En Mi Atekiatäi Än Kot we Kapas?
1 Lon eü fönüfan mi kan alamotongaüa aüchean ewe Paipel, ekkewe chon Kraist mi enlet ra chofo le atekiatäi än Kot we kapas. Pokiten sia lükü pwe “ekkewe puk meinisin ra pop seni Ngunun Kot,” sia tipeeü ngeni Jises lupwen a apasa lon an we iotek ngeni Jiowa: “Om kapas mi enlet.” (2 Tim. 3:16; Jon 17:17) Ifa ussun sipwe tongeni atekiatäi än Kot we kapas?
2 Käeö Ewe Paipel: Jises a fokkun tinikken lon an käeö än Kot we kapas. Ina minne, a atufichi i le afalafal seni ekkewe Taropwe mi Pin lon unusen an we angangen afalafal. (Luk 4:16-21; 24:44-46) Ifa ussun sipwe achommongalo ekkewe wokisin sia isois lon mökürach? Sia tongeni föri ena ren ach äkkälleäni Paipel iteiten rän me ekkekiek woon eü wokisin mi apöchökkülakich are älisikich lon ach angangen afalafal. Lon ach ammolnatä fän iten ekkewe mwich, sipwe nengeni me älleäni seni nöüch Paipel ekkewe wokisin mi mak lon me sipwe ammolnatä ach memmeef woor. Atun mwich, sipwe fiti an ewe chon afalafal älleäni ekkewe wokisin lupwen a älleäniir. Ach sileifichi ekkewe wokisin epwe ammolnakichetä le ‘forfichi lon ach anganga ewe kapas mi enlet.’—2 Tim. 2:15.
3 Mut Ngeni ewe Paipel Epwe Pwisin Fos: Atun sia kan afalafal, sipwe mut ngeni ewe Paipel an epwe pwisin fos. Awewe chök, ika mei tufich, sipwe älleäni eü wokisin ngeni ewe chon imw. Ika a kapas eis are a apasa och minen eppet, a mürinnö ach sipwe chök nöünöü ewe Paipel le pölüeni. Ika ewe chon imw a osukosuk, sia tongeni chök menlapei och pworaus seni Paipel ren ach apasa, “Me mwen ai upwe feilo, ua chök tongeni älleäni ngonuk eü wokisin?” Ika mei tufich, kopwe chök älleä seni ewe Paipel, me mut ngeni ewe chon aüseling an epwe pwisin küna ewe wokisin.
4 Lupwen emön chon imw a älleäni ekkewe wokisin mi affata mwäällin ewe Trinitas, a apasa, “Ua fen fiffiti fel unusen manauei, nge use silei pwe ewe Paipel a kapas ussun ei mettoch!” Mwittir chök a etiwa eü käeöön Paipel. Jises a apasa pwe nöün we siip epwe aüselinga leüwan. (Jon 10:16, 27) Ewe äkkäeüin mettoch epwe älisi ekkewe mi letipwenechar ar repwe esinna ewe enlet, ina ar pwisin älleäni ewe enlet seni Paipel. Ina popun, sipwe fokkun atekiatäi än Kot we kapas mi enlet!