Mineföön Prokram fän iten ewe Ruu Rän Mwichelap

Epwe tufich ach sipwe üppos ngeni chokkewe mi eppeti ewe fel mi enlet? Ifa ussun sipwe ü ngeni iir kewe mi ngaü mi kan etipetipakich le liwiniti föfföringaüen fönüfan? Ewe ruu rän mwichelap fän iten ei ier 2009 epwe pölüweni ekkeei kapas eis mi aüchea. Itelapan “Pworacho Ngeni Mi Ingaü Ren Föfföröch.” (Rom 12:21) Epwe wor afalafal mi apöchökkülakich lon ei ruu rän mwichelap.

Ewe district overseer epwe eäni ewe afalafal “Pöchökkülelo le Pworacho Ngeni mi Ingaü Ren Föfföröch,” “Tümünükich Seni Lamalam Tekia!,” “Meinisin Mi Ngaü Repwele Mwüchülo!,” me “Apöchökkülalo Ach Lükü Pwe Sipwe Pworacho Ngeni Fönüfan.” Ewe circuit overseer epwe afalafalakich ussun ekkewe itelap, “Iei ewe Fansoun Sipwe Nennelo!,” a longolong woon Rom 13:11-13, me “Kosap Letipengaü Lon Fansoun Weires,” mi longolong woon Än Salomon Fos 24:10. Sipwe pwal pwapwaiti än ewe circuit overseer afalafal woon “Minne a Lamot Ngeni Ekkewe Mwichefel.” Pwal eü afalafal mi ammwötöres itelapan, “Kopwe Tongeni Pioneer?” Itelapen eü afalafal mi wor fitu kinikin lon, “Uppos le Fiu Ngeni än Setan kewe Minen Otuputup.” Ei afalafal epwe älisikich le esilla me pööpööni än Setan kewe minen otuputup mi kapachelong ekkewe tipatchemen computer, minen apwapwa me sukul tekia. Pwal eü afalafal mi wor fitu kinikin lon, iei itelapan, “Küna Pöchökkül le Ü Ngeni ewe Rän mi Ngaü.” Ei afalafal epwe äiti ngenikich ifa ussun sipwe unusen apwönüetä ewe kapasen öüröür lon Efisus 6:10-18.

Lupwen sia afalafala ewe kapas allim sia pworacho ngeni Setan, ewe populapen mi ngaü. (Pwar. 12:17) Ina popun Setan a fokkun achocho le fiu ngenikich, nöün Jiowa kewe Chon Pwarata! (Ais. 43:10, 12) Nge ewe Tefil esap fokkun sopwöch pokiten sia achocho le “pworacho ngeni mi ingaü ren föfföröch.” Föröchü om kokkot pwe kopwe tongeni fiti ewe ruu rän mwichelap me unusen küna feiöch seni.