‘Fang Pwisin Manauach’ Ngeni Nöüch kewe Chon Käeö
1. Ren ach sipwe älisi nöüch chon käeö, met mi lamot sipwe föri?
1 Ren ach sipwe älisi emön chon käeö pwe epwe fangolo manauan ngeni Kot, sipwe pwal föri ekkoch mettoch me lukun ach käeö ngeni iteitan. Ewe aposel Paul a alöllöfengeni an riri ngeni nöün kewe chon käeö me emön inelap mi tümünüöchü nöün kewe. Pwal ina usun kich, sia pwapwa le fang ‘püsin manauach’ ngeni nöüch kewe chon käeö pwe sipwe älisiir ar repwe feffeitä lon pekin lükü.—1 Tes. 2:7-9.
2. Pwata sipwe afaani nöüch kewe chon käeö me ifa usun sipwe pwäratä ena?
2 Afaani ewe Chon Käeö: Lupwen emön chon käeö a apwönüetä met a käkkäeö, miritin letipen epwe amwökütü i le ükütiw le chiechi ngeni chienan kewe iir mi eäni ekkewe föfför rese tipeeü ngeni än Paipel kewe kapasen emmwen. (1 Pit. 4:4) Neman, epwe küna koput seni an we famili. (Mt. 10:34-36) Sipwe älisi an esap pwositi an famili ren ach sipwe pwäratä pwe sia äfänni. Iei ewe kapasen pesepes me ren emön misineri mi lipwäköch: “Kosap mwittir lo wesin ewe käeö. Ika mi tufich, ekis nonnom me pwoppworaus ngeni.” Kopwe ppi ika mi wor och mettoch ka tongeni älisi ren an epwe älisatä kinamween manauan. Äwewe chök, ka tongeni kökköri woon fon are chuuri lon imwan lupwen a samau? Ika mi tufich, ka tongeni mommot ren atun mwich pwe kopwe älisi ren nöün kewe?
3. Ifa usun sipwe älisi nöüch kewe chon käeö le angei apöchökkül seni ewe mwichefel?
3 Älillis Seni ewe Mwichefel: Ika ka afalafal, nge ka kan ngeni imwen nöüm chon käeö, pwata ouse chuuri pwe chienom kewe chon afalafal repwe kapong ngeni? Fän ekkoch ika mi tufich, etiwa pwal ekkoch chon afalafal, kapachelong ekkewe elter ar repwe fiti ämi käeö. Pwal eü, ekiselo mwirin om poputääni ewe käeö, pesei nöüm we chon käeö an epwe fiti ekkewe mwich lon ewe Kingdom Hall. Epwe atufichi le pwapwaiti ewe chiechifengen lefilen chon ewe mwichefel me meefi pwe ina an we famili lon pekin lükü.—Mark 10:29, 30; Ipru 10:24, 25.
4. Met sokun feiöch sia küna ren ach tinikken?
4 Emön sam are in mi fokkun achocho le älisi nöün kewe semirit lon pekin lükü, a meefi pwapwa chapur ika nöün kewe ra üppos fän iten Jiowa me feffetäl lon ewe enlet. (3 Jon 4) Sipwe pwal küna ena sokkun pwapwa lupwen sia fang manauach le älisi nöüch kewe chon käeö.