ÁN PAIPEL KEWE KAPAS EIS RA PÉLÚ

Pwata sipwe chechchemeni án Jesus we máló?

Me lein ekkewe mettóch mi fis lón uruwoon aramas, ewe mi lamot seniir meinisin ina án Jesus máló. A máló pwe epwe eliwinisefáli manawen aramas ngeni met manawer me lepoputáán. Aramas rese fférútá pwe epwe nóm rer ewe mochen le féfféri minne mi ngaw, semmwen, are máló. (Keneses 1:31) Nge tipis a tolong lón fénúfan ren ewe áeménún mwán, Atam. Jesus a fangóló manawan pwe epwe angasakicheló seni tipis me máló.​—Álleani Mateus 20:28; Rom 6:23.

Kot a pwáraatá watteen an tong ren an tiinaato Néún we ngeni fénúfan pwe epwe máló fán itach. (1 Johannes 4:9, 10) Jesus a ereni néún kewe chón káé ar repwe chechchemeni an we máló ren ar repwe féri eú kókkótun áchechchem esap tokorárá me repwe áeá pilawa me wain. Ach féri ena áchechchem iteiten ier, ina eú alen ach pwáraawu ach aúcheani ewe tong Kot me Jesus ra pwári fán itach.​—Álleani Lukas 22:19, 20.

Itá ié epwe mwéngé ewe pilawa me ún ewe wain?

Lón ewe áeúin atun Jesus a ereni néún kewe chón káé ar repwe chechchemeni an we máló, i a fós usun eú pwonen etipeeú. (Mateus 26:26-28) A suuki ngeniir me eú mwich mi kisikis, ewe ápilúkúlúk ar repwe fiti lón ewe wis king me souasor lón láng. Inaamwo ika a wor fite million aramas ra fiti áchechchemenien án Jesus máló, nge chókkewe chék mi nóm lón ena pwonen etipeeú repwe mwéngé ewe pilawa me ún ewe wain.​—Álleani Pwärätä 5:10.

Ren arapakkan 2,000 ier, Jiowa a fiffilatá ié kewe repwe king. (Lukas 12:32) Iir mi chék chókisikis ika sipwe apépéfengeniir me ekkewe repwe manaw tori feilfeiló wóón fénúfan.​—Álleani Pwärätä 7:4, 9, 17.