Noa me ewe Noter Kapas Wesewesan, Nge Esap Eü Tütülap

KA MOCHEN manau lon eü otot mi mürinnö seni ei otot​—ikewe esap chüen wor maun, atai allük, are nemenemengaw ie? Ika ina, kopwe küna apöchökkül seni eü pworaus lon uruwoon aramas neman ka fen silefichi. Ina pworausen Noa, i emön mwän mi wesewesen mürinnö a falei efoch waimw pwe iir me an famili resap mälo lon ewe noter mi nielo ekkewe aramas mi ngaw.

A wesewesen chöüfetäl ei pworaus. Pworausen minne a fis ngeni Noa a mak lon ewe puken Paipel itan Keneses, sopwun 6 tori 9, iwe, a pwal mak pworausan lon ewe puken lamalam itan Koran me lon tütülapen chommong sokkun aramas woon unusen fönüfan. A wesewesen fis ewe Noter, are a eü chök tütülap mi älisi aramas ar repwe föfföri minne mi pwüng? Ren fitepükü ier, ekkewe nouwisen lamalam me sou ääk ra äninifengen woon ena kapas eis. Nge, ewe Paipel, Kapasen Kot, a affata pwe a wesewesen fis, nge esap eü chök tütülap. Nennengeni ekkewe popun sipwe lükü:

Pworausen ewe Noter lon Keneses a titchiki ewe ier, maram, me rän a poputä, ineet me ia ewe waimw a ffanetä ie, me ineet ewe fönüfan a pwaselo. A pwal titchik fförün ewe waimw​—kaükün ewe waimw, saisin, me met a fför seni. Iwe nge, ekkewe tütülap rese kon lien titchiki.

Ruu tettelin aramas lon ewe Paipel ra pwäratä pwe Noa wesewesen emön aramas. (1 Kronika 1:4; Luk 3:36) Esra me Luk ra makkei ekkena tettelin aramas, iwe, iir sou käeö mi fokkun titchik. Luk a makkei titchikin tettelin samasamen Jises Kraist tori Noa.

Ekkewe soufos Aisea me Isikiel me pwal ekkewe aposel Paul me Piter, ra kapas ussun Noa me ewe Noter.​—Aisea 54:9; Isikiel 14:14, 20; Ipru 11:7; 1 Piter 3:19, 20; 2 Piter 2:5.

Jises a pwal kapas ussun ewe Noter, iwe, a apasa: “Usun mine a fis lon fansoun Noa, iei usun epwe pwal fis lon ränin Nöün Aramas. Ra momongö o ükün, ra pwüpwülü o akapwüpwülüür tori ewe rän lupwen Noa a tolong lon ewe waimw o ewe noter a war o niirela meinisin.” (Luk 17:26, 27) Ika ese fis ewe Noter, esap wor lamoten alon Jises ussun “ränin [ewe] Nöün Aramas.”

Ewe aposel Piter a oesini pwe epwe wor “chon esiit” mi turunufasei met ewe Paipel a apasa. Piter a makkei: “Ren ar ekieki iei usun, a lama seni ir pwe . . . ewe konik a pungutiu o a pwoluelo ewe fonufan mi nonnom lon ewe fansoun [Noa], o a pwal ataielo.” Itä sipwe pwal mönükalo ena mettoch? Aapwi! Piter a apasa: “A iseis ekkeei lang o fonufanen ei fansoun ngeni ekkei, a iseis ir tori ewe ranin apung, ranin an ekkewe aramas ingau poutmwalilo.”​—2 Piter 3:3-7.

Iwe, epwe fissefäl pwe Kot epwe nielo ekkewe mi ngaw, me epwe pwal wor chon ngaselo seni ewe ninni. Ren ach sipwe äkkäppirü Noa, eli sipwe nom lein ekkewe mi pwüng repwe pwapwaesini eü ototen fönüfan mi mürinnö seni ei otot.