A Itá Wor eú Lamalam Sia Tongeni Lúkúlúk Wóón?

Ika eú lamalam a fen elichippúnguk, iwe, neman epwele weires óm kopwe lúkúlúk wóón lamalam meinisin. Nge a wesewesen wor eú lamalam mi fich óm kopwe lúkúlúk wóón. Atun Jesus a nónnóm wóón fénúfan a emwichafengenni eú mwichen aramas mi tuppwél chón tapweló mwirin me a áiti ngeniir ar repwe manaweni manawer me ren án Kot kewe kapasen emmwen. Mi chúen wor chókkewe mi enletin tapweló mwirin Kraist, ekkewe mi túmúnúéchú le manaweni manawer me ren án Chón Kraist kewe kapasen emmwen. Ia ka tongeni kúna me ie ekkeei sókkun aramas?

Estelle, ewe sia pwóróus usun lón ewe lesen mwan, a apasa: “Ua kerán poputá le silei masouen ewe Paipel atun ua poputá le káé ren Chón Pwáraatá Jiowa. Mwirin ekis fansoun ua weweiti Johannes 8:32, ewe a apasa: ‘Oupwe silei ewe let, nge ewe let epwe angasakemi.’”

Ray, ewe sia pwal pwóróus usun me mwan, a apasa: “Ren ai kákkáé Paipel ren Chón Pwáraatá Jiowa, ua silei pwe esap efisien Kot ekkewe riáfféú mi tottori aramas. Ua fókkun kilisou ren ai silei pwe a wor popun mi múrinné Kot a mut ngeni minne mi ngaw an epwe fiffis iei, pwal an pwonei pwe ekiseló chék epwe áwesaaló.”

Pwúngún, a weires ach sipwe féri minne mi pwúng lón ei fénúfan mi ur ren féffér mi ngaw, a usun chék weiresin án emén émmún lón eú éút mi péchékkúl. Nge sia tongeni féri minne mi pwúng. Chómmóng aramas ra mochen emén epwe álisiir le weweiti me apwénúetá masouen ewe Paipel. Ina minne Chón Pwáraatá Jiowa ra kan káé Paipel ngeni fite million aramas wóón unusen fénúfan nge ese kamé. Iteiten wiik, chómmóng ra kákkáé met ewe Paipel a wesewesen apasa. Iwe, ra akkarap ngeni ewe Chón Fératá, me ra manaweni ewe sókkun manaw mi alapaaló ar pwapwa.a

Ika ka chuuri Chón Pwáraatá Jiowa, pwata kese mwo eisiniir ika pwata ra lúkúlúk wóón ar lamalam? Etittina minne ra eáni asukul me pwóróuseer. Mwirin, pwisin filatá ika a wor eú lamalam ka tongeni lúkúlúk wóón.