Eü Ränin Mwichelap Prokram fan iten 2010
1. (a) Lon ekkewe ier ra lo ikkefa ekkewe itelapen Eü Ränin Mwichelap mi longolong woon Paipel? (b) Mei wor ekkoch pworaus a katowu seni ekkewe Eü Ränin Mwichelap a fen älisuk lon om angangen afalafal?
1 “Esissinata me Föri Minne mi Lamot,” “Ütä Pöchökkül Ussun Eü Mwichen Siip,” “Achocho le Pwarata Ussun ewe Enlet” me “Kich ewe Ppwul, Jiowa ewe Chon Oululukich.” (Fil. 1:9, 10, 27; Jon 18:37; Ais. 64:8) Ikkeei ekkoch me lein ekkewe itelap sia fen pin rongorong lon ekkewe Eü Ränin Mwichelap ra lo. Ka mwötöres om kopwe fiti ewe Eü Ränin Mwichelap epwe fis? Epwe menlapei ewe itelap “Ewe Fansoun a Chok Mochomoch” seni 1 Korint 7:29, TF.
2. Ifa ussun sipwe tongeni älisi ekkoch ar repwe mwasangasangeiti ewe mwichelap?
2 Lupwen a kerän apioni inet epwe fis ewe Eü Ränin Mwichelap, kopwe poputä le pworaus woon fan mwasangasang. Ekkoch sam me in ra älisi nöür kewe ar repwe mwasangasangeiti ewe mwichelap ren ar esissina ränin ewe mwichelap me lon an ewe famili pwinin maram, kapachelong ekkoch mettoch emön me emön epwe uwei lon ewe mwichelap. Mwirin, repwe akkälleani fitu rän a nom mwen ewe mwichelap. Atun ar Famili Fel, repwe tongeni akkota le enniwili ekkewe pworaus lon ekkewe Eü Ränin Mwichelap ra lo. Ka tongeni pwal ammolnatä letipom fän iten ei rän ren om enniwili ewe puk, Benefit from Theocratic Ministry School Education, pekin taropwe 13-16, ren an epwe älisikemi me om famili le “föröchü usun ämi aüseling.”—Luk 8:18.
3. Ifa ussun sipwe fokkun feiöch seni ekkewe afalafal lon ewe mwichelap?
3 Apwönüetä Met Ka Käeö: Wesin ewe mwichelap, chommong ra kan erä: “A ifa öchün ewe prokram!” Mei pwüng ena, pun ekkewe mwichelap eü me lein ekkewe feiöch watte seni Jiowa. (SalF. 10:22) Ika ekkewe pworaus lon ewe mwichelap epwe achchüngü letipom, mi lamot kopwe ekilonei me amwöchü lon lelukom. (Luk 8:15) Wesin ewe mwich atun ämi sä ngeni imwemi, pworausfengen woon ewe prokram, woon met emön me emön epwe achocho ngeni me ekkewe pworaus epwe älisi lon ewe angangen afalafal. Ämi fosfengen woon ena epwe atufichikemi le küna älillis seni ewe prokram inaamwo ika a fen wes me lulo ewe mwichelap.—Jem. 1:25.
4. Pwata ewe Eü Ränin Mwichelap epwe minen älillisöch ngenikich?
4 Sia meefi pwe kich mi aüchea lupwen sia angei och liffang mi fokkun älillisöch ngenikich. Iwe, sipwe pwal mwasangasangeiti ewe Eü Rän Mwichelap epwele fis, ewe Jiowa a awora me liffang ngenikich. Sia lükü pwe ewe mwichelap epwe fokkun älisikich lon mettoch meinisin. Sia pwal tongeni lükülük pwe met Semach lon läng, Jiowa epwe liffang epwe fich ngenikich, ekkewe kapasen apöchökkül me minen asukulakich le apwonueta ewe angang a fen awisa ngenikich.—2 Tim. 4:2; Jem. 1:17.