Esap Chüen Fis Ekkewe Feiengaw Watte!
IKA emön a erenuk, “Ekiselo chök esap chüen fis ekkewe feiengaw watte.” Iwe, epwe met meefiom? Eli kopwe apasa, “Ka chök i ttana. Pokiten ina met a kan fiffis lon änein manauen aramas.” Are eli ka chök pwisin ekieki, ‘Itä iön epwe kan otupu?’
Inaamwo ika ekkewe feiengaw watte usun itä repwe chök fiffis, nge mi wor popun ach sipwe äpilükülüköch pwe lon mwach kkan esap chüen fis. Iwe nge, esap aramas repwe föri ena. Pokiten rese tufichin unusen weweiti ifa usun me pwata a fiffis taifun, chchechin fönü, loo watte, söön, me met kkan, iwe resap fen pwal mwo nge tongeni aükürelo me eppetiir. Ewe kingen Israel loom mi fokkun tipächem me mirit Salomon, a makkeei: “Esap wor eman aramas a tongeni weweiti mine a fis won fanüfan. Nge ika aramas repwe weires le kütta wewen, resap tongeni küna. Nge ika eman mi mirit epwe apasa pwe a silei, esap pwal tongeni silei.”—Än Salomon Afalafal 8:17.
Ika pwe aramas rese tongeni aükalo feiengaw watte, iwe epwe iö a tongeni? Ewe Paipel a affata pwe ewe Chon Föratä mettoch meinisin i ewe a tongeni aükürelo. I a föri kokkotun angangfengen lefilen ekkewe man, irä, aramas me leenier, usun chök ewe kokkotun rokopwälin konik. (Än Salomon Afalafal 1:7) Kot a fokkun sokkolo seni aramas, pwe esor aükükün an we manaman. Ewe soufos Jeremaia a pwäraatä pwüngün ena pworaus ren an apasa: “Ai Kot Samol mi Lapalap! En ewe mi föri läng me fanüfan ren om manaman mi watte pwal ren poum mi pöchökül. Esap wor och mine a weires ngonuk.” (Jeremaia 32:17) Pokiten Kot i ewe a föratä fönüfan me meinisin, iwe a fen silei ifa usun epwe akkota me tümünü mettochun lon fönüfan, pwe aramas repwe nonnom fän kinamwe me nükünüköch.—Kölfel 37:11; 115:16.
Iwe, ifa usun Kot epwe ataweei ekkena mettoch? Ekkewe mettoch mi eniuokkus ra fiffis woon ei fönüfan ikenäi ina “asisilen . . . ewe fansoun sopolan.” Jises a apasa: “Lupwen oupwe küna pwe ekei mettoch repwe le fis, oupwe silei pwe Mwün Kot a arapoto.” (Mattu 24:3; Luk 21:31) Ewe Mwuun Kot, ina ewe mwuun lon läng Kot a föratä, epwe atoto watteen siwil woon fönüfan, a pwal mwo nge tongeni nemeni mwökütükütün rän, äsepwäl, mataw me met kkan. Inaamwo ika Jiowa a tongeni föri ena siwil nge a filatä an epwe ewisa ngeni Nöün we. Ewe soufos Taniel a fos usun ena emön, a apasa: “Iwe, a angei an nemenem me lingan me mwün, pwe aramasen fanü me mwü, pwal aramas mi eäni sokopaten fos repwe angang ngeni.”—Taniel 7:14.
Nöün Kot we, Jises Kraist, a fen angei ewe manaman an epwe föri meinisin ekkewe siwil woon ei fönüfan pwe epwe wiliti eü sokkun leeni mi apwapwa. Ruu ngeröü ier ra lo, lupwen Jises a nom woon ei fönüfan, a pwäraatä pwe a wor an tufich le nemeni äsepwäl me mataw. Lon eü fansoun lupwen Jises me nöün kewe chon käeö ra nom woon efoch waa lon ewe setin Kalili, “eu asepwäl mi pöchökül a enito o ekewe no ra nulong lon waar we, pwe a arap ngeni an epwe kokola.” Nöün kewe chon käeö ra fokkun niuokkus ra ekieki pwe repwele mälo, iwe ra föngüni Jises. Met Jises a föri? Jises a chök “kapas ngeni ewe äsepwäl, ‘Kopwe manasösötiu!’ A pwal üreni ekewe no, ‘Oupwe lüala.’ Iwe, ewe asepwäl a söötiu, a pwal fokun lüala won matau.” Iwe nöün kewe chon käeö ra rükö me eisfengen lefiler: “Iö chök ätei pwe asepwäl me no ra mwo nge aleasochisi?”—Mark 4:37-41.
Seni ena atun, Jises a fen feitä läng me a lapolo pöchökkülen an manaman me an nemenem. Pokiten i Kingen än Kot we Mwu, a wor wisan me tufichin le apwönüetä meinisin ekkewe siwil mi lamot ren an epwe atoto kinamwe ngeni aramas me nükünüköch woon fönüfan.
Iwe nge, sia fen küna pwe chommong osukosuk me feiengaw watte, iir efisien aramas are, a wakkattelo feiengaw pokiten föfförün tipemmongun aramas. Met ewe Mwuun Kot epwe föri ngeni chokkewe ra chök föfföringaw me rese mochen amürinnölo manauer? Ewe Paipel a kapas usun warotoon Jises “seni lang, eti noun kewe chonlang mi manaman lon pulopulen ekkei, pwe epwe liwini ngeni ir ekkewe rese sinei Kot, pwal ir ekkewe rese alleasochisi ewe kapas allim usun ach Samol Jises.” Pwüngün, i epwe “afeiengaua chokewe mi afeiengaua fanüfan.”—2 Tesalonika 1:7, 8, TF; Pwarata 11:18.
Iwe mwirin, ewe “King mi tekia seni ekewe king meinisin,” Jises Kraist, epwe unusen nemeni ekkewe mettoch lon fönüfan, ren choweän äsepwäl, püngün rän, loo me met kan. (Pwarata 19:16) I a alükülükü pwe chokkewe mi nom fän nemenien än Kot we mwu resap chüen küna riäfföü seni ekkewe feiengaw watte. Epwe äeä an manaman le aükü ekkewe mettoch fän läng pwe ewe weather me ekkewe fansoun patapat, fansoun pwichikkar, fansoun püngün rän me met kan, resap eü minen efeiengaw ngeni aramas nge epwe fen eü minen feiöch ngeniir. Iwe epwe pwönüetä än Jiowa ei pwon ngeni nöün kewe aramas: “Ngang üpwe ngenikemi üt lon fansoun öch, pwe irän ewe fanü repwe märitä o ua.” (Lifitikos 26:4) Aramas ra tongeni aüetä imw nge resap chüen niuokkus an epwe talo ren feiengaw watte: “Iwe, repwe aüetä imwer o nonom lon, repwe pwal fotuki irän wain o ochei uan.”—Aisea 65:21.
Met a Lamot Sipwe Föri?
Ese mwääl ka pwal usun chommong aramas, ka pwapwaiti ewe pworaus usun om kopwe nom lon eü fönüfan esap chüen fis feiengaw watte ie. Nge met kopwe föri ika ka mochen nom ikena ie? Pokiten “ir ekkewe rese sinei Kot, pwal ir ekkewe rese alleasochisi ewe kapas allim,” iir resap tongeni nonnom lon ewe fönü esap chüen fis feiengaw watte ie, iwe, a ffat pwe a lamot emön epwe käeö usun Kot iei me älisatä an we kokkotun nemenem woon fönüfan. Kot a mochen ach sipwe silei i me älleasochisi ewe kapas allim usun an we Mwu a fen föratä me ren Nöün we.
Än emön käeöfichi ewe Paipel, ina ewe mettoch mi fokkun lamot. Ewe Paipel a masou ren kapasen emmwen mi älisi emön pwe epwe tongeni manau lon ewe leeni mi nükünüköch fän nemenien ewe Mwuun Kot. Pwata kese tingorei Chon Pwäraatä Jiowa ar repwe äiti ngonuk met Paipel a apasa? Repwe fokkun pwapwa le älisuk. Ika ka pwapwaiti le käeö usun Kot me älleasochisi ewe kapas allim, iwe ewe wokisin lon Än Salomon Fos 1:33 epwe fokkun pwönüetä ngonuk: “Eman mi aüselingaei epwe manau fän kinamwe, esap öürek, esap pwal niueiti och feiengau.”