Eü Lükü Mi Chöüfetäl
“Üa ttana pwe itä üa kar lon ell! Lon ai we ttan itä üa koturulong lon ekkei, iwe, üa kitipöpötä me püchör. Pokiten ena, üa fokkun achocho ngeni pwe usap tipis.”—Arline
KA LÜKÜ pwe ell ina eü leenien riäfföü fän iten chon tipis? Ina lüküen chommong. Ren chök awewe, lon 2005, emön sou käeö masouen Paipel lon ewe University of St. Andrews lon Scotland, a küna pwe eü na aülüngätin nouwisen lamalam lon Scotland ra lükü pwe chokkewe mi imu seni Kot repwe küna “osukosuk watte tori feilfeilo chök lon ell.” Eü na nimuan me leir ra lükü pwe ekkewe mi nonnom lon ell repwe küna riäfföü lon pekin inis.
Lon chommong fönü, a chöüfetäl än aramas lükü ussun ell. Ren chök awewe, lon 2007, lon eü angangen angei ekiekin aramas lon Merika, a pwälo pwe orun 70 persentin ekkewe aramas ra lükü pwe mei wor ell. Pwal mwo nge lon ekkewe fönü ikewe lape ngeni esor ar lamalam, iir mwo nge ra pwal lükü ell. Lon 2004, a fis eü angangen angei ekiekin aramas, iwe, a pwälo pwe 42 persentin chon Canada ra lükü ell. Iwe, lon England, 32 persent ra ächiföüa pwe a wor ell.
Äitien Ekkewe Nouwisen Lamalam
Chommong nouwisen lamalam rese chüen afalafala pwe ell wesewesen eü leenien riäfföü mi ngetenget. Nge, ra efich eü awewe mi arapakkan ngeni ewe afalafal mi mak lon eü puk Katekis än ewe Lamalamen Katolik, (Catechism of the Catholic Church), a fför lon 1994. A apasa: “Än emön imulo seni Kot tori feilfeilo chök, ina asalapen liwinin tipis lon ell.”
Iwe nge, a chüen chök wor ewe lükü pwe ell ina eü leenien riäfföü lon pekin inis me lon pekin ekiek. Ekkewe mi eäni ei afalafal ra erä pwe a longolong woon Paipel. R. Albert Mohler, peresetenin eü sukulen nouwisen lamalamen Baptist, a apasa: “A chök popu seni Paipel.”
Pwata a Lamot Minne Ka Lükü?
Ika ell wesewesen eü leenien riäfföü, kopwe niuokkusiti. Iwe nge, ika ese enlet, ekkewe nouwisen lamalam mi asukula aramas ei afalafal ra efisatä wewengaü me niuokkusun ekkewe mi lüküür. Iwe, ra pwal eitengaüa Kot.
Met än Kot Kapas, ewe Paipel, a apasa ussun ei pworaus? Ekkewe pworaus mi tapwoto repwe nöünöü ekkewe Paipelin Pirostan le pölüweni ekkeei ülüngät kapas eis: (1) Met a wesewesen fis ngeni emön atun a mälo? (2) Ifa äitien Jises ussun ell? (3) Ifa ussun om silei ewe enlet ussun ell epwe kküü manauom?