Ewe Leenien Mas—A Fför fän iten Chommong Sokkopaten Aramas
1. Ifa usun ewe mwich mi alükülük me tipachem ra äppirü ewe aposel Paul?
1 Ewe aposel Paul a anapanapa napanapen an afalafala ewe kapas allim pwe epwe liapeni “sokun aramas ese lifilifil,” iwe, pwal ina chök usun, ewe chon angang mi alükülük me tipachem a nöünöü ekkeei puk le achchüngü letipen aramas mi sokkofesen ar lükü me nonnomur. (1 Kor. 9:22, 23) Iwe, sipwe nöünöüfichi Ewe Leenien Mas ika sia wewefichiti iö kewe repwe älleani.
2. Pwata sipwe nengenifichi aramas me mwen sipwe anöünöü ngeniir nöüch kewe puk?
2 Om nennengenifichi me aüselingöch epwe älisikich le “manaueni sokkun manau meinisin lein sokun aramas ese lifilifil.” (1 Kor. 9:22) Ika mi tufich om kopwe nennengeni aramas me mwen om kopwe fos ngeniir, eli epwe älisuk le silei usun nonnomun manauer. Atun sia anöünöü Ewe Leenien Mas, pesei ekkewe chon imw ar repwe uwawu meefier ren om eisiniir ekkoch kapas eis me mut ngeniir ar repwe pölüweni. Kopwe fokkun aüselingöch ngeniir pwe epwe ekinamweei letiper le uwawu meefier. Eli met repwe apasa epwe pwäri met ra alamota lon manauer. Om äfänniöchüür me aüselingöchüür epwe älisuk le silei menni pworaus repwe sani le älleani.
3. Ekkewe lesen lon Ewe Leenien Mas ra wesewesen kawor fän iten iö kewe?
3 Ewe Leenien Mas a mak fän iten chokkewe mi süföliti Kot me ewe Paipel. Eli ra silei ekkoch pworaus lon ewe Paipel, nge rese kon lien weweiti. Ra usun chök ekkewe aramas mi “niuokusiti Kot” Paul a kapas ngeniir. (Fofor 13:14-16, TF) Ekkewe lesen sia käeö lon Ewe Leenien Mas ra äkkäeüin fför fän iten Chon Pwäratä Jiowa. Paul a ekieki pwe chokkewe mi älleani nöün kewe taropwe ra silei masouen ewe Paipel me ar sile mi pwüng. (1 Kor. 1:1, 2) Pwal ina chök usun, ekkewe lesen lon Ewe Leenien Mas ra kawor fän iten chokkewe mi fiffiti ach kewe mwich me weweiti ekkewe kapas me pworaus.
4. Pwata a lamot sipwe sileöchü masouen nöüch kewe puk sia kan anöünöü lon ach angangen afalafal?
4 Achocho le älleani iteiten pworaus mi katowu lon nöüch kewe puk. Epwe ina usun kopwe tongeni silei menni pworaus epwe fich ngeni emön me emön kopwe chuuri lon ewe angangen afalafal.