, iwe, ina eü esissillen än Kot tong. Ach tufichin küna ewe mwiritup, emön nipisipisikon, are emelimelin emön kükkün semirit a pwäri än Kot tong ngenikich. Pwal ussun chök ren ach tufichin rongorong ngeni köl, tikitikin ekkewe matchang, are leüwen emön attongach. Pwal mwo nge lon nonnomuch aramas sise unusöch, a pwal pwälo än Kot tong. Ina pwata iteitan sia meefi enletin alon Jises: “Feiochun liffang mi lap seni feiochun angei.” (Fofor 20:35) Sia pwapwaiti le pwäratä tong pokiten sia för “lon püsin lapalapan.” (Keneses 1:27) Inaamwo ika a pwal wor chommong napanapen Jiowa kewe, nge tong, ina ewe a kon aüchea seni meinisin lein napanapan kewe.

Pworaus mi feito seni Kot repwe itä pwäri än tong. E nom ren lamalamen fönüfan ekkewe makken loom. Ifa ussun ekkena pworaus, ra pwäriöchü än Kot tong?

Nge ren enletin, lape ngeni ekkewe puken lamalam loom ra aweweei chök ekis ifa ussun än Kot tongekich me ifa ussun sia tongeni tongei Kot. Nge, ese pölü än fitu milion aramas kapas eis, ra erä, “Pwata sia küna pisekin annet ussun än Kot tong lon förian kewe nge riäfföü me föfföringaü ra chök sossopwosopwelo?” Iwe nge, ewe Paipel, ina chök ewe puken lamalam seni loom a unusen aweweei än Kot tong. A pwal äitikich ifa ussun sipwe pwäppwäri tong.

Ewe Puk Ussun Tong

Än Kot we Kapas, ewe Paipel, a affata pwe Jiowa “ewe Koten tong.” (2 Korint 13:11) Ewe Paipel a aweweei ifa ussun tong a amwökütü Jiowa le ngeni ewe äemönün aramas manau nge esap woor samau me mälo. Nge an ü ngeni än Kot we nemenem a efisatä riäfföün aramas. (Tuteronomi 32:4, 5; Rom 5:12) Jiowa a mwökütüküt pwe epwe eliwinato minne a pöütülo. Än Kot we Kapas a apasa: “Pun iei usun Kot a echeni chon fanüfan, pwe a fangela Nöün Aleman, pwe meinisin mi lükü i resap pöütmwälila, pwe repwe eäni manau esemüch.” (Jon 3:16) Paipel a affata watteen än Kot tong lupwen a aweweei ifa ussun Kot a awora eü mwu mi unusöch le pöün Jises pwe epwe eliwinato kinamwe ngeni aramas mi älleäsochis.—Taniel 7:13, 14; 2 Piter 3:13.

Ewe Paipel a menlapei wisen aramas lon ekkeei kapas: “‘Kopwe tongei om Samol Kot ren unusen letipom, o ren unusen ngunum, o ren unusen ekiekum.’ Iei ewe äeüin allük mi lap seni meinisin. Ewe aruuen a ussun chök, ‘Kopwe tongei chon orum ussun chök pwisin en.’ Ekkewe allük meinisin ra riri ngeni ekkeei ruu allük.” (Mattu 22:37-40) Ewe Paipel a apasa pwe a pop seni Kot. Pokiten a pwälo napanapan kewe, sia tongeni eäni lükülük pwe a popu seni “emön Koten tong.”—2 Timoti 3:16.

Ren ach apwönüetä ekkeei napanap, sipwe tongeni esilla menni makken loom ra enletin pop seni Kot. Tong a pwal esissillatä ekkewe chon fel mi enlet, pun ra äppirü Kot lon ar pwäri tong.

Ifa Ussun Sipwe Esilla Aramas Mi Tongei Kot

Ekkewe ra enletin tongei Kot ra sillelo, äkkäeüin iei atun sia nonnom lon minne ewe Paipel a eita ngeni “ekewe ränin lesopolan.” A lallapelo än aramas “repwe tongei pwisin ir, repwe tongei moni, . . . repwe aucheani chok minne repwe pwisin pwapwa ren, nge resap tongei Kot.”—2 Timoti 3:1-4.

Ifa ussun kopwe tongeni esilla aramas mi tongei Kot? Ewe Paipel a apasa: “Pun iei weween ewe tongen Kot, pwe sipwe alleasochisi an kewe alluk.” (1 Jon 5:3) Tong ngeni Kot a amwökütü aramas le süföliti än Paipel emmwen ussun limelimöch. Ren chök awewe, än Kot we Kapas a wor allük ussun ewe föfförün chufengen lefilen mwän me fefin me pwal pwüpwülü. Föfförün chufengen a chök mumutä ngeni ekkewe mi pwüpwülü, me repwe pwüpwülüfengen tori mälo. (Mattu 19:9; Ipru 13:4) Atun emön fefin lon Spein mi piin fiti sukulen lamalam a fiti eü mwich ikewe ie Chon Pwäratä Jiowa ra mwasangasang le käeö än ewe Paipel kewe allük ussun limelimöch ie, a apasa: “Särin ewe mwich, ua fokkun pöchökkületä, esap chök ren weweöchün ekkewe afalafal seni ewe Paipel nge pwal ren ewe tipeeü mi fis lein ekkena aramas, ar limelimöch, me föfföröchür.”

A pwal pachetä ngeni än chon Kraist mi enlet tongei Kot ar tongei chon orur kewe. Iei ewe angang mi fokkun aüchea ar repwe fos ngeni aramas ussun ewe chök äpilükülük ren aramas, ewe Mwuun Kot. (Mattu 24:14) Ese wor met epwe wato feiöch mi nomofoch ngeni chon orur lükün ar älisiir le angei ewe sile ussun Kot. (Jon 17:3) Chon Kraist mi enlet ra pwal pwäri ar tong lon pwal ekkoch napanap. Ra älisi ekkewe mi riäfföü. Ren chök awewe, atun eü chchechin fönü a efisi watteen tatakkis lon Italy, ewe simpung a repotei pwe Chon Pwäratä Jiowa “ra älisi ekkewe mi riäfföü, ese pwal lifilifil ika ir chon menni lamalam.”

Lükün ar tongei Kot me chon orur kewe, chon Kraist mi enlet ra tongfengen lefiler. Jises a apasa: “Iwe, upwe ngenikemi eu alluk mi fo, pwe oupwe tongfengen lefilemi, usun chok ua tongeikemi, pwe ami oupwe tongfengen lefilemi. Epwe iei usun pwe aramas meinisin repwe sinei pwe ami nei chon kaeo, are mi wor ewe tong lefilemi.”—Jon 13:34, 35.

Esap ewe tong lefilen ekkewe Chon Kraist mi enlet a fokkun sokkolo ffataffatöchün? Ina ekiekin emön chon elimelim itan Ema. A angang lon La Paz, Bolivia, ikewe ie sokkofesennin lewoon aramas a äimufesenni ekkewe mi wöüöch me wöüngaü. Neminewe a apasa: “Ewe äeüin fansoun ua fiti eü mwich än Chon Pwäratä Jiowa, ua küna emön mwän mi fokkun üföüföch a mommot me akkapworaus ngeni emön fin India. Use mwo kükküna ena mettoch fän eü. Lon chök ena fansoun, ua silei pwe ese mwääl ikkeei ir nöün Kot kewe aramas.” Pwal ussun chök, emön säräfö nengnginin Brazil itan Miriam a apasa: “Use silei ifa ussun upwe pwapwa, pwal mwo lon ai famili. Ewe äeüin fansoun ua küna tong mi pwälo lon föfför, ua küna me lein ekkewe Chon Pwäratä Jiowa.” Lon Merika, ewe meilapen eü TV station a makkei: “Ika a chommongolo aramas repwe manaueni ewe sokkun manau chon ämi na lamalam ra föri, ei mwu esap iei ussun. Ngang emön chon wisan apworausa repot, ua silei pwe ämi na mwicheich a longolong woon tong me lükü mi pöchökkül lon ewe Chon Föratä.”

Kükkütta Fel mi Enlet

Tong, ina met a asokkalo ewe fel mi enlet. Jises a alöllöfengenni än emön küna ewe fel mi enlet me an kütta ewe al mi pwüng me filatä an epwe feffetäl woon. Ina chök ewe al a emmwen ngenikich manau esemuch. Jises a apasa: “Oupwe tolong lon ewe asam mi pwangekükün! Pun a pwangemong ewe asam o chömong ewe al mi ale ngeni feiengau esemüch, nge chokewe mi fetal won ra chomong. Nge a pwangekükün ewe asam o chökükün ewe al mi ale ngeni manau esemuch. Mi wor ekoch chök aramas mi fetal won ei al ngeni manau.” (Mattu 7:13, 14) Eü chök mwicheichen Chon Kraist mi enlet ra tipeeüfengen le feffetäl ren Kot woon ewe alen fel mi enlet. Ina minne, mei lifilifil menni lamalam sipwe filatä. Ika ka küna ewe al me filatä le feffetäl woon, kopwe küna ewe sokkun manau mi mürinnö, ina ewe alen tong.—Efisus 4:1-4.

Anchangei met sokkun pwapwa kopwe eäni ika ka fetäl woon ewe alen fel mi enlet! A ussun sia feffetäl ren Kot. Kopwe tongeni käeö ewe sile me tong seni Kot pwe kopwe pwapwaesini om ririöch ngeni aramas. Seni i ka tongeni käeö ussun ewe popun manauach, me ka tongeni weweiti än Kot kewe pwon me eäni äpilükülük allim ren mwachkkan. Esap fokkun wor niamam lon ach kükkütta ewe fel mi enlet.

[Lios lon pekin taropwe 5]

Lein ekkewe makken loom, ewe chök Paipel a pwäri än Kot tong

[Lios lon pekin taropwe 7]

Chon Kraist mi enlet ra sillelo pokiten ra pwäppwäratä tong