Mineföön Prokram fän iten ewe Eü Rän Mwichelap
Ewe itelap fän iten ewe eü rän mwichelap ren ei ier 2009 a longolong woon Kolose 4:17, “Tütümünü Wisach Pwe Sipwe Apwönüetäöchü.” Kich Chon Kraist sia kon ekilapei ena kapasen öüröür. Sia achocho ngeni le unusen apwönüetä wisach ussun chök met Jises a fen föri. (Jon 17:4) Ewe aposel Paul a pwal ngenikich eü leenien äppirü ren ei napanap. A fokkun mochen epwe awesöchüelo än we angang.—Fof. 20:24.
Än ewe circuit overseer afalafal epwe äiti ngenikich ifa ussun ekkewe chon afalafal ra pwäkini ar kewe osukosuk lon ar angangen afalafal. Mwirin, ewe afalafal itelapan “Ämääraatä Met Ka Fen Fotukatiu” epwe menlapei ifa ussun sipwe enletin älisi iir kewe “mi fil ngeni manau esemuch.” (Fof. 13:48) Ewe chon afalafal mi säifetäl epwe akkomw pworaus woon eü me eü ekkewe wokisin lon 2 Korint 6:1-10 lon an we afalafal itelapan “Ifa Ussun Sipwe Pwäratä Pwe Kich Chon Angangen Kot.” Mwirin leolowas, epwe eäni ewe afalafal itelapan “Aücheaniöchü Om Angangen Afalafal.” Kopwe fokkun küna pöchökkül seni ekkeei afalafal itelaper, “Kükkün me Chinnap Ra Pwapwaiti Ewe Angangen Afalafal” me “Ekkewe Säräfö mi Apwönüetä ewe Angangen Afalafal.” Lon ekkeei mwichelap repwe fis, chokkewe ra ekiekin papatais repwe mwittir esile ngeni ewe elter a wisen emmweni ewe mwichefel. Lon iteiten ach kewe mwichelap meinisin, mi lamot ewe kinikin, käeöön Ewe Leenien Mas. Ina popun kopwe uwei noum we leenien Mas lon ewe mwichelap.
Lon ach tümünü ach angangen afalafal pwe sipwe apwönüetäöchü, sipwe piiöchü pwe mochenich me pwisin ach kewe angang resap eppeti ewe wis Jiowa a fen lükü ngenikich. Lon ei eü rän mwichelap, kapasen apöchökkül seni Paipel repwe katowu repwe älisikich pwe sipwe alamota me etittinaöchü ach angangen afalafal ren ach sipwe tongeni apwönüetäöchü wisach we.