Mineföön Prokram Ren Circuit Mwichelap

Mi fich ngeni Jiowa ach sipwe alingalo i. Ifa ussun sipwe alingalo Jiowa? Met a kan aweiresi ekkewe ekkoch le alingalo Jiowa? Ikkefa ekkewe feiöch epwe tori chokkewe mi alingalo Kot iei? Ewe prokram ren ei circuit mwichelap lon ei ier 2008 epwe awora pölüen ekkeei kapas eis, sipwe menemenöch ren. Iei itelapan “Fori Mettoch Meinisin pwe Oupwe Alingalo Kot Ren.” (1 Kor. 10:31) Sipwe ekieki ekkewe sipwe angei seni ekkewe ruu ränin käeö lon pekin ngün repwe feito.

Ewe district overseer epwe pworaus woon “Pwata Sipwe Alingalo Kot?” me “Oupwe Üöch ren Ämi Älleäsochisi än Kot kewe Allük.” Epwe eäni ewe public afalafal “Iö kewe Ra Alingalo Kot?,” pwal asopwalo ren ewe afalafal, “Tipechu le Alingalo Kot woon Unusen Fönüfan.” Epwe pwal wisen emmweni ewe Sukulen Afalafal. Ewe circuit overseer epwe pwal eäni ekkeei itelap “Pwapwaiti le Pwäri Lingen Kot,” “Tümünü Osupwangen Ekkewe Mwichefel,” me pwal “Kopwe ‘Nukuchar lon ewe Enlet,’” ewe mi alongolong woon 2 Piter 1:12. Pwal och, sipwe käeö ifa ussun “Ewe Angangen Pioneer A Alingalo Kot.” Itelapen ewe äeüin symposium, “Alingalo Kot lon Mwökütükütün Manauach Meinisin,” epwe aweweei alolloonun ekkewe kapas lon 1 Korint 10:31. Ewe symposium “Mwareiti Jiowa ren Om Eäni Angang Mi Pin” epwe aweweei sokkun kinikinin ach fel ngeni Jiowa. Epwe pwal wor menlapen pworaus lon Ewe Leenien Mas me pwopworausfengen woon ewe lesenin rän ren Räninfel. Epwe pwal wor fansoun papatais.

Lap ngeni aramas ra tunalo Kot. Chommong ra fokkun osukosuk ren otooten aramas ina minne ese wor fansoun ar repwe ekkekieki ussun lingen Jiowa. (Jon 5:44) Nge sia sileiöchü lamoten ach sipwe awora fansoun pwe sipwe weweiti ifa ussun sipwe “Föri Mettoch Meinisin pwe Oupwe Alingalo Kot Ren.” Akkota pwe kopwe fiti ekkewe ruu rän pwe kopwe unusen feiöch seni.