Néúnéún ewe Puk Tongen Kot le Káé Ngeni Chón Káé
1. Met popun a ffér ewe puk Tongen Kot?
1 A ifa me meseikach le angei ewe mineféén puk itelapan, Oupwe Chék Nóm lón ewe Tongen Kot! Ena puk a ffér pwe epwe álisikich le silei me tongei án Jiowa kewe allúk usun féffér mi pwúng nge esap fán iten an epwe asukula aramas usun ekkewe lúkú lón Paipel. Sisap anéúnéú ei puk lón ach angangen afalafal imw me imw.
2. Ifa usun sipwe néúnéú ewe puk Tongen Kot? Sipwe káé ngeni ié ena puk?
2 Mwirin án ekkewe chón káé áwesi ewe puk Paipel A Apasa, repwe káé ewe oruuen puk, Tongen Kot. Chechchemeni pwe a sókkofesen mááritáán aramas lón pekin lúkú. Fetálin kkótun ewe káé epwe lóngólóng wóón met ewe chón káé epwe kinamwe ren. Túmúnú pwe epwe ffat ngeni ewe chón káé ewe pwóróus oua fósfengen wóón. Lape ngeni, sisap néúnéú ena puk le poputá ach káé ngeni chókkewe mi pin káé chómmóng ekkewe puk nge rese fiffiti án ewe mwichefel kewe mwich me a ffat pwe rese mochen etipeeúfengeni manawer ngeni ewe enlet ra fen piin káé lón Paipel.
3. Met kopwe féri ika ka kákkáé ngeni emén lón ewe puk “God’s Love” lón fósun Merika?
3 Ika ka kákkáé ngeni emén lón ewe puk “God’s Love” lón fósun Merika nge oua nóm lón ekkewe sáingoon sópwun, iwe oupwe áwesaaló ren ámi néúnéú ewe puk lón fósun Chuuk. Iwe nge, neman kopwe filatá le poputásefál seni lepoputáán ewe puk Tongen Kot lón fósun Chuuk, alóngólóng wóón tufichin ewe chón káé. Kopwe filatá ika oupwe káé are ousap káé ekkewe “Pwal Ekkóch Áwewe” lón ewe puk Tongen Kot usun chék ekkewe “Pwal Ekkóch Áwewe” lón ewe puk Paipel A Apasa.
4. Met kopwe féri ika noum we chón káé a papatais nge esaamwo áwesi ewe puk Paipel A Apasa are ewe puk Tongen Kot?
4 Ika emén chón káé a papatais mwen an epwe áwesi ewe puk Paipel A Apasa are ewe puk Tongen Kot, iwe ewe kkótun káé epwe sópwósópwóló tori wesin ewe puk Tongen Kot. Inaamwo ika ewe chón káé a fen papatais, nge ka tongeni repotei ewe awa, return visit me ewe káé. Emén chón afalafal mi fituk nge a uwawu meefian atun ewe káé, epwe pwal tongeni repotei ewe awa.
5. Ifa usun sipwe néúnéú ewe puk Tongen Kot le álisi chókkewe rese chúen akkafalafal ren fitu fansoun?
5 Eli emén me lein ekkewe Chón Tupuni Mwichen Ekkewe Mwán mi Ásimaw epwe ewisa ngonuk óm kopwe káé ngeni emén chón afalafal ese chúen akkafalafal. Eli epwe erenuk óm kopwe káé ngeni ekkóch sópwun lón ewe puk Tongen Kot. Ese lamot an epwe fis ren langattam fansoun ena sókkun kkótun káé. A ifa me échún ei puk mi kawor fán itach, ewe a ffér pwe epwe álisikich pwe sipwe chék nóm lón ewe tongen Kot!—Jut. 21.