Watchtower ONLINE LIBRARY
Watchtower
ONLINE LIBRARY
Chuuk
  • PAIPEL
  • PUK
  • MEETINGS
  • w08 4/1 p. 11-15
  • Kükkütta Än Kot Emmwen Lon Mettoch Meinisin

Ese wor video fán iten ei kinikin.

Omusaaló, a wor osukosuk le eppietá ewe video.

  • Kükkütta Än Kot Emmwen Lon Mettoch Meinisin
  • Ewe Leenien Mas a Esilefeili án Jiowa We Mwú​—2008
  • Itelap Kisikis
  • Pwal Ekkóch
  • Pwata Sipwe Lükülük woon Än Jiowa Emmwen?
  • Ineet Epwe Lamot ngenikich Emmwen?
  • Feiengaüen Ach Sisap Kükkütta Än Kot Emmwen
  • Met Epwe Lamot fän iten Ach Sipwe Älleäsochisi än Kot Kapasen Fön?
  • Ifa Ussun Jiowa A Emmwenikich?
  • Ákkálleasochisi án Jiowa Kewe Emmwen
    Ewe Leenien Mas a Esilefeili án Jiowa We Mwú (Fán Iten ewe Mwichefel)—2024
  • Jiowa A Emmweni Néún Aramas lón ewe Alen Manaw
    Ewe Leenien Mas a Esilefeili án Jiowa We Mwú—2016
  • Ifa Usun Ka Féri Pwisin Óm Kewe Kefil?
    Ewe Leenien Mas a Esilefeili án Jiowa We Mwú—2016
  • Pwúng me Mwáál: Ewe Paipel eú Puken Emmwen mi Alúkúlúk
    Ewe Leenien Mas a Esilefeili án Jiowa We Mwú (Puk fán Iten Aramas Meinisin)—2024
Pwal Och
Ewe Leenien Mas a Esilefeili án Jiowa We Mwú​—2008
w08 4/1 p. 11-15

Kükkütta Än Kot Emmwen Lon Mettoch Meinisin

“Pwe iei i Kot, ach Kot, feilfeilo, feilfeilo chok. I chok epwe ach chon emmweni feilfeilo chok.”​—KÖLF. 48:14.

1, 2. Pwata sipwe lükülük woon än Jiowa emmwen nge sap pwisin ach tipatchem, iwe, ikkefa ekkoch kapas eis ra piitä?

LUPWEN sia eteneki mettoch mi lamotongaü are efeiengaü, a mecheres ach sipwe otupu pwisin kich are meefi pwe ra lamot. (SalF. 12:11) Ika sia wesewesen mochen föri och mettoch ese fokkun fich ngeni emön Chon Kraist, fän chommong, letipach epwe angöch le etipetipakich pwe sipwe föri. (Jer. 17:5, 9) Ina minne, ewe sou makkei kölfel a pwäratä tipatchem lupwen a tingorei Jiowa: “Kopwe tinato om we saram o om we enlet; pwe repwe emmweniei.” (Kölf. 43:3) A lükülük woon Jiowa, nge sap woon pwisin an tipatchem mi chök aükük, iwe, än Jiowa emmwen a mürinnö seni meinisin. Ussun chök ewe soumak, sipwe pwal kükkütta emmwen seni Jiowa.

2 Iwe, met popun sipwe lükülük woon än Jiowa emmwen lap seni meinisin? Ineet sipwe kütta an emmwen? Met sokkun ekiek sipwe ämääri pwe sipwe feiöch ren an emmwen, iwe, ifa ussun Jiowa a ekkemmwenikich lon ach ei fansoun? Sipwele pölüweni ekkeei kapas eis mi lamot lon ei lesen.

Pwata Sipwe Lükülük woon Än Jiowa Emmwen?

3-5. Ikkefa ekkewe popun sipwe unusen lükülük woon än Jiowa emmwen?

3 Jiowa, I Semach lon läng. (1 Kor. 8:6) A unusen silefichi emön me emön leich, me a tongeni älleäni letipach. (1 Sam. 16:7; SalF. 21:2) King Tafit a apasa ngeni Kot: “Ka silei fansoun ai mottiu me ai ütä, ka silei ai ekiek kana me toau. Nengeni, mwen ai üsamwo kapas, en, ai Samol mi Lapalap, ka fen unusen silei mine üpwe apasa.” (Kölf. 139:2, 4) Pokiten Jiowa a silefichikich, pwata sipwe tipemwaramwar pwe a silefichi minne epwe öchitikich? Pwal eü, Jiowa a unusen tipatchem. A küna mettoch meinisin, a nennengeni alolloonun pworaus lap seni aramas, me a silei sopwoloon mettoch meinisin seni chök le poputään. (Ais. 46:9-11; Rom 11:33) “Kot chok mi tipatchem.”​—Rom 16:27.

4 Pwal eü pworaus, Jiowa a tongekich me a mochen minne mi mürinnö fän äsengesich. (Jon 3:16; 1 Jon 4:8) Fän tong, a kisäseü ngenikich. Ewe chon käeö Jemes a makkei: “Meinisin sokkun liffang mi murinno, o meinisin sokkun minen liffang mi unusoch, ra chok seni won; ra fefeitiu me ren Semen ekkewe saram.” (Jem. 1:17) Chokkewe mi mut ngeni Kot an epwe ekkemweniir ra feiöch watte seni an kisäseü.

5 Iwe, säingoon, Jiowa a unusen manaman. Ewe sou makkei kölfel a aweweei: “Eman mi nom ren Ewe mi Unusen Tekia pwe epwe op ren o nonom fän än Ewe mi Unusen manaman tümwün, epwe apasa ngeni ewe SAMOL, ‘Ai leenien op, o ai imwen maun; ai Kot, mi ua achifoua.’” (Kölf. 91:1, 2) Lupwen sipwe älleäsochisi än Kot emmwen, sia op ren ewe Kot esap tongeni sopwongaü. Inaamwo ika epwe wor chon ü ngenikich, nge Jiowa epwe apöchökkülakich. Esap elichippüngükich. (Kölf. 71:4, 5; Älleäni Än Salomon Fos 3:19-26.) Ewer, Jiowa a silei met epwe mürinnö ngenikich, a mochen sipwe feiöch, me a wor an manaman le awora minne sipwe feiöch ren. A ifa me watteen umwesich ika sipwe tunalo an emmwen! Iwe nge, ineet a lamot ngenikich an na emmwen?

Ineet Epwe Lamot ngenikich Emmwen?

6, 7. Ineet a lamot ngenikich än Jiowa emmwen?

6 Pwüngün pwe a lamot ngenikich än Kot emmwen lon unusen manauach, seni le kükkünüch tori sia chinnapelo. Ewe sou makkei kölfel a apasa: “Pwe iei i Kot, ach Kot, feilfeilo, feilfeilo chok. I chok epwe emmwenikich tori ach sipwe mälo.” (Kölf. 48:14, NW) Ussun chök ewe sou mak, Chon Kraist mi tipatchem resap ükütiü le kükkütta kapasen emmwen seni Kot.

7 Pwüngün pwe fän ekkoch sipwe fokkun meefi atapwalapwalen an epwe wor älillis. Fän ekkoch, sia “nom lon riäfföü,” eli pokiten än aramas eriäfföüükich, semwen mi chou, are sia towu me angang. (Kölf. 69:16, 17) Lon ena sokkun fansoun, ach kulliiti Jiowa epwe aururukich, pun sia lükü pwe epwe elikiitükich me emmwenikich pwe sipwe filiöch. (Älleäni Köl Fel 102:17.) Iwe nge, a pwal lamot an älillis lon pwal ekkoch fansoun. Awewe chök, lupwen sipwe afalafala aramas ussun ewe kapas allimen ewe Mwu, a lamot än Jiowa emmwen pwe sipwe lipwäköch. Iwe, atun sipwe fili ach kewe minen kunou, üfach, chiechiach, ach angang, sukul, me met kan mwo, sipwe chök mirit ika sipwe älleäsochisi än Jiowa emmwen. Enlet, a lamot emmwen ren mettoch meinisin mi fiffis lon manauach.

Feiengaüen Ach Sisap Kükkütta Än Kot Emmwen

8. Met a pwälo lupwen If a ochei ewe föün irä mi pinepin?

8 Iwe nge, chechchemeni pwe a pwal lamot ach sipwe tipemecheres le älleäsochisi än Jiowa we emmwen. Jiowa esap echchimwakich ika sise mochen. Ewe äkkäemönün aramas a filatä pwe esap älleäsochisi än Jiowa emmwen, ina i If, iwe, pworausan a pwäratä ükükün ngaüen filian. Pwal ekieki mwo weween an föfför. If a ochei ewe uwa mi pinepin pun a mochen “wewe ngeni Kot o silei mine a öch pwal mine a ngau.” (Ken. 3:5) Ren an föfför, a ffat pwe a mochen wiseni wisen Kot, weween, a mochen pwisin filatä met mi pwüng me ngaü, nge ese mochen älleäsochisi än Jiowa kewe emmwen. Weween, a sape seni än Jiowa pwüüngün nemenem. A mochen pwisin nemeni i. Pwülüwan we, Atam, a pwal ü ngeni Kot.​—Rom 5:12.

9. Met weween ach tunalo än Jiowa emmwen, me pwata epwe fokkun tiparoch?

9 Ikenäi, ika sisap älleäsochisi än Jiowa emmwen, sisap pwal esilla än Kot pwüüngün nemenem. Awewe chök, ekieki mwo ussun emön mi kan kakkatol ekkewe kachitoon kapasingaü. Ika i chon eü mwichefelin Chon Kraist, a fen silei ekiekin Jiowa ussun ena föfför. Ika ese fich ach sipwe kapas ussun ekkewe mettoch mi limengaü, epwe ia me fen ngaüen ach sipwe katol fän pwapwa. (Ef. 5:3) Ika emön a tunalo än Jiowa kewe emmwen, epwe amam än Jiowa pwüüng le nemenem, me älleäsolapa möküran we. (1 Kor. 11:3) A fet me tiparochan, pun Jeremaia a apasa pwe “aramas resap püsin nemeni manauer, resap pwal tongeni akota mine repwe föri.”​—Jer. 10:23.

10. Pwata sipwe pwäratä mirit atun sipwe äeä ach tufichin pukun filatä?

10 Eli ekkoch resap tipeeü ngeni alon Jeremaia, pun ra meefi pwe Jiowa a ngenikich ach tufichin pukun filatä, itä pwata epwe song ika sipwe äeä. Iwe nge, sisap mönüki pwe ach tufichin pukun filatä esap chök eü liffang pwe pwal eü wis. Iwe, sipwe kapwüng ren minne sipwe filatä ach sipwe apasa me föri. (Rom 14:10) Jises a apasa: “Pun seni masouen letipan, auan epwe apasata.” Iwe, a pwal apasa: “Seni lon lelukan a towu ekiek mi ngau, ekiekin ninni, lisowu, mocheisou, solä, chofona me aitengaua aramas.” (Mt. 12:34; 15:19) Ina minne, aloch me föfförüch kewe repwe pwäratä sorosorun letipach. Ra pwäralo wesewesen napanapach. Ina pwata emön Chon Kraist mi tipatchem epwe kütta än Jiowa emmwen lon mettoch meinisin. Epwe ina ussun Jiowa epwe erä pwe i ‘emön mi pwüng lon letipan’ me epwe “föri mine a mürina”ngeni i.​—Kölf. 125:4.

11. Met sia käeö seni uruwoon Israel?

11 Chechchemeni mwo uruwoon Israel. Lupwen ena mwu a filiöch me älleäsochisi än Jiowa kewe allük, Jiowa a tüttümünüür. (Jos. 24:15, 21, 31) Iwe nge, fän chommong, ra äeämwäälli ar tufichin pukun filatä. Lon ränin Jeremaia, Jiowa a apasa ussur: “Iwe, resap aleasochis ika aüselinger, nge ra chei püsin ar öüröür me ülöförean leluker mi ngau. Ra fen ingauala, nge resap öchüla.” (Jer. 7: 24-26) A fokkun alolilen! Amwo sisap lükümach are apwönüetä pwisin mocheniangaüen letipach, pwe site tunalo än Jiowa emmwen, eäni lükülük woon pwisin ach tipatchem, me “ingauala, nge [sisap] öchüla”!

Met Epwe Lamot fän iten Ach Sipwe Älleäsochisi än Kot Kapasen Fön?

12, 13. (a) Ifa ewe napanap a achchüngükich pwe sipwe mochen älleäsochisi än Jiowa emmwen? (b) Pwata a lamot lükü?

12 Ach tongei Jiowa a achchüngükich le älleäsochisi an emmwen. (1 Jon 5:3) Iwe nge, Paul a kapas ussun pwal eü mettoch a lamot lupwen a apasa: “Sia chok fefetal lon luku, sap ren nengeni.” (2 Kor. 5:6, 7) Pwata a lamot lükü? Iwe, Jiowa a emmwenikich lon ewe “al mi pung,” nge ena al esap emmwen ngeni wöüöch are wis tekia lon ei fönüfan. (Kölf. 23:3) Pokiten ena, a lamot sipwe afota ach ekiek woon ekkewe feiöch lon pekin ngün mi popu seni ach angang ngeni Jiowa. (Älleäni 2 Korint 4:17, 18.) Iwe, lükü a kan älisikich pwe sipwe menemenöch ren minne chök a lamot ngeni manauach.​—1 Tim. 6:8.

13 Jises a apasa pwe lon fel mi enlet, a pwal lamot än emön epwe pönnüküolo pwisin letipan, nge epwe popu seni an lükü. (Luk 9:23, 24) Ekkoch chon fel mi tuppwöl ra pönnüküolo chommong mettoch pwe repwe likiitü fän wöüngaü, pworongaüen nemenem, aapap, me pwal mwo nge eriäfföü watte. (2 Kor. 11:23-27; Pwar. 3:8-10) Lükü mi pöchökkül chök epwe tongeni atufichiir ar repwe pwapwa le likiitü. (Jem. 1:2, 3) Pöchökkülen ach lükü epwe wesewesen alükülüküükich pwe ach älleäsochisi än Jiowa emmwen epwe sopwöch fansoun meinisin. Sipwe feiöch ren fansoun meinisin. Esap fokkun wor ach tipemwaramwar pwe feiöchün chokkewe mi likiitü fän tuppwöl epwe watte seni ar riäfföü fansoun mwochomwoch.​—Ipru 11:6.

14. Pwata a lamot Hakar epwe pwäratä tipetekison?

14 Pwal ekieki mwo lamoten tipetekison lon ach älleäsochisi än Jiowa emmwen. Pworausen Hakar, nöün Sara we chon angang, a äiti ngenikich lamotan. Pokiten Sara a rit, a ngeni Eperiam Hakar, iwe, neminna a pwopwo me woon. Mwirin, Hakar a lamalam tekia ngeni Sara pun a rit. Ina minne, Sara a “äsäüa i,” iwe, Hakar a su seni. Emön chonlängin Jiowa a chuuri Hakar me ereni: “Kopwe liwiniti om samol o anomuk fän nemenian.” (Ken. 16:2, 6, 8, 9) Eli Hakar ese kon lien sani ena emmwen. Ren an epwe apwönüetä än ewe chonläng emmwen, epwe pöütalo an lamalam tekia. Iwe nge, Hakar a tipetekison le föri alon ewe chonläng, iwe, nöün we Ismael a uputiu lon lükülüköchün leenien seman we.

15. Aweweei mwo ineet atun epwe lamot ach sipwe tipetekison le älleäsochisi än Jiowa emmwen.

15 Ika sipwe älleäsochisi än Jiowa emmwen, epwe lamot ach sipwe atipetekisonakichetiu. Awewe chök, eli ekkoch repwe mirititi pwe Jiowa ese pwapwa ren eü sokkun minen kunou ra efich. Are, emön Chon Kraist a ämängaüa emön, epwe omusomus ngeni. Are, a mwäällilo, me epwe pwäri an mwääl. Emön epwe fet ika a tipis watte? A lamot an epwe pwäri an tipis ngeni ekkewe elter. Are, emön a katowu seni ewe mwichefel. Ika epwe liwinsefälilong, a lamot an epwe aier me kulsefäl. Atun epwe fis ekkeei sokkun pworaus, Än Solomon Fos 29:23 epwe aururukich, a erä: “Eman aramas mi lamalamtekia epwe küna tekison, nge eman aramas mi tekison epwe küna iteüöch.”

Ifa Ussun Jiowa A Emmwenikich?

16, 17. Ifa ussun epwe watte feiöchüch seni ekkewe kapasen emmwen lon Paipel?

16 Ewe Paipel, ina ewe äkkäeüin minen emmwen seni Kot. (Älleäni 2 Timoti 3:16, 17.) Ren ach sipwe küna watteen feiöchüch seni Kapasen Kot, sipwe tipatchem ika sisap witiwiti an epwe piitä eü fansoun weires me mwen ach sipwe kütta älillis seni Paipel. Nge, sipwe älleäni ewe Paipel iteiten rän. (Kölf. 1:1-3) A ina ussun sipwe silefichi än Kot we Kapas. Sipwe eäni ekiekin Kot kewe, iwe, epwe ammolnakich pwe sipwe ataweei pwal mwo nge ekkewe osukosuk mi chök weiweitä.

17 Pwal eü pworaus, a lamot ach sipwe ekilonei minne sipwe älleäni seni Paipel me iotek ussun. Lupwen sipwe ekilonei ekkoch wokisin seni Paipel, sipwe ekieki ifa ussun ra weneiti ekkoch fansoun mi titchik. (Kölf. 77:12) Lupwen epwe torikich osukosuk watte, sipwe tingor älillis seni Jiowa pwe sipwe küna emmwen mi weneiti ach osukosuk. Än Jiowa we ngün epwe älisikich le chechchemeni ekkewe popun alongolongun allük sia piin älleäni lon Paipel are lon ekkewe puken aweween Paipel.​—Älleäni Kölfel 25:4, 5.

18. Ifa ussun Jiowa a emmwenikich ren ach mwicheichen pwipwi lon Kraist?

18 Ach pwipwifengen lon Kraist, ina pwal eü minen älillis mi aüchea lon ach kükkütta än Jiowa emmwen. Lon ena mwichen pwipwi, emmwen mi lamot a popu seni ewe “chon angang mi tuppwel o tipatchem” fengen me ewe Mwichen Sou Pwüngüpwüng mi tupuni. A akkawora möngöön ngün lon ekkewe puk me chassi me prokramin ekkewe mwich me mwichelap. (Mt. 24:45-47; apöpö ngeni Fof. 15:6, 22-31.) Pwal eü älillis, mei wor pwiich kewe mi äsimaü, äkkäeüin ekkewe elter, mi tufichin awora älillis me fön seni Paipel. (Ais. 32:1) A wor pwal eü minen älillis mi aüchea ngeni ekkewe semirit ika semer kewe me iner, iir chon lükü. Kot a awisa ngeniir pwe repwe wisen awora ngeni nöür kewe än Kot fön, iwe, ekkewe semirit repwe kütta emmwen seniir.​—Ef. 6:1-3.

19. Ikkefa ekkewe feiöch sia pwapwaesini pokiten ach kükkütta än Jiowa emmwen?

19 Enlet, Jiowa a kan akkawora emmwen lon sokkopaten napanap, iwe, epwe öch ach sipwe kütta älillis seniir. King Tafit a kapas ussun eü fansoun lupwen Israel a tuppwöl, a apasa: “Äm kewe lewo ra anomu ar apilükülük womw. Ra apilükülük, nge en ka angaserela. Ra siö ngonuk, nge en ka amanaueer, ra apilükülükük, nge resap säü.” (Kölf. 22:3-5) Ika sipwe lükülük woon än Jiowa emmwen, sisap pwal “säü.” Sisap lichippüng ren ach äpilükülük. Ika sipwe ‘likiti ngeni Jiowa manauach,’ nge sisap lükülük woon pwisin ach tipatchem, epwe atoto rech feiöch wachemwuk pwal mwo nge iei. (Kölf. 37:5) Iwe, ika sipwe älleäsochis me likiitü pokiten ach tongei Jiowa, sipwe feiöchfochofoch. King Tafit a makkei: “Pun ewe SAMOL a tongei minne mi pung; esap likitalo noun kewe aramas mi fel. Epwe tutumunu ekkewe aramas mi pung feilfeilo chok . . . Ekkewe aramas mi pung repwe fonueni ewe fonu, o repwe nonom lon, feilfeilo chok.”​—Kölf. 37:28, 29.

Ka Tongeni Aweweei?

• Pwata sia lükülük woon än Jiowa emmwen?

• Ach tunalo än Jiowa emmwen a pwäratä met?

• Ikkefa ekkoch fansoun lupwen a lamot emön Chon Kraist epwe tipetekison?

• Ifa ussun Jiowa a ekkemmwenikich ikenäi?

[Sasing lón pekin taropwe 12]

Ka kükkütta emmwen seni Jiowa lon kinikinin manauom meinisin?

[Sasing lón pekin taropwe 13]

If a sape seni än Jiowa pwüüngün nemenem

[Sasing lón pekin taropwe 15]

Ifa ewe napanap a lamot ngeni Hakar ika epwe älleäsochisi än ewe chonläng emmwen?

    Meinisin mi Peres lón Fósun Chuuk (1987-2025)
    Log Out
    Log In
    • Chuuk
    • Share
    • Preferences
    • Copyright © 2025 Watch Tower Bible and Tract Society of Pennsylvania
    • Terms of Use
    • Privacy Policy
    • Privacy Settings
    • JW.ORG
    • Log In
    Share