A Wor Rech Pisek Aüchea Sipwe Ngeni Aramas
1 Än Kot we Kapas a ur ren pisek aüchea ussun Kot sipwe alamota. (Kölf. 12:6; 119:11, 14) Lon eü fansoun, Jises a äeä sokkopaten pworausen awewe ussun Mwuun Kot. Iwe, a eisini nöün kewe chon käeö: “‘Oua weweiti ekei metoch?’ Ra pölüeni, ‘Ewer.’” Mwirin Jises a ereniir: “Iei mine iteiten ekewe Sensen Allük meinisin mi fen kaiö usun Mwün Läng ra ussun chök eman souimw a atowu seni an lenien iseis mettoch mi fö me mettoch mi mes.”—Mt. 13:1-52.
2 Ekkewe pworaus mi enlet sia fen käeö lon Paipel lon ewe äeüin fansoun ach kerän poputä le käeö, sia kan eita ngeni pisek aüchea minen loom. Iwe ren ach sopwosopwolo le käkkäeö alolloolun än Kot Kapas, sia pwal käeö ekkoch pworaus mi enlet lon Paipel, iwe, ina ekkewe pisek aüchea minefö. (1 Kor. 2:7) Pwal och, ren älillisin ewe “chon angang mi allükülük o tipachem” sia pwal weweiti ekkewe pisek aüchea.—Mt. 24:45.
3 Sia fokkun aücheani ekkeei pisek aüchea ussun Kot, ekkewe minen loom me minefö. Ei mettoch a amwökütükich ach etiwa ewe asukul me alapalo ach angangen asukula aramas ussun ewe pworaus mi enlet me aüchea sia fen käeö.
4 Käeö Seni än Jises Leenien Äppirü: Jises a pwäratä meefian ussun ekkei pisek aüchea ren an äiti ngeni aramas ewe enlet ükükün an tufich. Inaamwo ika a pekkus nge ese ükütiü le uwawu ekkewe pisek aüchea seni an we “lenien iseis.”—Jon 4:6-14.
5 Jises a tongei ekkewe aramas mi osupwang lon pekin ngün, ina met a amwökütü i le äiti ngeni aramas ekkewe pworausen enlet ussun Kot mi emmwen ngeni manau. (Kölf. 72:13) A tongei ir kewe mi echik lon pekin ngün ina popun a “afalafala ngeniir chomong mettoch.”—Mark 6:34.
6 Äppirü Jises: Ika sia fokkun alamota ekkewe pisek aüchea ussun chök Jises, iwe sipwe mwotores le äiti ngeni aramas ekkewe faü aüchea seni ewe Paipel. (SalF. 2:1-5) Inaamwo ika fan ekkoch sia pekkus, sipwe chök afalafal ussun ewe enlet seni Paipel fan mwasangasangen letipach. (Mark 6:34) Ach aücheani ewe pisek aüchea mi nom rech epwe amwökütükich le akkalapalo ach angangen afalafal.