Aúseling me Káé
1. Pwata sipwe fókkun achocho pwe sipwe tongeni aúseling me káé atun ewe mwichelap?
1 Arapakkan chék ewe 2013 mwichelap lón Summer epwele poputá. Chómmóng angangen ammólnatá fán iten eú prokram mi weneiti osupwangen pwiich kewe wóón unusen fénúfan. Ka fen akkóta pwe kopwe fiti unusen ránin ewe mwichelap? Atun mwichelap a kan fis chómmóng minen orukoruk, ina minne a lamot ach sipwe fókkun achocho le nefótófót ngeni ewe prokram. Pokiten epwe ttam ewe prokram lap seni ewe mwich a fis lón ewe mwichefel, a lamot ach sipwe mosonottam le aúseling. Pwal och, ach sái me pwal metakkan eli epwe amélúlúkich. Ina popun met epwe álisikich le nefótófót pwe sipwe tongeni aúseling me káé?—Tut. 31:12.
2. Ifa usun sipwe ammólnatá letipach fán iten ewe prokram lón ewe mwichelap?
2 Mwen Poputáán ewe Mwichelap: A wor prokramin ach we mwichelap lón ach we Web site, www.pr418.com, a nóm lón ewe prokram itelapen ekkewe afalafal me a pwal nóm eú are ruu wokisin fán iten eú me eú ekkena afalafal. Ika kich mi tongeni tétá wóón Internet, ach akkomw ppii pwóróusan epwe álisikich le ammólnatá letipach ngeni met epwe katowu lón ewe mwichelap. (Esr. 7:10) Atun ámi Famili Fel ámi mi tongeni awora fansoun le ámááraatá ámi mwétéresiti ewe prokram epwe fis?
3. Met epwe álisikich pwe sipwe fókkun aúselingéch?
3 Atun ewe Prokram: Ika mi tufich, áeá ewe imwen ngaseló me mwen poputáán ewe prokram. Offei noum we cell phone pwe kosap túmúnúngaw ren kékké are text are mochen text ngeni ekkewe ekkóch atun ewe prokram. Nge ika a lamot epwe on, féri pwe esap aosukosuka ekkewe ekkóch atun emén epwe kékké. Ika ka néúnéú och sókkun minen kampiuter atun ewe prokram, kopwe néúnéú nge lón eú napanap esap aosukosuka ekkewe ekkóch. Túmúnú pwe kosap mwéngé me ún atun ewe prokram. (SalAf. 3:1) Afóta mesom wóón ewe chón afalafal. Atun epwe álleani eú wokisin, fiti álleaan seni lón noum we Paipel. Makkeei pwóróus nge epwe chék mwochomwoch.
4. Ifa usun ekkewe sam me in ra tongeni álisi néúr kewe semirit pwe repwe aúseling me káé?
4 Sia pwal mochen pwe néúch kewe repwe aúseling me káé. Än Salomon Fos 29:15 a apasa: “Eman semirit, esap wor eman a apwüngü, epwe atoto säw won inan.” Ina minne a éch ekkewe famili repwe mómmótfengen pwe ekkewe sam me in ra tongeni túmúnúfichi pwe néúr kewe repwe aúselingéch ngeni ewe prokram nge resap fós, text are fetálpaat. Ikaamwo ra kon kúkkún le weweiti meinisin ekkewe pwóróus lón mwichelap, nge semirit ra tongeni silei ar resap annut me repwe mosonoson le mómmót.
5. Pwata a álilliséch ach enniwili ewe prokram, me ikkefa ekkóch alen ach sipwe féri ei mettóch?
5 Sárin Eú me Eú Ránin ewe Prokram: Sisap annutommang. Nge sipwe annutokkái pwe epwe naféch ach asésé. Ach enniwili met sia rong epwe álisikich ach sisap ménúki. Iwe nge, epwe álilliséch ngeni ach famili ika epwe pwóróus usun ewe prokram ren fitu minich iteiten lekuniol. Ika ka fiti chienom kewe le ló lón kafie, pwata kese uwei noum note pwe kopwe apwóróusa eú ika ruu pwóróus ka kon pwapwaiti? Lupwen ka liwiniti imwom mwirin ewe mwichelap, eli kopwe áeá och fansoun atun ámi Famili Fel le pwóróus ika ifa usun oua tongeni apwénúetá ekkena mettóch lón ámi famili. Kopwe pwal akkóta och fansoun iteiten wiik le enniwili eú kinikinin ewe mettóch mi kerán katowu lón ewe mwichelap.
6. Sipwe menemen le chék nóm lón fansoun ewe mwichelap? Áweweei mwo.
6 Ese wor lamoten ewe kametip ika sise áni ewe mwéngé me ese kata me lón ewe luuk. Sipwe tongeni erá pwe pwal ina chék usun ren ewe kametip lón pekin lúkú epwe fis lón ewe mwichelap lón ei Summer. Amwo sipwe angei feiéchún ren ach sipwe nónnóm lón unusen ewe prokramen ewe mwichelap, ren ach fókkun aúselingéch me ach apwénúetá minne sia káé.