Eperiam, Emön Mwän mi Pworacho
Eperiam a attola an we famili me nöün kewe chon angang atun ra mmolnetä pwe repwele lo Kanaan. (Keneses 12:1-5) Atun Eperiam a nennengeni ei mwichemongun aramas mi alonga manauer woon, a fokkun mirititi wisan ngeniir. Ifa usun epwe awora met mi lamot ngeniir lon pekin aion lon eü fönü ese sissilei? Eli ena sokkun wis a fen kon mecheres me lon Ur, ewe leeni mi wöüöch, chommong masiesin, pwünüöch, me naföch konikin. Epwe ifa ika a samau are mälo lon ena mineföön leeni? Iö epwe tümünü an we famili? Inaamwo ika eli Eperiam a eäni ekkena esin lolilen, nge ese mut ngeni an niuokkus epwe eppeti an esap föri met Kot a ereni. A üppos le föri me älleasochisi minne Kot a allük ngeni, ese lifilifil met epwe fis. Ina esissillen än emön pworacho.
MET WEWEEN PWORACHO? Pworacho ina eü napanap mi wewe ngeni än emön epwe pöchökkül me tipepwora nge esap emön mi niuekken are nisässäü. Esap itä weween pwe ika sia pworacho, iwe, sisap meefi niuokkus. Nge, emön mi wor an pwora me ren Kot, a anganga an pwora inaamwo ika a niuokkus.
IFA USUN EPERIAM A PWÄRI AN PWORACHO? Eperiam a tipemecheres le föri met Kot a ereni, inaamwo ika chon orun kewe meinisin ra sokko seni. Ese niuokkus an epwe ina usun. Eperiam a määritä lon eü leeni, ikewe ie aramas ra feffel ngeni sokkopaten kot me ululun. A föri minne a silei pwe mi pwüng nge ese niuokkus ren met aramas repwe ekieki usun i. Eperiam a pworacho le asokkaalo manauan ren an filatä le fel ngeni Jiowa, ewe emön chök Kot “mi Unusen Tekia.”—Keneses 14:21, 22.
Eperiam a akkomwa an fel ngeni ewe Kot mi enlet lap seni an akkomwa mettochun aion. A tipemecheres le likitalo manauan mi kinamwe lon Ur me feilo ngeni ewe fönüpöön. A unusen lükülük pwe Jiowa epwe awora minne mi lamot ngeni lon pekin aion. Ewer, atun a feffeilo ekkewe ier, eli Eperiam epwe ekieki usun nonnomöchün lon Ur. Nge Eperiam a lükülük pwe Jiowa epwe akkawora met mi lamot ngeni me an we famili. An pacheöch ngeni Jiowa, ewe Emön mi wesewesen aüchea lon manauan, a älisi an epwe pworacho le älleasochisi än Kot kewe allük.
IKKEFA EKKEWE LESEN FÄN ITACH? Sia tongeni äppirü Eperiam ren ach ämääraatä ach pwora le älleasochisi Jiowa inaamwo ika aramas rese föri ena. Äwewe chök, ewe Paipel a äiti ngenikich pwe chokkewe mi üppos lon ar lükü Jiowa Kot repwe küna riäfföü, eli seni chiechier kewe are aramaser kewe. (Jon 15:20) Iwe nge, atun sia lükülük usun met sia fen käeö usun Jiowa, sia nüküchar me äweweei ach lükü fän fäiro.—1 Piter 3:15.
Sia pwal tongeni lükülük woon än Kot pwon pwe epwe awora minne mi lamot ngeni chokkewe mi anomu ar lükülük woon i. Ena sokkun lükülük a ngenikich pwora le alonga manauach woon ekkewe mettochun lükü lap seni ach aüreki mettochun aion. (Mattu 6:33) Nengeni ifa usun eü famili ra föri ena.
Inaamwo ika a wor rüüemön nöün Taak me Becky kükkün ät, nge ra mochen mwöküt ngeni eü leeni, ikewe ie mi osupwangen chon afalafala ewe kapas allim seni Paipel. Mwirin ar küttafichi pworaus usun ar kefil me tinikken le iotek, ra filatä le föraalo chök ar kewe kokkot. Iei alon Taak: “A lamot aupwe pwora le ammolnatä nöüm kewe me mwöküt, ause mwo nge silei met epwe wesewesen fis ngenikem. Nge, atun aua chök kerän ekieki usun am aupwe mwöküt, aua pworausfengen usun än Eperiam me Sara leenien äppirü. Äm ekieki usun ar lükülük woon Jiowa me usun an ese likitiirelo, a fokkun älisikem.”
Iei met Taak a erä usun nonnomur lon ewe fönüen ekis: “A fen amwarar feiöchüm.” A pwal äweweei: “Pokiten a mecheres manauem, iwe, a watte am fansoun me am famili le afalafal, fosfengen lefilem, me urumwot fengen me nöüm kewe ät. Ause tongeni äweweei kinamween manauem iei.”
Ewer, esap weween pwe meinisin repwe pwal eäni ena sokkun kefil mi lap. Nge, kich meinisin sia tongeni äppirü Eperiam ren ach akkomwa ach fel ngeni Kot, me lükülük pwe epwe älisikich. Atun sia föri ena, sia apwönüetä än Paipel kapasen pesepes le pworacho me apasa, “Ewe Samol ai chon alisi, usap fakkun niuokus.”—Ipru 13:5, 6, TF.