Kich Chon Pwäratä Jiowa Fansoun Meinisin
1. Met sipwe tongeni käeö seni pworausen än Jises afalafala ewe fefin ren ewe chönüttu?
1 Jises a fen feffetäl fitu awa, a pekkus me kaka. Lupwen nöün kewe chon käeö ra lo kamö aner möngö, Jises a mwo asösö me mwotiw woon eü chönüttu lukun eü telinimw lon Sameria. Ürürün pwe Jises ese akkota an epwe afalafal lon Sameria, epwe chök lofoch ngeni Kalili me sopwelo an afalafal ikena ie. Iwe nge, a alamota an fansoun le afalafal ngeni emön fefin a üfüf konik. (Jon 4:5-14) Pwata? Jises ese asösö seni wisan we nöün Jiowa “chon pwarata mi tuppwel o enlet.” (Pwar. 3:14) Sia äppirü Jises ren ach wiseni wisach nöün Jiowa Chon Pwäratä iteiten fansoun meinisin.—1 Pit. 2:21.
2. Ifa usun sipwe tongeni ammolnatä le afalafal ngeni aramas lon sereseröch?
2 Kopwe Mmolnetä: Sia tongeni mmolnetä le afalafala aramas lon sereseröch ren ach ukkuwei nöüch kewe puk. Chommong chon afalafal ra kan ukkuwei nöüch kewe kükkün taropwe me anöünöü ngeni ekkewe chon angang lon sitowa, leenien amömö kas me pwal ekkoch leeni repwe chuuri aramas ie unusen rän. (SalAf. 11:6) Emön sister a säikis, iteitan a kan uwei lon an we pwotou nöün kükkün Paipel me ewe puk Met ewe Paipel a Wesewesen Apasa? A achocho poputä le pworaus ngeni iö chök a mwot ünükün.
3. Ifa usun sipwe poputääni ach pworaus ngeni aramas?
3 Poputääni Eü Pworausfengen: Lupwen sia afalafal ngeni emön lon sereseröch, ese pwal lamot ach sipwe pworaus usun ewe Paipel le poputään. Jises ese poputä le esile ngeni ewe fefin woon ewe chönüttu pwe i ewe Messaia nge a chök tingorei ünüman. Iwe, a efisi än ewe fefin mochen aüseling. (Jon 4:7-9) A pwal ina usun ren emön sister, a poputä le pworaus ngeni emön mi eisini i ika a fen pwapwaiti le föri ewe ränin apwapwa. Ewe sister ese äwewe ngeni pwe ese kan föri ewe apwapwa pokiten i emön Chon Pwäratä Jiowa nge a chök pölüweni, “Ngang ua pwisin filatä ai usap föri ewe ränin apwapwa.” Fän chommong, ewe chon kapas eis epwe eisini ika pwata a filatä. Iwe, a suuk ngeni ewe sister an epwe afalafal ngeni.
4. Pwata ewe wokisin lon Mattu 28:18-20 a amwökütü letipom?
4 Inaamwo ika a fen wes än Jises tinikken le afalafal woon fönüfan, nge a chüen mochen älisatä ei angang a fiffis iei. (Mt. 28:18-20) Ina minne, sia mmolnetä le pwäratä ach lükü iteiten fansoun meinisin usun chök ach leenien äppirü, Jises.—Ipru 10:23.