Oupwe Wesewesen Omusomusfengen

“Oupwe songomangfengen o amusamusfengen.”​—KOL. 3:13.

IFA USUN KOPWE PÉLÚWENI?

Pwata a lamot ach sipwe omusaaló tipis?

Menni kapas áwewe Jesus a eáni mi pwáraatá lamoten ach sipwe omusaaló tipis?

Ikkefa ekkewe feiéch sipwe kúna ika sia omusaaló tipisin aramas?

1, 2. Pwata a lamot óm kopwe etittina ika ka tipemecheres le omusaaló tipisin aramas?

EWE Paipel a álisikich le silei meefien Jiowa usun tipis me met a kan féri lupwen sia tipis. A pwal áiti ngenikich pwe a tipemecheres le omusaaló ach tipis. Lón ewe lesen mwen ei, sia káé ewe popun Jiowa a omusaaló tipisin Tafit me Manasa. Ra fókkun niamam ren met ra féri, iwe, ra pwár ngeni Jiowa ar tipis, me ra tipeppós pwe resap fférsefáli. Ra enletin aier, iwe, Jiowa a etiwasefáliir fán an we chen.

² Iei sipwe etittina pwisin kich ren ach tipemecheres le omusaaló tipisin aramas. Itá epwe ifa meefiom ika emén aramasom a máló pokiten Manasa? Ka tongeni omusaaló tipisin Manasa? Lón ei fansoun, sia nóm lón ei ótót mi ngaw mi ur ren féfférún akkachofesá me aramas mi ekieki chék pwisin iir. Pwata a lamot sipwe achocho le tipemecheres le omusaaló tipisin aramas? Ika emén a kirikiringaw ngonuk, met epwe álisuk le nemenifichi meefiom, eáni féffér mi tipeeú ngeni letipen Jiowa, me tipemecheres le omusaaló an tipis?

LAMOTEN ACH SIPWE OMUSAALÓ TIPIS

3-5. (a) Menni kapas áwewe Jesus a eáni mi menlapei lamoten ach sipwe omusaaló tipisin aramas? (b) Ifa ewe lesen sia tongeni káé seni án Jesus we kapas áwewe lón Mateus 18:21-35?

³ A lamot sipwe tipemecheres le omusaaló tipisin chókkewe mi asongakich, ese lifilifil ika iir Chón Kraist are esap. Ena mettóch epwe álisikich le akkamwéchú kinamwe lefilach me chón ach famili, chiechiach, aramas meinisin, me Jiowa. Ewe Paipel a áiti ngenikich pwe mi lamot Chón Kraist meinisin repwe omusaaló tipisin aramas ese pwal lifilifil ika fán fite ra tipis ngeniir. Jesus a eáni eú kapas áwewe usun emén chón angang mi wor an watteen liwinimmang pwe epwe menlapei lamoten omusaaló tipisin aramas.

⁴ A fókkun watte án ena chón angang liwinimmang ngeni néún we masta. Ren an epwe unusen omusa, a lamot epwe angang 60 million rán! Iwe nge ewe masta a chék likitaló án átena we liwinimmang. Mwirin, ena chón angang a kúna pwal chienan we mi wor an liwinimmang ngeni, me a ouwesi an epwe omusa ngeni, nge úkúkún an liwinimmang mi chék tongeni anganga ren 100 rán. Ewe chón liwinimmang a tingormaú ngeni átena an epwe mosonottam ngeni. Nge i a fen song, me a aturalong chienan na lón kalapus. Ena mettóch a fókkun asonga ewe masta, iwe, a ereni: “Pwota kosap eäni ümöümöch ngeni chiechiom we chon angang, usun chök ngang üa eäni ümöümöch ngonuk?” Iwe, ena masta a oturalong ewe chón angang lón kalapus tori an epwe ménatiw unusen an we liwinimmang.​—Mat. 18:21-34.

⁵ Ifa ewe lesen Jesus a mochen sipwe káé seni ei pwóróus? A áweweei pwe Jiowa esap omusaaló tipisich ika sise enletin omusaaló tipisin ekkewe ekkóch. (Mat. 18:35) Kich sise unuséch me sia tipis fán chómmóng. Ese fókkun tufich ach sipwe unusen álleasochisi Jiowa. Nge a tipemecheres le omusaaló me unusen télúoló ach tipis. Iwe, ika sia mochen chiechiéch ngeni Jiowa, a lamot sipwe omusaaló tipisin ekkewe ekkóch. Ina met Jesus a apasa lón an we Afalafal wóón ewe Chuuk: “Are oupwe amusala än aramas tipis, Sememi mi nom läng epwe pwal amusala ämi tipis. Nge are ousap amusala än ekewe aramas tipis, Sememi mi nom läng esap pwal amusala ämi tipis.”​—Mat. 6:14, 15.

6. Pwata ese mecheres ach sipwe omusaaló tipisin aramas fansoun meinisin?

⁶ Neman ka tipeeú ngeni pwe mi lamot sipwe omusaaló tipisin ekkewe ekkóch, nge ka pwal meefi pwe ese mecheres ngonuk fansoun meinisin. Popun, pún lupwen emén a tipis ngenikich, fán chómmóng a fókkun kkúú meefiach. Sia tongeni meefi lingeringer, lichippúng pwe usun emén a rawangawakich, mochen ewe chón tipis epwe kúna kapwúng, are sia fen mochen liwiningaw ngeni minne mi ngaw. Iwe sia tongeni meefi pwe sise fókkun tongeni omusaaló tipisin ewe chón tipis ngenikich. Ika a ina usun meefiom, met kopwe féri pwe kopwe tongeni tipemecheres le omusaaló tipis, usun met Jiowa a kútta senikich?

WEWEFICHITI PWISIN MEEFIOM

7, 8. Met a tongeni álisuk óm kopwe omusaaló tipisin emén mi kirikiringaw ngonuk?

⁷ A tongeni watte ach song lupwen emén a kirikiringaw ngenikich, are fen meefi pwe a kirikiringaw. Emén alúwél a apwóróusa met a fis lupwen a fókkun song. A apasa, ‘Fán eú, ua towu seni imwei fán ai song, me ua erá pwe usap fókkun chúen liwin. A wesewesen rániéch, me ua fetál wóón ewe al mi ling. Kinamween me lingéchún ena leeni a amasésélói ai song. Mwirin, ua liwiniti leimw, me ua meefi niamam pwe a kon watte ai song.’ Ika ka mut ngeni och fansoun pwe epwe maséséló óm song, a tongeni ffatoló óm ekiek ren met a fis me mwen óm kesaamwo féri och mettóch kopwe niamam ren mwirin.​—Kölf. 4:4; SalF. 14:29; Jas. 1:19, 20.

⁸ Nge met kopwe féri ika ka chúen meefi song? Iwe, ekieki ewe popun ka song. Ka song pokiten ese pwúng met a fis ngonuk? Are pokiten emén ese súfélituk? Are ka meefi pwe ewe emén a wesewesen mochen eletipengawók? Mi wesewesen ngaw met a féri? Ika ka sótun weweiti ewe popun ka song, iwe, ka tongeni ekieki menni kapasen emmwen seni Paipel epwe tongeni álisuk le siwili meefiom. Iwe, ka tongeni eáni ekkewe féffér Kot epwe pwapwa ren. (Álleani Än Salomon Fos 15:28; 17:27.) Lupwen ka ekiekifichi met a wesewesen fis nge sap chék meefiom, iwe, neman epwe ekis mecheres óm kopwe omusaaló tipis. Inaamwo ika a weires óm kopwe féri ena, nge ewe Paipel a tongeni álisuk le weweiti wesewesen meefiom usun met a fis me áppirúfichi án Jiowa tipemecheres le omusaaló tipis.​—Ipr. 4:12.

ITÁ KOPWE MEEFI SONG?

9, 10. (a) Met eli sia tongeni féri ika sia song ren emén? (b) Óm achocho le eáni ekiek pwúng me tipemecheres le omusaaló tipisin aramas epwe atoto ngonuk met?

⁹ Mi wor chómmóng mettóch mi tongeni asonga emén. Áwewe chék, atun óm sá wóón tarakú, chippú efóch tarakú epwe pureiok. Met kopwe féri? Ekkóch aramas repwe fókkun song me fiu ngeni ewe chón uwei ewe tarakú. Nge pokiten en emén Chón Kraist, iwe, kosap mochen féri ena.

¹⁰ Epwe fen éch ika emén epwe akkomw ekieki minne a fis. Neman och mettóch a arukokoló, iwe, ka mwáálliló lón óm únteng. Are eli a osukosuk waan ewe emén chón únteng. A tongeni kúkkúnúló ach song ren ewe emén ika sipwe achocho le weweiti ewe popun a mwáálliló, mirititi pwe eli sise tongeni silei meinisin popun a fis ewe osukosuk, me tipemecheres le omusaaló tipisin. Än Salomon Afalafal 7:9 a apasa: “Kosap songokai, pun song a nom lon letipen chon umwes.” Fán chómmóng sia ekieki pwe emén a féri och mettóch pwe epwe asonga kich. Nge sisap mwittir song. Pún eli a chék mwáálliló pokiten i ese unuséch, are eli sia chék wewengaweiti met a wesewesen fis. Iwe, kopwe chechchemeni pwe kese tongeni unusen silei ewe popun emén a apasa are féri och mettóch. Kopwe tipemecheres le pwáraatá tong me omusaaló tipisin. Epwe fen watte óm pwapwa ika ka ina usun.​—Álleani 1 Petrus 4:8.

ÓM KINAMWE EPWE LIWINSEFÁLITUK

11. Met sipwe akkamwéchú lón letipach ese lifilifil féfférún aramas ngenikich atun sia fiti ewe angangen afalafal?

¹¹ Ifa usun kopwe nemenifichi meefiom ika emén a súfélúngaweituk lupwen ka fiti ewe angangen afalafal? Lupwen Jesus a tiinaaló ekkewe 70a chón afalafal, a éúréúrer ar repwe ereni ekkewe chón imw: “Kinamwe epwe tori chon ei imw.” A pwal apasa: “Are eman aramas mi efich kinamwe a nom ikenan, ämi kinamwe epwe nonom won. Nge are eman esap efich kinamwe, ämi tüngorun kinamwe epwe liwinsefälitikemi.” (Luk. 10:1, 5, 6) Lupwen aramas ra etiwa ewe kapas allim sia afalafala, sia pwapwa pún repwele kúna feiéch ren. Nge fán ekkóch, ra fókkun oput. Iwe, met sipwe féri? Jesus a erá pwe sipwe chúen kinamwe. Sipwe tongeni ló seniir fán ach kinamwe, ese pwal lifilifil met féfférúr ngenikich. Ika sia song ngeni ewe chón imw ren an kirikiringaw ngenikich, iwe, sisap chúen akkamwéchú ewe kinamwe Jesus a fós usun.

12. Epwe ifa féfférúch me ren alon Paulus lón Efisos 4:31, 32?

¹² Kopwe achocho le akkamwéchú kinamwe fansoun meinisin, nge esap chék lón ewe angangen afalafal. Óm tipemecheres le omusaaló tipisin ekkewe ekkóch esap weween pwe ka tipeeú ngeni ewe féffér mi ngaw are tunaló ewe riáfféú a fis seni. Nge a wewe ngeni óm kopwe likitaló óm song ren ar féffér mi ngaw me achocho le akkamwéchú óm kinamwe. Ekkóch ra chék ekkekieki ewe mettóch mi ngaw a fis ngeniir, iwe, esor ar kinamwe. Kosap mut ngeni song an epwe nemenukóló. Kosap tongeni enletin pwapwa ika ka akkamwéchú óm song. Iwe, kopwe tipemecheres le omusaaló tipis!​—Álleani Efisos 4:31, 32.

EÁNI FÉFFÉR MI APWAPWAAI JIOWA

13. (a) Ifa usun emén Chón Kraist epwe ‘ioni mochen ekkei won mokuren’ chón oputa? (b) Met epwe tongeni fis ika sia mosonottam ngeni emén mi kirikiringaw ngenikich?

¹³ Neman a wor eú fansoun ka meefi pwe ka tongeni álisi emén mi kirikiringaw ngonuk an epwe pwapwaiti ekkewe pwóróus lón Paipel. Ewe aposel Paulus a makkeei: “Are chon oput en a echik, kopwe amongou i; are a kaka, kopwe aunu; pun are kopwe fori iei usun, kopwe ioni mochen ekkei won mokuran. Kosap kuf ren ar fofor ingau; nge kopwe pworacho ngeni ar ingau ren om fofor murinno.” (Rom 12:20, 21, TF) Lupwen ka pwáraatá súfél pwal mwo nge atun aramas ra song ngonuk, eli repwe siwil me kirekiréch ngonuk. Ika ka pwáraatá tong me weweiti meefier, iwe, eli epwe amwékútúúr le alapaaló ar silei ewe Paipel. Ese lifilifil féfférúr ngonuk, nge pokiten óm mosonottam me kirekiréch, eli repwe ekieki ewe popun ka sókkóló seni ekkewe ekkóch.​—1 Pet. 2:12; 3:16.

14. Met popun kopwe tipemecheres le omusaaló tipisin emén, inaamwo ika a fókkun kirikiringaw ngonuk?

¹⁴ A wor ekkóch aramas ese fich ach sipwe chiechi ngeniir. Áwewe chék ren ekkewe mi katowu seni ewe mwichefel, iir kewe ra féri tipis mi chou nge rese aier. Ika emén leir a fen eletipengawók, eli epwe fókkun weires óm kopwe omusaaló tipisin. Ikaamwo a aier, nge eli epwe chúen metek letipom ren met a féri. Ika ina, kopwe tittingorei Jiowa an epwe álisuk pwe kopwe tipemecheres le omusaaló tipisin. Mi lamot kopwe féri ena pún kese tongeni wesewesen silei ekiekin me meefien eménna. Nge Jiowa mi silei. A silei monomonun letipen emén me emén, me a mosonottam ngeni ekkewe mi tipis. (Kölf. 7:9; SalF. 17:3) Ina popun ewe Paipel a apasa: “Are eman a föri mi ngau ngenikemi, ousap liwini ngeni lon föför mi ngau. Oupwe achocho le föri mine a öch ngeni aramas meinisin. Oupwe föri mine oupwe kinamwefengen me aramas meinisin ren ükükün ämi tongeni. Ämi pwii kana, ousap liwini ngeni eman chappen an föför, nge oupwe mwüt ngeni Kot epwe föri. Pun a mak lon ewe Toropwe mi Pin, ‘Ngang üpwe ngeniir chappen ar föför, üpwe liwini ngeniir ükükün liwinin ar föför mi ngau, iei alon ewe Samol.’” (Rom 12:17-19) Sise tongeni silei mettóch meinisin Jiowa a silei, me ewe Paipel a erenikich ach sisap apwúngú aramas. (Mat. 7:1, 2) Nge kopwe lúkúlúk pwe án Jiowa kapwúng mi chék pwúng.

15. Met epwe akúkkúnatiw ach song ngeni ekkewe mi kirikiringaw ngenikich?

¹⁵ Ika a weires óm kopwe omusaaló tipisin emén a kirikiringaw ngonuk nge a fen aier, a éch óm kopwe chechchemeni pwe pwal i a nóm fán weiresin pwúnúngawen tipis usun chék kich. (Rom 3:23) Jiowa a tongei aramas meinisin pún meinisin kich sise unuséch. Iwe, sipwe iótek fán iten ewe emén mi eletipengawa kich, pún ach féri ena epwe akúkkúnatiw ach song ngeni. Jesus a affata pwe sisap akkamwéchú ach song ngeni aramas, pwal mwo nge ika ra kirikiringaw ngenikich. A erá: “Oupwe echeni chon oputakemi o iotek fän iten chokewe mi ariaföüükemi.”​—Mat. 5:44.

16, 17. Met kopwe féri lupwen ekkewe elter ra apwúngaló pwe emén chón tipis a aiersefál, iwe, pwata?

¹⁶ Jiowa a ewisa ngeni ekkewe elter ar repwe apwúngaló ika emén mi féri tipis watte a aier. Iir rese silei meinisin met Kot a silei, nge ra achocho pwe minne repwe apwúngaló fán álillisin án Kot we manaman epwe tipeeú ngeni Paipel. Iwe, lupwen ra tingorei Jiowa an epwe álisiir le apwúngaló och mettóch, sia tongeni lúkúlúk pwe minne a pwúngúló a tipeeú ngeni ekiekin Jiowa.​—Mat. 18:18; Joh. 20:23.

¹⁷ Lón ena mettóch, a lamot sipwe tuppwél. Sipwe lúkúlúk wóón napanapen án Jiowa ataweei osukosuk me etiwa minne ekkewe elter ra apwúngaló. Ika ekkewe elter ra apwúngaló pwe emén a aier, ka omusaaló tipisin me pwáraatá pwe ka chúen tongei? (2 Kor. 2:5-8) Eli esap mecheres ei mettóch, ákkáeúin ika ewe chón tipis a tipis ngonuk are ngeni aramasom. Nge ika ka lúkúlúkú Jiowa me napanapen an ataweei osukosuk lón ewe mwichefel, kopwe aleni ewe al mi pwúng. Kopwe pwári pwe ka wesewesen omusaaló tipisin aramas.​—SalF. 3:5, 6.

18. Met sókkun feiéch ka tongeni kúna ika ka tipemecheres le omusaaló tipisin aramas?

¹⁸ Ika sise tipemecheres le omusaaló tipisin aramas, iwe, a tongeni esemwenikich me chounikichetiw me epwe áweiresi ach sipwe chiechi ngeni aramas. Nge ika sia tipemecheres le omusaaló tipis epwe torikich chómmóng feiéch. A tongeni angasakicheló seni ewe song mi nóm lón letipach me ach letipengaw me álisikich ach sipwe ririéch ngeni aramas. Nge ewe feiéch mi kon múrinné seni meinisin, ina ach sipwe ririéch ngeni Semach we lón láng, Jiowa.​—Álleani Kolose 3:12-14.

[Sasing lon pekin taropwe 29]

Ifa ewe lesen lón án Jesus ei kapas áwewe?

[Sasing lon pekin taropwe 32]

Wisen Chón Kraist ar repwe omusaaló tipisin aramas