Iotek me Ekilon Ra Lamot ngeni Nöün Kot kewe Chon Angang mi Tinikken
1. Met a älisi Jises pwe esap rikilo ekiekin seni an we angang mi kon aüchea?
1 Jises a echikara aramas me asüolo ekkewe timon lon eü kuniolun. Sorotään, nöün kewe chon käeö ra küna me ereni: “Meinisin ra resin küttok,” me ra pesei le sopwelo an föri manaman. Iwe nge, Jises ese mut ngeni ekkena mettoch repwe erikalo an ekiek seni ewe angang mi aüchea, an afalafala ewe kapas allim. A ereni nöün kewe chon käeö: “Ousipwe feila ngeni pwal ekoch sopw, pwe üpwe afalafaleer, pun iei popun ai feito.” Met a älisi Jises le afota ekiekin woon an angangen afalafal? A pwäätäkkäi pwe epwe iotek me ekilon. (Mark 1:32-39) Ifa usun iotek me ekilon ra pwal tongeni älisikich pwe sipwe chon afalafal mi tinikken?
2. Met sipwe tongeni ekilonei pwe epwe älisikich le akkamwöchü ach tinikken lon ewe angangen afalafal?
2 Met Sipwe Ekilonei? Jises a küna pwe aramas “ra nom lon watten osukosuk me weires usun sip kana esap wor nöür chon mas.” (Mt. 9:36) Pwal ina usun ikenäi, sia tongeni ekilonei ükükün lamoten ewe kapas allim ngeni aramas. Eli sipwe ekieki atapwalapwalen ei fansoun. (1 Kor. 7:29) Sia tongeni ekilonei usun än Jiowa kewe angang, napanapan kewe, feiöchün ach wiliti Chon Pwäratä Jiowa, me ekkewe pisek aüchean ach lükü a nom rech ren ach käeö än Kot Kapas aramas lon ach leenien afalafal resaamwo silei.—Kölf. 77:11-13; Ais. 43:10-12; Mt. 13:52.
3. Ineet sipwe ekilon?
3 Ineet Sipwe Ekilon? Ekkoch ra pwal usun Jises le pwäätäkkäi lesossor atun a chüen mosonoson. Ekkoch ra meefi pwe a kon öch repwe ekilon me mwen repwe möür. (Ken. 24:63) Inaamwo ika sia osukosuk, nge sia tongeni awora fansoun le ekilon. Ekkoch ra ekilon atun ra fiti waa, are atun ar möngöön leolowas. Chommong ra meefi pwe ar ekilon ren fitu minich me mwen repwe feilo afalafal a älisiir le tinikken me pwora.
4. Pwata sipwe ekilon?
4 Iotek me ekilon repwe alolloolaalo ach mochen angang ngeni Jiowa, me alapalo ach afota ekiekich woon mettochun ach lükü, me apöchökküla ach tipeppos le akkafalafal. Jises, nöün Kot we chon afalafal mi Lap a feiöch seni an ekilon, iwe epwe pwal ina chök usuch.