Ifa Ussun Om Silei Ewe Enlet Ussun Ell Epwe Kküü Manauom?
CHOKKEWE mi afalafala pwe ell, ina eü leenien riäfföü, ra apöchökküla ekiek mi fokkun mwääl ussun Jiowa Kot me napanapan kewe. Pwüngün, ewe Paipel a apasa pwe Kot epwe nielo ekkewe mi ngaü. (2 Tesalonika 1:6-9) Nge än Kot song mi longolong woon pwüng, esap ina eü äkkäeüin napanapen Kot.
Kot esap arochongaü are kirikiringaü. A pwal mwo nge eis: “Üpwe pwapwaiti än ewe aramasangau mäla?” (Isikiel 18:23) Ika Kot esap pwapwaiti mäloon ekkewe mi ngaü, pwata aramas repwe ekieki pwe epwe tongeni pwapwa le kakkatol ar repwe riäfföü tori feilfeilo chök?
Tong, ina napanapen Kot mi lapalap seni meinisin. (1 Jon 4:8) Enlet, “ewe SAMOL a chok murinno ngeni aramas meinisin, o an kirokiroch a nom won mettoch meinisin minne a fori.” (Kölfel 145:9, TF) Iwe, Kot a pwal mochen ach sipwe tongei i ren unusen letipach.—Mattu 22:35-38.
Niuokkusun Ell are Tong ngeni Kot —Menni Leir a Achchünguk?
Ewe afalafal pwe ngünün aramas ra küna riäfföü lon ell a efisi än aramas kon niuokkusiti Kot. Iwe nge, emön mi käeö ewe enlet ussun Kot me a ämääraatä an tongei i, epwe niuokkusiti Kot lon eü napanap mi mürinnö. Kölfel 111:10 a awewei: “Niuokusiti ewe SAMOL, iei poputan tipatchem; ir meinisin mi fori ei ra wewefichi.” Ei niuokkusun Kot esap wewe ngeni pwe aramas repwe fokkun mösökiiti Kot, nge a wewe ngeni ar repwe ingeiti me mwareiti ewe Chon Föri mettoch meinisin. A ämääraatä ach sipwe niuokkus le aletipengaüa i.
Kathleen, emön 32 ierin mi piin ükkün säfeien opuchopuch. Nengeni ifa ussun an käeö ewe enlet ussun ell a siwili manauan. Me loom, a fiffiti pari, föfföri föfförün akkachofesä, a oput pwisin i, me a limengaü manauan. Iwe, a apasa: “Üa nengeni nei we nengngin, eü chök ierin, iwe, üa ekieki, ‘Nengeni met üa för ngeni nei ei. Upwe karelo lon ell.’” Kathleen a sotuni le ükütiu seni an ükkün säfeien opuchopuch, nge ese tongeni. A apasa: “Üa mochen pwe upwe mürinnö, nge üa chök äpilükülüküngaü ren unusen manauei me mettoch meinisin woon ei fönüfan. Itä esor popun upwe emön mi mürinnö.”
Mwirin, Kathleen a chuuri Chon Pwäratä Jiowa. Iwe, a apasa: “Üa käeö pwe esor eü ekkein ell. A mmen öch ekkewe pisekin ännet seni Paipel. A fokkun aururu letipei ai silei pwe usap karelo lon ell.” Nge a pwal käeö ussun än Kot we pwon pwe aramas repwe manaufochofoch woon fönüfan ikewe esap chüen wor ekkewe mi ngaü ie. (Kölfel 37:10, 11, 29; Luk 23:43) A apasa: “Iei üa eäni eü äpilükülük allim pwe upwe manaufochofoch lon Paratis!”
Ika Kathleen ese niuokkus pwe a wor eü ekkein ell, epwe tongeni ükütiu seni an ükkün säfeien opuchopuch? A apasa: “Atun a pöchökkül ai mwoneiti säfeien opuchopuch, üa tingormaü älillis seni Jiowa. Üa ekieki meefian ussun ena föfför mi limengaü, iwe, use mochen alichippüngü i. A pölüweni ai kewe iotek.” (2 Korint 7:1) An niuokkus pwe epwe aletipengaüa Kot a atufichi Kathleen pwe epwe ngaselo seni säfeien opuchopuch.
Ewer, ach ämääraatä tong ngeni Jiowa me ach niuokkusiti i nge sap riäfföü lon ell, epwe achchüngükich pwe sipwe föri letipen Kot me küna pwapwafochofoch. Ewe sou makkei kölfel a makkei: “Ra feiöch ir meinisin mi niuokusiti ewe Samol mi Lapalap, chokewe mi aleasochisi an kewe allük.”—Kölfel 128:1.