“Mongö lon Fansoun Fich”
1. Ifa usun ewe eü ränin mwichelap a kerän fis a älisuk me pwal ekkewe ekkoch?
1 Mwirin ach fiti ekkewe mwichelap a kan chök fis eü rän, sia kan apasa, “Iei met a wesewesen lamot ngenikich!” Emön elter mi säifetäl a erä pwe mwirin ewe mwichelap a kerän fis ekkoch pwiich kewe ra apasa ar mochen alapalo ar fiti ewe angangen afalafal. Pwal emön elter mi säifetäl a apasa: “Ewe mwichelap a älisikich le ekiekiöchü ei fansoun sia nonnom lon atun sia etittina ach kewe kefil lon manauach.” Pwal emön a erä: “Chommong chon afalafal ra erä pwe a eü minen ächechchem ngeniir le akkomwa ewe angang mi lamot seni meinisin, ewe angangen afalafal.” Ifa usun ewe eü ränin mwichelap a älisuk?
2. Met sipwe käeö lon ewe mineföön prokram?
2 Ewe mineföön prokram fän iten eü ränin mwichelap epwe pwal wesewesen lamot ngenikich. Itelapan “Anomu ach Äpilükülük woon Jiowa” seni Kölfel 118:8, 9. Ikkeei itelapen ekkoch afalafal repwe katowu: “Ifa usun Jiowa a Wiliti ach Leenien Op lon Fansoun Riäfföü?” “Älisi Ekkoch ar repwe Opolong fän Pöün Jiowa,” “Äppirü Jiowa lon an Awora Tümün,” “Ämi kana Säräfö, Oupwe Äpilükülük Woon Jiowa!” me “Paratis lon Pekin Lükü, Ach Leenien Op Me Ren Jiowa.”
3. Ifa usun sipwe unusen küna feiöch seni ach fiti ewe mwichelap?
3 Ifa Usun Sipwe Küna Feiöch Seni ewe Prokram: Atun chök a esilesil ewe ränin mwichelap, kopwe akkota le fiti me etiwa nöüm kewe chon käeö ar repwe pwal fituk. Sipwe ‘ukuwa lon ach likiitu’ ika sipwe akkamwöchü met sia käeö. (Luk 8:15, TF) Aüselingöch ngeni ewe prokram me makketiw ekkewe pworaus mi lamot me ekkewe kapasen pesepes kopwe apwönüetä lon manauom me lon ewe angangen afalafal. Mwirin ewe mwichelap awora fansoun me chon om famili le pwoppworaus usun ewe prokram me titchiki met oupwe apwönüetä seni minne oua käeö.
4. Pwata sipwe ekieki usun ach na eü ränin mwichelap epwap fis?
4 Usun chök och möngö mi fokkun annö, ach na eü ränin mwichelap epwap fis a mmolnetä fän watteen tong me kokkotöch. Amwo Jiowa epwe efeiöchü om fiti ei mwichelap me kopwe küna feiöch seni ei “mongö lon fansoun fich” mi apöchökküla ach lükü.—Mt. 24:45.