Án Paipel Kewe Kapas Eis Ra Pélú
Ifa usun sia kúna feiéch seni án Jesus máló?
Lupwen Kot a fératá aramas, a tipeni ar repwe manaw wóón fénúfan tori feilfeiló chék nge resap riáfféú, samau are máló. Iwe nge, ewe áeménún mwán, Atam, a álleasolap ngeni ewe Chón Fératá me a péút seni ewe ápilúkúlúkún manaw esemuch. Pokiten kich mwirimwirin Atam, iwe sia álemwiri máló. (Rom 5:8, 12; 6:23) Jiowa, ewe Kot mi enlet a tiinaato Néún we Jesus ngeni fénúfan pwe epwe máló me méénisefáli met a péút seni Atam.—Álleani Johannes 3:16.
Jesus a máló pwe aramas repwe kúna manaw esemuch. Ka tongeni anchangei ena esin manaw esemuch wóón fénúfan?
Án Jesus máló a suuki ngenikich alen an epwe musoló ach tipis me ach sipwe eáni ewe sókkun manaw esap tongeni much. Ewe Paipel a álisikich ach sipwe anchangei napanapen manawach wóón fénúfan lón ewe atun sisap chúen chinnap, samau me máló.—Álleani Aisea 25:8; 33:24; Pwärätä 21:4, 5.
Ifa usun sipwe chechchemeni án Jesus we máló?
Lón ewe pwinin mwen án Jesus epwele máló, a ereni néún kewe chón káé pwe repwe chechchemeni an we máló ren ar repwe féri áchechchemenian lón eú kókkót ese eingeing. Ach chechchemeni Jesus lón ena napanap iteiten ier a atufichikich le ekilonei úkúkún watteen án Jesus me Jiowa tongei aramas.—Álleani Lukas 22:19, 20; 1 Johannes 4:9, 10.
Lón ei ier, Áchechchemenien án Jesus we máló a sereni Sárinfál, April 14, mwirin tuputiwen ewe akkar. Ka ketiw le fiti ewe Áchechchem ren Chón Pwáraatá Jiowa lón leeniom we.—Álleani Rom 1:11, 12.