Ifa Usun Sipwe Eáni Eú Manaw Mi Múrinné Seni Manawach Iei?
NAPANAPEN manawen aramas iei, esap ina met Kot a mochen fán iter. Itá ei fénúfan epwe uren chókkewe mi mochen nóm fán nemenien ewe Chón Fératá, chókkewe mi mochen feiéch seni an emmwen, me iir kewe mi áppirú an tong me napanapan kewe mi múrinné. Itá repwe tipeeúfengen me ekkewe ekkóch fán pwapwa atun ra ámááraatá ar famili, káé ekkewe minefé mettóch me angangfengen pwe unusen ei fénúfan epwe wiliti eú paratis.
KOT A PWONEI PWE EPWE SIWILI MANAW WÓÓN FÉNÚFAN NGENI MET A TIPENI SENI ME LEPOPUTÁÁN
“A aükätiu maun won unusen fanüfan.”—Kölfel 46:9.
“A war ewe fansoun om kopwe afeiengaua chokewe mi afeiengaua fanüfan.”—Pwärätä 11:18.
“Esap wor eman chon ewe fanü epwe apasa pwe a samau.”—Aisea 33:24.
“Nei chon fil repwe pwapwaiti feiöchün angangen pöür fansoun langatam.”—Aisea 65:22.
Ifa usun ekkena oesini repwe pwénútá? Kot a seikaatá Néún we Jesus pwe Kingen eú mwú mi unuséch epwe nemeni fénúfan seni láng. Ewe Paipel a eita ngeni Mwúún Kot. (Taniel 2:44) Iei met Paipel a erá usun Jesus: ‘Kot, ewe Samol epwe amota won lenien motun king . . . I epwe nemenem.’—Lukas 1:32, 33.
Atun Jesus a nóm wóón fénúfan, a féri chómmóng manaman mi pwári pwe an nemenem epwe émúrinnéló manawen aramas seni ewe manaw sia eáni iei.
JESUS A PWÁRI IFA USUN EPWE EFEIÉCHÚ CHÓKKEWE MI ÁLLEASOCHIS
An echikara sókkun samau meinisin a pwári ifa usun epwe áwesi meinisin án aramas kewe apwangapwang.—Mateus 9:35.
An élúwalóói ewe mataw a pwári ifa usun epwe túmúnú aramas ren an tufichin nemeni masouen fénúfan.—Markus 4:36-39.
An amwéngééni fitengeréú aramas, a pwári pwe epwe ataweei osupwangen aramas.—Markus 6:41-44.
An ewili konik ngeni wain atun eú apwúpwúlú, a pwári pwe epwe álisi aramas le pwapwaiti manawer.—Johannes 2:7-11.
Ifa usun kopwe tongeni eáni ena esin manaw Kot a mochen fán iten chókkewe mi tongei i? A wor efóch “al” a lamot kopwe aleni. Ewe Paipel a áweweei pwe ina ewe “al mi ale ngeni manau esemuch. Mi wor ekoch chök aramas mi fetal won ei al ngeni manau.”—Mateus 7:14.
KÚTTA EWE AL MI EMMWEN NGENI MANAW MI MÚRINNÉ SENI MANAWACH IEI
Ifa ewe al ngeni manaw esemuch? Kot a erá: “Ngang ewe Samol mi Lapalap om we Kot. Üa aiti ngonuk mine kopwe feiöch ren, üa pwal emweni ngonuk ewe al kopwe fetal won.” (Aisea 48:17) Ika kopwe apwénúetá ena kapasen emmwen, manawom epwe échúló.
Jesus a erá: “Ngang ewe al me ewe let me ewe manau.” (Johannes 14:6) Ika sia féri minne Jesus a erá me áppirú an leenien áppirú sipwe ririéch ngeni Kot me manawach epwe échúló.
Ifa usun kopwe tongeni kúna ena al ngeni manaw esemuch? A wor chómmóng lamalam, nge Jesus a éúréúrakich: “Esap aramas meinisin mi aita ngeniei ‘Samol, Samol’ repwe tolong lon Mwün Läng, nge chokewe chök mi föri letipen Semei lon läng.” (Mateus 7:21) A pwal erá: “Oupwe silleniir ren mine ra föri.” (Mateus 7:16) Ewe Paipel a tongeni álisuk le esilla ifa ewe lamalam mi enlet.—Johannes 17:17.
Ifa usun kopwe tongeni poputá le fetál wóón ewe al ngeni manaw esemuch? A lamot kopwe káé usun ewe emén mi fang manaw ngeni meinisin. Ién na? Ifa itan? Ikkefa napanapan kewe? Met a féri fán itach? Met a mochen sipwe féri?a
Kot a mochen pwe sipwe féri eú mettóch mi amwarar lap seni ach chék akkangang, mwéngé, kunou, me túmúnú ach famili. Sia tongeni alapaaló ach silei usun ewe Chón Férikich me wiliti chiechian. Sia tongeni pwári ach tongei ren ach féri letipan. Jesus a erá: “Iei manau esemüch: Ar repwe silei en, ewe eman chök Kot mi let.”—Johannes 17:3.
SENI EWE PAIPEL, KOT A ÁITI NGONUK MINNE KOPWE PWISIN “FEIÖCH REN.”—AISEA 48:17
POPUTÁÁN ÓM KERÁN SILEI KOT
Atun sia silei met Kot a mochen ach sipwe féri, eli epwe lamot ach sipwe féri siwil. A tongeni weires ena. Nge a wewe ngeni pwe manawach epwe múrinnéló atun sia poputá le feffetál wóón ewe al ngeni manaw esemuch. Ren óm kopwe kúna pélúwen óm kewe kapas eis usun Kot, Chón Pwáraatá Jiowa ra tongeni káé ngonuk Paipel lón ewe kulók me leeni ka mochen nge ese kamé. Ka tongeni tingor ena ren óm tétá wóón ar we website www.pr418.com.