Ua Tufich Ngeni Ai Üpwe Afalafal?
1. Pwata sisap ekieki pwe sia lipwäkingaw ngeni ewe angangen afalafal?
1 Kosap lolilen ika ka ekieki pwe kese tufich ngeni ei angang! Ach wiliti emön chon afalafal ese longolong woon sukul tekia are pwisin ach tufich. Ekkoch me lein ekkewe chon käeö loom “rese kaeo lon sukul, o ir mi aramas kisikis.” Iwe nge, ra lipwäköch lon ewe angangen afalafal pun ra achocho le äppirü än Jises kewe leenien äppirü.—Fof. 4:13; 1 Pit. 2:21.
2. Ikkefa ekkoch napanapen än Jises kewe afalafal?
2 Napanapen än Jises Afalafal: An kewe afalafal ra fataffatöch, a fichiiti nonnomun aramas me a mecheres än aramas repwe weweiti. An kewe kapas eis, kapas äwewe me kapasen le poputään ra amecheresi än aramas repwe mochen aüselinga. (Mt. 6:26) A pwäratä pwe a äfänni aramas. (Mt. 14:14) Pwal ooch, Jises a fos fän lükülük me ännetatä pwe i emön sou nemenem mi pöchökkül, a kefilitä me ren Jiowa pwe epwe arongafeili ewe kapas allim.—Luk 4:18.
3. Ifa usun Jiowa a älisikich pwe sipwe lipwäköch lon angangen afalafal?
3 Jiowa a Älisikich: Nöüch we Sense mi Lap a asukulakich ren an Kapas me an we mwicheich, pwe sipwe sopwöch lon ewe angangen afalafala ewe kapas allim. (Ais. 54:13) Pokiten Jiowa a akkota pwe epwe mak pworausen än Jises afalafal, sia tongeni ekinolei me äppirü napanapen an kewe afalafal. Jiowa a ngenikich än we ngün mi fel me asukulakich ren ach kewe mwich. (Jon 14:26) Pwal ooch, a awora pwich kewe mi äsimaü pwe repwe älisikich ach sipwe lipwäköch.
4. Pwata sipwe wesewesen lükülük pwe sia tufichin afalafala ewe kapas allim ngeni aramas?
4 Sia wesewesen lükü pwe kich mi tufichin fiti ewe angangen afalafal, pokiten “ach lipwakoch a popu seni Kot.” (2 Kor. 3:5) Ika sia lükülük woon Jiowa me akkalamota ekkewe mettoch meinisin a awora, sipwe “tufich o lipwäköch ngeni sokun angang mürina meinisin.”—2 Tim. 3:17.