Ewe Populapen Minne Mi Ngaü A Pwäpwälo!

LOOM, loom, chommong chon Jus ra witiwiti warotoon ewe Messaia. (Jon 6:14) Lupwen Jises a pwälo, a wato kapasen aurur me saram. A apöchökküla mi samau, amöngööni mi echik, a nemeni äsepwäl, ika a fen pwal mwo nge amanauatä mi mälo. (Mattu 8:26; 14:14-21; 15:30, 31; Mark 5:38-43) Jises a pwal aloni alon Jiowa me an we pwonen manau esemuch. (Jon 3:34) Ren met a apasa me föri, Jises a unusen pwäralo pwe i ewe Messaia, ewe emön epwe angasalo aramas seni tipis me sopwongaüen föfför mi ngaü.

Ürürün pwe ekkewe nöüwisen lamalamen Jus repwe fen etiwa Jises, rongorong ngeni, me etiwa an emmwen. Iwe nge, rese ina ussun. Ra fen oput, etipisi, me rauangaüei pwe repwe nielo!—Mark 14:1; 15:1-3, 10-15.

Mei chök pwüng än Jises apwüngü ätekkena mi tipis. (Mattu 23:33-35) Iwe nge, Jises a sinneni pwe mi pwal wor emön a wiisen efisatä ena esin kirikiringaü lon letiper. A apasa ngeniir: “Ami mi chok seni sememi ewe tefil, o oua chok mochen fori mochenian sememi we. I emon chon nielo aramas, seni chok le popun; o ese mo nonnom lon minne mi enlet, pun minne mi enlet ese nonnom lon i. Iwe, lupwen a kapas chofona, a chok kapas seni pwisin i, pun i emon chon kapas chofona, pwal semen kapas chofona.” (Jon 8:44) Inaamwo ika Jises a silei pwe aramas ra tufichin föri minne mi ngaü, nge a äiti ngenikich ionnewe populapen föfför mi ngaü, ina i Setan ewe Tefil.

Ren an apasa pwe Setan “ese mo nonnom lon minne mi enlet,” Jises a pwäralo pwe ei chonläng, emön chon angang ngeni Kot me lepoputään, nge a rikilo seni ewe al mi pwüng. Pwata Setan a ü ngeni Jiowa? Pun a ämääraatä ewe memmeefin pwisin ätekiatäi tori ewe aükükün a mocheniaiti ewe fel mi fich ngeni chök Jiowa.a—Mattu 4:8, 9.

A pwälo än Setan föfförün ü ngeni lon Ichen lupwen a otupu If an epwe ochei ewe föün irä mei allük. Setan a pwisin föri pwe i “semen kapas chofona,” lupwen a apasa ena äeüin kapas chofona pwal an pweni Jiowa. Lupwen a otupu Atam me If pwe repwe ü ngeni Kot, Setan a pwal efisatä tipis pwe epwe nemenem woor, iwe a emmweni ngeniir ar mälo me mäloon ekkewe tappin aramas mwirin. Nge Setan a pwal pwisin föri pwe i “emön chon nielo.” Ren enletin, i ewe chon nielo aramas mi fokkun ngaü seni meinisin seni loom tori ikenäi!—Keneses 3:1-6; Rom 5:12.

Setan a pwal etipetipa ekkewe chon läng pwe repwe fiti i le ü ngeni Kot. (2 Piter 2:4) Ra äppirü Setan ren ar nennengeni aramas lon napanap ese pwüng. Ar lisowu ngeni nöün aramas kewe föpwül a efisatä feiengaü wachemwük.

Föfför Mi Ngaü A Aüralo Fönüfan

Alon ewe Paipel: “Nupwen aramas ra chommongeno . . . ra poputa ne nounoutiw nengngin. Iwe nupwen noun God kewe at ra kuna pwe ekkewe nengngin ra niöch, ra efichir, iwe ra angei pwe punuer.” (Keneses 6:1, 2, Ewe Kapasen God) Iö kana “noun Kot kewe at”? Ir chonläng, esap aramas. (Hiop 1:6; 2:1) Ifa ussun sia silei pwe ir chonläng? Sia silei pun ewe pwüpwülü lefilen aramas a fen fiffis ren lap seni 1,500 ier. Itä ese pwal wor lamoten an epwe wor pworaus ussun pwüpwülü lefilen aramas ikeei ie. Nge lupwen a apworausa ngenikich pwe “noun God kewe at” ra efich nöün aramas kewe “föpwül,” ina och mettoch mi ämäirü me ngaü.

A ffatöchülo ngaüen ena föfför lupwen nöür kewe semirit ra uputiu. Iten ekkewe semirit Nefilim. Ra määritä ngeni sokkun aramas mi fokkun watte. Ir mi lamalam tekia pwal chon eriäfföü aramas. Ren enletin, “Nefilim” a wewe ngeni “Chon Oturukapa,” are “chokkewe mi föri än aramas turutiu.” Ekkena aramas mi arochongaü ir “ra iteföüla lon ar nemenem me pwora lon ewe fansoun lomlom.”—Keneses 6:4.

Ekkewe Nefilim me semer kewe ra wenewenen ssenuk lon ar föfföringaü. Kenesis 6:11 a apasa: “Nge chon fanüfän ra fokkun föföringaü fän mesen Kot o eäni föförün mwäneson ekis meinisin.” Ewer, aramas ra äppirü ekkeei napanapen mwänesol, föfföringaüen ekkena mineföön aramas ra nonnom leir.

Ekkewe Nefilim me semer kewe ra fokkun etipetipa aramas pwe repwe eäni mochenia mi ngaü. Met mwiriloon? “Ekewe aramas meinisin ra chök alapalo ar föför mi ngau.” Iwe, lesopwoloon, Jiowa a ataielo ena fönüfan ren eü noter woon fönüfan, nge a chök amanaua ewe mwän mi pwüng Noa me an famili. (Keneses 6:5, 12-22) Ekkewe chonläng mi ewili ngeniir aramas ra liwiniti leenier we leenien ngün nge ra itengaü. Ekkeei ir mi iteni timon ra chüen u ngeni Kot me an we mwicheichen chonläng mi tuppwöl. A ffat pwe seni lon ena fansoun tori iei Kot ese mutatä ar repwe ewilirelo ngeni aramas. (Juta 6) Iwe nge, ir mi chüen chök pöchökkül lon ar angolong lon mwökütükütün aramas.

Ewe Emön Mi Ngaü A Unusen Pwälo!

Aükükün etipetipaen Setan a pwälo lon 1 Jon 5:19. Jon a apasa: “Sia meefi pwe kich seni Kot, nge fonufan meinisin a nonnom fan nemenien ewe mi ingau.” Ewe Tefil a erikalo aramas ngeni feiengaü wachemwuk. Enletin, än Setan achocho le efeiengaüa aramas a lapolo seni loom. Pwata? Pun Setan me ekkewe timon ra fen koturutiu seni läng, mwirin an a poputä än Kot we Mwu lon 1914. Lupwen ra koturutiu seni läng, ewe Paipel a oesini: “Riaffou ngenikemi, fonufan . . . , pun ewe tefil a fen feitiu remi lon an song mi lap, pun a sinei pwe an we fansoun a chok mochomoch.” (Pwarata 12:7-12) Nge a ifa ussun Setan a etipetipa chon fönüfan ikenäi?

Setan a älisatä och sokkun ekiek mi nemeni än aramas ekiek me ar mwökütüküt. Me ren Efisus 2:2, ewe Tefil i “mi samoluni manamanen asapwal, ewe ngun [are ewe ekiek mi choufetäl] mi akangang iei lon ekkewe aramas mi lukumach.” Ena “asepwal” a efisatä ewe föfförün u ngeni Kot me an kewe allük, nge ese pesei aramas ar repwe niuokkusiti Kot me föri föfför mürinnö. Ina minne, Setan me nöün kewe timon ra achööüalo me alapalo ekkewe föfför mi ngaü aramas ra föfföri.

“Tümünü Letipom”

Eü napanapen ei “asepwal,” ina ewe mettoch chööüfetälin ekkewe pisekin katol, puk, chassi, lios, me sasing mi ngaü. Ekkeei mettoch, ussun chök eü määlap, ra efisatä mochenian lisowu mwääl me föfför ese pwüng nge ussun itä pwe ese wor ngaüer. (1 Tesalonika 4:3-5) Achomanau, kirikiringaü, mwichen achomanau, lisowu ngeni man, föfföringaü ngeni semirit, ikkeei ekkoch masouen ekkewe pisekin katol ra föri pwe minen apwapwa. Pwal mwo nge ren ekkewe rese kon ssenuk ngaüer, ekkena pisekin katol mi ngaü ra tongeni nemenalo manauen emön me ra efeiengaüa chokkewe mi katol me älleäniir. A tongeni awilalo emön ngeni sou nikkich.b Ena eü föfför mi ngaü mi ataielo ewe riri lefilen aramas me an aramas ririöch ngeni Kot. Ekkeei minen apwapwa mi limengaü ra pwäralo limengaüen ekiekin ekkewe timon mi apöchökküleretä. Ir ekkewe chon ü ngeni Kot mi mocheisou seni chök mwen ewe noter lon ränin Noa we.

Mei wor lamoten met ewe mwän mi tipachchem, Solomon, a apasa: “Kopwe fokun tümwünü lelukom lap seni om tümwünü och pisek aüchea, pun manau a pop seni lon lelukom.” (Än Salomon Fos 4:23) Kopwe tümünü letipom seni ssären pisekin katol mi ngaü ren om siwili met ka katol woon TV are aükatiu ewe computer lupwen ekkewe pisekin katol mi ngaü ra pwä lon. A fokkun lamot kopwe mwittir aükatiu! Ekieki mwo pwe en ka ussun itä emön sounfiu mei achocho le okullu efou pakutang mei wenengeni föün ngasangasom. Setan a änna letipom. Ikena ie mwökütükütüm me mochenum ra nonnom ie, iwe, Setan a kütta ifa ussun epwe aingaüerelo.

A mmen lamot ngonuk om kopwe eppeti letipom seni ewe tongen mwänesol pun ewe Tefil a silei pwe Jiowa “a oputa ekkewe ir mi mochen mwanesol.” (Kölfel 11:5) Setan a mochen pwe Kot epwe oputok ren an amääratä om tongei föfförün mwänesol, ese pwal lamot an epwe awiluk ngeni emön chon nni manau. Esap minen ämäirü pwe föfförün mwänesol mi masou ren pworausen ngün mi ngaü me roong ra chööü lon leenien föri sokkun pworaus. Ekkewe Nefilim ra fen mälo nge napanaper me mwökütükütür ir mei chüen chöüfetäl! Ifa ussun, filiom kewe minen apwapwa ra pwäratä pwe en mi fiu ngeni än Setan kewe minen ssär?—2 Korint 2:11.

Ifa Ussun Kopwe Fiu Ngeni Än Setan Etipetip

Ekkewe manamanen ngün mi ngaü ra ussun itä pwe mi weires ach sipwe fiu ngeniir. Ewe Paipel a apasa pwe chokkewe ra tinikken pwe repwe apwapwai Kot a wor ar “maun . . . ngeni ekkewe chommong sokkun ngun ingau lon lang,” pachelong ar fiu ngeni mochenin fitukeer pun rese unusöch. Ren ach pworacho lon ach fiu me angei ewe chenin Kot, mi lamot ach sipwe alamota ekkewe minen älillis seni Kot.—Efisus 6:12; Rom 7:21-25.

Ekkeei älillis seni Jiowa mi pachelong an we ngün mi fel. Ina ewe manaman mi nampa eü pöchökkül me lon unusen läng me fönüfan. Ewe chon künö Paul, a mak ngeni ekkewe chon Kraist lon ewe äeüin senturi: “Esap ngunun fonufan sia fen angei, pwe ewe Ngun seni Kot.” (1 Korint 2:12) Chokkewe mi angei än Kot we ngün ra mämmääritä lon ar tongei met Kot a tongei me oputa met Kot a oput. (Amos 5:15) Ifa ussun sipwe angei ngün mi fel? Äkkäeüin ren iotek, käkkäeö Paipel mi pop seni ngünün Kot, pwal ach chiechi ngeni chokkewe mi tongei Kot.—Luk 11:13; 2 Timoti 3:16; Ipru 10:24, 25.

Ren om alamota ekkeei emmwen mi feito seni Kot, kopwe poputä le pwilitalong woom “unusen an Kot kewe pisekin maun,” ina chök ewe tümün mi pwüng epwe eppeti “ekkewe tipatchem-sola an ewe tefil.” (Efisus 6:11-18) A fokkun atapwalapwal ach sipwe unusen angei ekkeei emmwen lap seni loom. Pwata a atapwalapwal?

Minne Mi Ngaü Epwe Wesilo!

“Inaamo ika ekkewe aramas mi ingau ra pukuta usun chok fetil, o ekkewe aramas mi fori ingau ra chommongolo, nge repwe fakkun poutmwalilo feilfeilo chok,” alon ewe chon makkei kölfel. (Kölfel 92:7) Ewer, ussun chök lon ränin Noa we, lapolon föfför mi ngaü iei ina pisekin pwäratä pwe än Kot kapwüng a chök mmonletä. Epwele fis, sap chök ngeni ekkewe aramasangaü, nge pwal ngeni Setan me nöün kewe timon. Repwele koturulong lon ewe leenien kalapus ikewe repwe chök witiwit me mwen repwe ninnilo. (2 Timoti 3:1-5; Pwarata 20:1-3, 7-10) Iö epwe wisen apwüngüür? Jises Kraist i ewe emön epwe eäni ena kapwüng ussun an a mak ikei ie: “Iei popun Noun Kot a pwato, pwe epwe atailo ekkewe angangen ewe tefil.”—1 Jon 3:8.

En mi mochen pwe föfför mi ngaü repwe mwüüchülo? Ika ina, kopwe tongeni küna aurur seni ewe pwon mi nom lon ewe Paipel. Ese pwal mwo wor eü puk mi pwäralo ewe chon efisatä föfför mi ngaü, ina i Setan, me ese pwal wor eü puk mi pwäratä pwe Setan me an kewe angang mi ngaü repwe unusen katalo. Sia peseok pwe kopwe angei ewe sile mi enlet seni ewe Paipel mi älisuk le ü ngeni än Setan kewe minen otuputup me etipetip. Epwe pwal ngonuk eü äpilükülük mi nüküchar ren om kopwe nonnom woon ei fönüfan lupwen ese chüen wor föfför mi ngaü lon.—Kölfel 37:9, 10.

[Footnotes]

[Box/Picture on page 6]

Ekkewe Tutunlap Mi Ekis Weneiti Ewe Noter

Ekkewe tutunlap ussun aramas mi fokkun pöchökkül, mwänemmong, me eü noter ra nom lon ekkewe tutunlapen loom woon unusen fönüfan. Awewe chök, ewe Tutunlapen Kilkames lon Akatia, a pworaus ussun eü noter, efoch siip, me aramas mi manau seni. Kilkames, emön mi sikepwach, emön mwän mi fokkun pöchökkül mi arochongaü, napanapan esop kot, esop aramas. Ewe tutunlapen Astek a pworaus ussun eü fönüen ekkewe mwänemmong me eü noter. Eü tutunlapen Norse, a kapas ussun eü kitir, an ekkewe mwänemmong me emön mi tipatchem itan Perkelmir ewe a falei efoch waa mi watte me amanaua pwisin i me pwülüwan we. Ekkena sokkun tutunlap meinisin ra ännetatä pwüngün ewe pworaus lon Paipel pwe meinisin aramas ra feito seni chokkewe ra manau lupwen a talo ewe fönüfan loom mi fokkun ngaü ren eü noter.

[Picture]

Ewe Tutunlapen Kilkames woon ei sileit fau

[Credit Line]

The University Museum, University of Pennsylvania (neg. # 22065)

[Picture on page 5]

Napanapen ekkewe Nefilim ra pwälo me lon napanapen aramas ikenäi

[Picture on page 7]

Sile mi enlet epwe apöchökkülakich le ü ngeni ewe etipetip mi ngaü