Emmwen fän iten Chon Eäni Kinikin lon Service Meeting
Seni ei Ach Angangen Afalafala Ewe Mwu, ekkewe kapas sia nönnöünöü lon ewe Service Meeting Schedule ra mecheresilo. Ekkeei emmwen me minen ächechchem repwe affata met a mak lon ewe Ach Angangen Afalafala Ewe Mwu fän ewe itelap “Ifa Ussun Kopwe Ammolnatä fän iten ewe Service Meeting,” minen May 2009.
◼ Afalafal: Ei kinikin a longolong woon ewe puk mi mak lon ewe schedule. Chon ewe mwichefel resap uwawu meefier. Ewe chon afalafal epwe menlapei met epwe älillisöch ngeni ewe mwichefel.
◼ Kapas Eis me Pölüwan: Ei kinikin epwe usun chök ewe käeöön Leenien Mas, epwe mwoch kapasen le poputään me le sopwoloon. Eäni ekkewe kapas eis lon meinisin ekkewe parakraf. Ewe chon emmwen esap achommonga an fos. Ika mi naf fansoun, älleani ekkewe wokisin mi lamot. Esap wor älleaan parakraf, chilon chök ika a affatetiw pwe epwe ällea.
◼ Afalafal me Memmeef Seni Chon Mwich: Iei eü afalafal nge chon mwich repwe pwal uwawu meefier. Unusen ei kinikin esap chök eü afalafal, esap pwal chök kapas eis me pölüwan.
◼ Pwoomw me Interview: Ewe emmwen usun pwoomw a wewe ngeni pwe ewe brother mi eäni ei kinikin epwe wisen akkota ewe pwoomw, nge esap pwisin i epwe pwomweni. Epwe ewisa ngeni ekkewe mi lipwäköch me iir leenien äppirü lon ewe mwichefel me esilei ngeniir me mwan pwe repwe ammolnatä. Mi öch esap filatä ekkewe mineföön chon afalafal are ekkewe ese watte sileier ren ar repwe chök tongeni tötä woon stage. Nge ekkoch leir ra tongeni chök chon älillis. Ekkewe chon pwoomw repwe säpewu ngeni chon mwich. Ekkewe chon interview resap chök mommot lon leenier nge repwe tötä woon stage. Ekkewe chon pwoomw me interview repwe praktis me mwan. Ika a lulo kulokun än ewe brother afalafal, epwe amwochalo, nge epwe tümünü pwe esap likitalo ekkewe pwoomw me interview. Ekkewe ministerial servant repwe cheki ren ewe sou ätettel lon ewe mwichen elter are pwal emön elter ren iö kewe repwe wisen pwoomw.
Ika a wor eü kinikin mi kkolo seni ekkeei, a lamot ewe chon eäni epwe apwönüetäöchü ekkewe emmwen usun. Lupwen ekkewe brother repwe apwönüetä ekkeei kapasen emmwen meinisin, iwe ra älisatä ewe Service Meeting an epwe “fis fän pwüng me kokotöch.”—1 Kor. 14:40.