Ié Epwe Sani Ei Pwóróus?
1. Met sipwe ekieki atun sia álleani néúch kapiin Ewe Leenien Mas are Awake! me pwata?
1 Ewe Leenien Mas me Awake! ra ffér fán iten aramas meinisin. Ina popun ekkewe pwóróus lón ra apwóróusa chómmóng sókkópaten lesen. Atun sia álleani eú me eú ekkewe pwóróus lón néúch we kapi, mi lamot ach sipwe ekieki met sókkun aramas repwe pwapwaiti ena pwóróus, iwe mwirin áiti ngeni eménnewe ewe lesen.
2. Met sókkun pwóróus lón néúch kewe puk neman ekkóch repwe sani?
2 Ewe mineféén Leenien Mas a áweweei eú pwóróus seni Paipel oua fen pin fós usun me chienom we chón angang? A wor pwóróus lón usun famili mi tongeni álisi emén aramasom? A wor emén chienom mi ekiekin sái ngeni eú fénú nge ewe Awake! a fen fós usun ena fénú? A wor eú me lein ekkewe puk ekkewe business are ofesin mwú repwe sani? Áwewe chék, lón ekkóch leeni mi wor chón túmún chinnap ie, repwe sani eú puk mi menlapei usun ekkewe osukosuk ekkewe chinnap ra kúkkúna. Neman ekkewe polis station me imwen kapwúng repwe sani eú puk mi fós usun atai allúk.
3. Apwóróusa eú pwóróus mi menlapei aúchean ach sipwe áiti ngeni chókkewe sia ekieki pwe repwe sani masouen eú pwóróus mi tichik lón ekkewe puk.
3 Mwirilóón: Mwirin án eú pean pwúpwúlú lón South Africa angei ewe Awake! minen October 2011, itelapan “How to Raise Responsible Children” (Usun Káitin Semirit Ar Repwe Alúkúlúk), ra kéri 25 sukul lón án ar we mwichefel leenien afalafal. Rúwe me ruu me leir ra etiwa ena Awake! me anéúnéú ngeni néúr kewe chón sukul. Pwal eú pean pwúpwúlú lón pwal ena fénú ra anéúnéú ena Awake! lón ar we leenien afalafal. Ekkewe sense lón eú me lein ekkena sukul ra filatá ar repwe néúnéú ena Awake! iteiten wiik le asukul. Ena pean pwúpwúlú a apwóróusa ngeni emén mwán mi ásimaw mi wisen sáifetál met a fis, iwe mwirin ena mwán mi ásimaw a pesei ekkewe mwichefel a chuuriir ar repwe pwal ló afalafal lón ekkewe sukul lón leenier kewe. Mwirilóón, chómmóng ra tingorei ewe keangen ofesilap ar repwe pwal angei ekkóch kapiin ena Awake! ina popun a peressefál!
4. Pwata sia mochen anéúnéú ngeni chómmóng aramas ekkewe Awake! me Ewe Leenien Mas?
4 Ewe Leenien Mas me Awake! ra áweweei met popun a fiffis ekkewe mettóch wóón fénúfan me met sia tongeni káé seniir. Ra pwal áiti ngeni aramas usun Mwúún Kot me met ewe Paipel a apasa. Ewe Leenien Mas me Awake! ikkena chék ekkewe magazine wóón fénúfan ra ‘asilefeil pwe aramas ra tongeni küna manau.’ (Ais. 52:7) Ina popun sia mochen anéúnéú ngeni chómmóng aramas ren úkúkún ach tufich. Sipwe tongeni féri ena ika sipwe ekieki, ‘Ié Epwe Sani Ei Pwóróus?’