Ifa Ussun Kopwe Ammolnatä fän iten ewe Service Meeting
1. Met popun a kawor ewe Service Meeting me ifa ussun sipwe unusen feiöch seni?
1 Ewe Service Meeting a kawor pwe epwe elipwäköchükich me asopwöchu ach angangen afalafal. A menlapei ewe angangen afalafala ewe kapas allim ussun ewe Mwu, föralo chon käeö me esilefetälei kanotoon an Jiowa we kapwüng. (Mt. 28:20; Mark 13:10; 2 Pit. 3:7) Sipwe küna watteen feiöch ika sia kan ammolnatä fän iten ei mwich mi lamot me uwawu meefiach lon.
2. Ifa ussun sipwe mmolnetä le aüseling ngeni eü afalafal?
2 Afalafal: A mak lon ewe schedule menni puk ewe afalafal epwe longolong woon. Ka tongeni ammolnatä ena kinikinin pworaus kapachelong ekkewe wokisin mi mak nge ese tötiu masouan me ekieki ifa ussun kopwe apwönüetä lon om we angangen afalafal.
3. Met sipwe föri le mmolnetä ngeni ewe kinikin, kapas eis me pölüwan?
3 Kapas Eis me Pölüan: Ei kinikin epwe ussun chök ewe käeöön Leenien Mas, eäni kapasen le poputään me le sopwoloon mi mwochomwoch. Erri me ammolnatä ekis meefiom epwe menlapei ekkewe pworaus mi lamot lon eü me eü parakraf.
4. Ifa ussun sipwe mmolnetä ngeni ewe kinikin, än chon afalafal me mwichefel pworausfengen?
4 Afalafal me Chon ewe Mwichefel Repwe Uwawu Meefier: Ei kinikin epwe katowu ussun eü afalafal nge ewe chon afalafal epwe angei meefien chon aüseling. Ika kopwe erri ekkewe menlapen pworaus me suuki ekkewe wokisin lon Paipel ese makketiu masouan lon ewe lesen, epwe älisuk le pölüweni ekkewe kapas eis. Ewe chon afalafal epwe älisi chon ewe mwichefel le uwawu meefier woon ekkewe menlapen pworaus.
5. Met epwe älisikich le unusen küna feiöch seni ekkewe pwoomw?
5 Pwoomw: Lon ekkoch kinikin, a kan wor pwoomw mi äitikich ifa ussun sipwe äeä met sia fen pworausfengen woon, ika sipwe afalafala aramas. Ekkewe elter are ekkewe chon afalafal mi lipwäköch are pioneer repwe wisen eäni ekkeei pwoomw. Lupwen ka ammolnatä, ka tongeni ekieki ifa ussun repwe pwomweni ewe pwoomw. Ika repwe pwomweni ekkewe minen afalafal a mak lon ewe KM, ekieki ifa ussun kopwe eäni ena afalafal pwe epwe fichiiti ekkewe sokkopaten chon imw. Kopwe uwei ekkewe puk repwe nöünöü lon ewe pwoomw. Atun än ewe Famili Fel, oua tongeni küna feiöch ika oua sotuni ekkewe pwomwen afalafal.
6. Ikkefa ekkoch popun sipwe mmolnetä ngeni ewe Service Meeting?
6 Epwe kon apwapwa ewe Service Meeting ika sia mmolnöch me ekiekiöchü ekkewe mettoch epwe katowu lon ewe mwich. Ren ach föri ekkeei kapasen emmwen, epwe fokkun apöchökülafengenikichetä. (Rom 1:11, 12) Ika sia awora fansoun le ammolnatä ren ewe Service Meeting, epwe atufichikich le apwönüetäöchü wisach.”—2 Tim. 3:17.