Ka Mmolnetä fän iten ewe Afalafal Sereseröch?
1. Ifa ewe pworaus lon Paipel a pwäratä pwe a uwaaöch ewe afalafal sereseröch?
1 Ach afalafal sereseröch ngeni aramas a tongeni uwaaöch. Mei wor chommong pworaus lon Paipel usun än aramas afalafal sereseröch nge a sopwöch. (Jon 4:7-15) Ifa usun sipwe tongeni ammolnatä fän iten ei sokkun angangen afalafal?
2. Ifa usun üfach me foutach a älisikich le mmolnetä le afalafal ngeni aramas?
2 Üfach me Foutach: Ach tümünüöchü napanapen üfach me foutach fansoun meinisin epwe atufichikich le afalafal ngeni ekkewe ekkoch. (1 Tim. 2:9, 10) Ika sise meefi kinamwe ren napanapach, eli sipwe pireir le afalafal ngeni aramas. Nge limelimöchün üfach me foutach epwe tongeni luki aramas me eli repwe eis ika pwata sia fokkun napanapöch. Ren chök äwewe, eü pean pwüpwülü Chon Pwäratä Jiowa, ra üföüföch lupwen ar säi. Iwe, emön re Muslim, mi mommot ünükür, a küna napanapöchün üfer me a eisiniir ika iir Chon Kraist. Iwe, ra pworausfengen lon ewe Paipel ükükün ülüngät awa.
3. Ifa usun kopwe äppirü än Jises leenien äppirü ren om poputä le pworaus ngeni aramas?
3 Poputä le Pworausfengen: Jises a poputä le fos ngeni ewe fin Sameria ünükün än Jekop we chönüttu ren an tingorei ünüman konik. Pwal ina chök usun, sipwe tongeni poputä le fos ngeni aramas ren ach eäni ekis pworaus mi mwoch are eü kapas eis ngeniir. Inaamwo ika fän ekkoch sipwe meefi säü, nge sia tongeni lükülük woon Jiowa pun epwe ngenikich “pwora” pwe sipwe tongeni poputä le pworaus ngeni aramas.—1 Tes. 2:2.
4. Ifa usun sipwe tongeni ammolnatä fän iten afalafal sereseröch?
4 Kükkütta ewe Atun Kopwe Afalafal: Chommong chon afalafal ra afalafal ngeni aramas fän sereseröch lon sokkopaten leeni. Ekieki met nonnomum, met ka kan föri are ka kan lö ia iteiten rän me iö kewe ka kan sereniir. Uwei ekkewe puk me ewe Paipel. Kopwe nennengeni me afaani ekkewe aramas ünüküm. Unusen rän, ika kopwe ekieki ekkewe atun a suuk ngonuk om kopwe tongeni fos ngeni aramas, iwe kopwe mmolnetä le afalafal ngeniir.—Fil. 1:12-14; 1 Pit. 3:15.
5. Pwata mi lamot sipwe ammolnatä fän iten ei angangen afalafal sereseröch?
5 Ach tong ngeni Kot me chon oruch kewe, ikena ekkewe ruu popun sia mochen fiti ei angangen afalafal sereseröch. (Mt. 22:37-39) Pokiten ei angangen afalafal eü angang mi atapwalapwal, mi lamot sipwe ammolnatä lupwen sipwe afalafal sereseröch. Sipwe alamota iteiten fansoun meinisin pwe sipwe afalafala ewe kapas allim ngeni aramas iei lupwen mi chüen wor fansoun.—Rom 10:13, 14; 2 Tim. 4:2.