Met Sipwe Akkomwa
1. Ifa usun Jises a pwäratä an aücheani ewe angangen afalafal?
1 Jises a akkomwa ewe angangen afalafal. A fokkun angang weires, a fetälfeil fitepükü mwail lon unusen Palestine pwe epwe afalafal ngeni chommong aramas. A ämecheresi nonnomun manauan pwe epwe afota ekiekin me awora watteen fansoun lon ewe angang. (Mt. 8:20) Atun ewe pwiin aramas ra sotun le amwöchü pwe epwe apöchökkülatä ekkewe mi samau, a ereniir: “Upwe fokun afalafala ewe Pworausen Manau usun Mwün Kot lon pwal ekoch telinimw, pun iei popun Kot a tinieito.” —Luk 4:43.
2. Pwata Jises a kon aücheani ewe angangen afalafal?
2 Pwata Jises a kon aücheani ewe angangen afalafal? Pokiten a äkkäeüin ekieki piniloon iten Jiowa. (Mt. 6:9) A tongei seman we lon läng ina popun a mochen apwönüetä letipan me älleasochisi meinisin An kewe allük. (Jon 14:31) Pwal eü, Jises a wesewesen tongei aramas me mochen älisiir.—Mt. 9:36, 37.
3. Ifa usun sipwe pwäratä pwe sia akakkomwa ewe angangen afalafal?
3 Äppirü Jises: Ese mecheres ach sipwe usun chök Jises le akakkomwa ewe angangen afalafal, pokiten a chommong än ei fönüfan kewe minen erikirik me ekkewe mettoch mi olusmwäällielo ach fansoun. (Mt. 24:37-39; Luk 21:34) Ina popun, sipwe ekiekifichi le föri ekkewe mettoch mi lamot seni meinisin, awora fansoun le ammolnatä me fiti ewe angangen afalafal iteitan. (Fil. 1:10) Sipwe achocho le ämecheresi nonnomun manauach me sisap unusen äeä mettochun ei fönüfan.—1 Kor. 7:31.
4. Pwata a lamot ach sipwe akakkomwa minne mi aüchea iei?
4 Ika a nafangaw fansoun, emön mi tipatchem epwe akkomwa le föri minne mi kon aüchea. Äwewe chök, ika a silei pwe a wor eü mölümöl mi efeiengaw epwele fis, epwe akkomw äeä an fansoun me pöchökkül le akkota an epwe tümünü chon le imwan me öüröüra chon orun kewe. Nge ekkewe mettoch ese kon lamot epwe akukumwiri. Iei, a chök mwochomwoch ewe lusun fansoun mwen warotoon Armaketon. (Sef. 1:14-16; 1 Kor. 7:29) Ren ach sipwe amanaua pwisin kich me chokkewe mi aüselingakich, mi lamot sipwe pwisin tümünükich me ach kewe afalafal, ese lifilifil ia sia nom ie. (1 Tim. 4:16) Pwüngün, ach küna manau a longolong woon ach akakkomwa ewe angangen afalafal lon manauach!