Áeá eú Napanapen Afalafal mi Sópwéch
1. Met sia tongeni káé seni án ekkewe popun Chón Kraist sókkópaten napanapen afalafal?
1 Ekkewe popun Chón Kraist ra afalafala ewe kapas allim ngeni aramas mi sókkópat ar lamalam me nónnómun manawer. (Kol. 1:23) Inaamwo ika pwóróusen ewe Mwúún Kot chék ra afalafal usun, nge ra eáni sókkópaten napanapen afalafal pwe epwe weneiti ekkewe chón aúseling. Áwewe chék, atun a fós ngeni ekkewe Chón Jus mi súféliti ewe Taropwe mi Pin, Petrus a poputá le aloni alon ewe soufós Sowel. (Föför 2:14-17) Iwe nge, nengeni napanapen án Paulus áwewe ngeni ekkewe Chón Krik usun a mak lón Föför 17:22-31. Ikenái, aramas lón ekkóch leenien afalafal ra súféliti ewe Paipel, iwe, ese wor pinepinan ach sipwe néúnéú Paipel atun sia afalafal imw me imw. Iwe nge, neman a lamot sipwe alapa ach mirit lupwen sia fós ngeni ekkewe rese pwáraatá ar aúcheani Paipel are lamalam are iir kewe mi chóni eú lamalam nge rese lúkú Kraist.
2. Ifa usun sia tongeni néúnéú ekkewe puk sipwe anéúnéú, le álisi chókkewe mi aúcheani ewe Paipel me chókkewe rese?
2 Néúnéúfichi ekkewe Puk Sipwe Anéúnéú: Ekkewe puk sipwe anéúnéú lón ei mineféén ierin ach afalafal repwe ekkesiwil iteiten mwirin ruu maram me ekilapei ekkewe puk, tract, me brochure. Ikaamwo lape ngeni aramas lón ach we leenien afalafal rese kon lien pwapwaiti pwóróus usun Paipel, iwe, sipwe chúen tongeni pwóróus ngeniir usun och mettóch mi tipeeú ngeni ar mochen. Eli sise álleani eú wokisin are sise fósun Paipel lón ewe áeúin fansoun sia chuuri ewe chón imw, nge atun a pwáraatá an mochen aúseling, iwe, sipwe liwiniti pwe sipwe álisi le ámááraatá an lúkú ewe Chón Fératá me an we Kapas mi fel. Nge ika sia afalafal ikewe ie aramas ra aúcheani Paipel, sia tongeni néúnéú ekkewe puk me eáni eú napanapen afalafal mi weneiti ekkewe puk. Ren enletin, sia tongeni anéúnéú ewe puk Paipel A Apasa are ekkewe brochure Akkaüseling ngeni Kot are Akkaüseling ngeni Kot pwe Kopwe Küna Manau Esemuch iteiten maram me lúkún minne sipwe anéúnéú lón ena atun. Nge met mi kon aúchea, ina ach eáni eú napanapen afalafal mi efisi án aramas mochen aúseling.
3. Ifa usun letipen aramas lón ach leenien afalafal a usun pwúl?
3 Ammólnatá ewe Pwúl: Letipen emén a usun pwúl. (Lukas 8:15) A lamot epwe watte angangen ammólnatá ren ekkóch sókkun pwúl me mwen pwikilin enlet seni Paipel epwe pwúk me mááritá. Ekkewe chón afalafal lón fansoun ekkewe aposel ra sópwéch le ffót lón sókkópaten pwúl meinisin, me ei mettóch a atoto menemenéch me pwapwa. (Föför 13:48, 52) Sipwe pwal tongeni kúna ena esin sópwéch ika sipwe féréchú napanapen ach afalafal.