Achchüngü Letipen Aramas lon Om Asukul
1. Met a kapachelong lon ach nöünöüöchü ewe Paipel lon ewe angangen afalafal?
1 Usun chök ewe aposel Paul, ekkewe chon afalafal mi lipwäköch ra weweiti pwe ar “afalafala än Kot kapas mi let fän pwüng” ese chök wewe ngeni ar repwe aloni alon ekkewe wokisin lon ewe Paipel. (2 Tim. 2:15) Ifa usun sipwe nöünöü ewe Paipel lon ach asukul le ‘pesei’ aramas le siwili ar ekiek?—Fof. 28:23.
2. Ifa usun sipwe älisi aramas le alapalo ar aücheani ewe Paipel?
2 Äiti ngeni ewe Chon Aüseling Alon Paipel: Äeüin, nöünöü ewe Paipel pwe ewe chon aüseling epwe mirititi fän süföl pwe ewe Paipel a pop seni tipatchemen Kot. Eli ach lükülük woon ewe Paipel epwe achchüngü ewe chon aüseling le eteneki älleaan eü wokisin. (Ipru 4:12) Sia tongeni apasa: “Ua fen küna feiöch ren ai kütta ekiekin Kot woon ei mettoch. Nengeni alon an we Kapas.” Ika mi tufich, äiti ngeni met ewe Paipel a apasa ren om älleani ngeni.
3. Mwirin om älleani eü wokisin, met kopwe föri le älisi ewe chon aüseling le weweiti?
3 Oruuan, äweweei ewe wokisin ka nöünöü. A weires ngeni chommong aramas ar repwe weweiti eü wokisin atun ra kerän älleani. A lamot äweween ifa usun ewe wokisin a weneiti met oua pworaus woon. (Luk 24:26, 27) Menlapei ekkewe kapas lon ewe wokisin mi apöchökküla ewe pworaus oua käeö. Om kapas eis ngeni ewe chon imw epwe älisuk le esilla ika a weweiti ewe wokisin.—SalF. 20:5; Fof. 8:30.
4. Ifa ewe säingoon mettoch sipwe föri pwe sipwe achchüngü letipen chokkewe sia asukuler?
4 Äweweei Ekkewe Wokisin: Aülüngätin, achocho le achchüngü ekiekin me letipen aramas. Älisi ewe chon imw le esilla ifa usun ewe wokisin a pwisin weneiti. Om äweweei ewe wokisin a tongeni pesei an epwe siwili ekiekin. (Fof. 17:2-4; 19:8) Äwewe chök, mwirin ach älleani Pwäratä 21:4, sia tongeni äweweei pwe ach silei än Kot pwon pwe epwe awesalo mälo epwe siwili meefiach usun mälo. Mwirin, sipwe eisini, “Met om ekiek? Om silei pwe mälo epwe morolo a tongeni aururuk atun emön attongom a mälo?” Om eriri ewe wokisin ngeni nonnomun ewe chon imw a affata aüchean ewe wokisin. Om äweweöchü än Kot Kapas epwe lukeato aramas mi letip wenechar ar repwe fel ngeni Jiowa, ewe Kot mi manau me enlet.—Jer. 10:10.