Met Sia Käeö Seni Jises Ussun

Ach Föfför ngeni Aramas

Pwata sipwe kirekiröch?

Ka kirekiröch pwal mwo nge ika aramas ra kirikiringaü ngonuk? Ika sipwe äppirü Jises, sipwe kirekiröch ngeni pwal mwo nge iir kewe mi oputakich. Jises a apasa: “Are oua chök tongei ekewe aramas mi tongekemi, met popun ämi oupwe angei och feiöch? Ekewe mwo chon tipis ra pwal tongei chokewe mi tongeer. . . . kNge ämi oupwe echeni chon oputakemi . . . , o wiliti Nöün Kot ewe mi Unusen Tekia. Pun Kot a kirikiröch ngeni chokewe resap sile kilisou, pwal ngeni ekewe aramasangau.”​—Luk 6:32-36; 10:25-37.

Pwata sipwe omusalo tipisin aramas?

Lupwen sia mwäällilo, sia mochen pwe Kot epwe omusakichelo. Jises a affata pwe mi fich ach sipwe iotek pwe Kot epwe omusakichelo. (Mattu 6:12) Iwe nge, Jises a pwal apasa pwe ükükün än Kot omusakichelo epwe alongolong woon ükükün ach omusalo mwäällin ekkewe ekkoch. A apasa: “Pun are oupwe amusala än aramas tipis, Sememi mi nom läng epwe pwal amusala ämi tipis. Nge are ousap amusala än ekewe aramas tipis, Sememi mi nom läng esap pwal amusala ämi tipis.”​—Mattu 6:14, 15.

Pwapwaan ewe famili a popu seni met?

Inaamwo ika Jises ese pwüpwülü, nge sia tongeni käeö seni met epwe efisatä pwapwa lon ewe famili. Ren an kapas me föfför, a isetiu eü leenien äppirü ngenikich. Ekieki mwo ekkewe ülüngät pworaus mwirin.

1. A lamot ngeni emön mwän pwüpwülü an epwe tongei pwülüwan we ussun pwisin inisin. Jises a isetiu eü leenien äppirü ngeni ekkewe mwän pwüpwülü. A apasa ngeni nöün kewe chon äppirü: “Iei üpwe ngenikemi eu allük mi fö: Oupwe echenifengenikemi lefilemi.” Epwe ifa ükükün? A apasa, “Usun ngang üa echenikemi.” (Jon 13:34) Ewe Paipel a apasa ngeni ekkewe mwän pwüpwülü: “Ämi mwän kana oupwe echeni pwülüemi usun Kraist a echeni mwichefel o fangala manauan fän itan. Ina usun ekewe mwän repwe echeni pwülüer usun chök ar püsin echeni inisiir. Eman mwän mi echeni pwülüan a echeni püsin i. Esap fokun wor eman a oput püsin inisin, nge a fokun amongöni o tümwünü usun chök met Kraist a föri ngeni mwichefel.”​—Efisus 5:25, 28, 29.

2. Ekkewe pwüpwülü repwe tuppwölfengen lefiler. Lisowu lükün pwülüwan, ina eü tipis ngeni Kot me epwe atai ewe kkotun famili. Jises a apasa: “Ousap aleani mine a mak? . . . ‘Iei mine eman aramas epwe likitala saman me inan o pach ngeni pwülüan, iwe, ekewe ruoman repwe wiliti eu chök inis.’ Iei mine resap chüen ruoman, pwe eman chök. Mine Kot a rifengeni esap wor eman aramas epwe mwütifeseni. Nge ngang üpwe ürenikemi, ‘Are eman mwän a mwü seni pwülüan fän iten och popun, nge esap fän iten an kirikiringau ngeni, ätewe a lisowu are a pwülüenisefäli pwal eman fefin.”​—Mattu 19:4-9.

3. Ekkewe nau repwe nom fän nemenien semer kewe me iner. Inaamwo ika Jises a unusöch nge seman kewe me inan woon fönüfan rese unusöch, nge a chök älleasochisiir. Ewe Paipel a apasa pwe lupwen Jises a 12 ierin: “A etiir [Josef me Meri] le liwinsefäliti Nasaret, iwe, a aleasochis ngeniir. Nge inan a iseis ekei mettoch meinisin lon lelukan.”​—Luk 2:51; Efisus 6:1-3.

Pwata sipwe akkapwönüetä minne a mak asan?

Iei alon Jises ussun minne a äiti ngeni nöün kewe chon äppirü: “Iei oua silei ekei mettoch, oupwe feiöch are oupwe apwönüretä.” (Jon 13:17) Ika kich Chon Kraist mi enlet, a lamot ach sipwe apwönüetä ewe fön seni Jises ussun ach föfför ngeni ekkewe ekkoch. A apasa: “Are oupwe echenifengenikemi, aramas meinisin repwe silei, pwe ämi nei chok kaiö.”​—Jon 13:35.

Ren pwal ekkoch pworaus, ppii sopwun 14 lon ewe puk Met ewe Paipel A Wesewesen Apasa?a

[Footnote]

[Sasing lón pekin taropwe 16]

Än Jises kapas monomon ussun ewe nau mi mwälechelo a äiti ngenikich lamoten tong me ach omusalo mwäällin ekkewe ekkoch.​—Luk 15:11-32

[Sasing lón pekin taropwe 17]

Ekkewe pwüpwülü repwe tuppwölfengen lefiler