Án Kot Kapas A Aúchea Fán Iten Afalafal
1. Ifa itelapen ewe ruu ránin mwichelap lón 2014 service ier, me ifa ewe kapas eis epwe pélú lón ena prokram?
1 Jiowa, ach “Soukait” mi Lapalap, i ewe sense ese wor táppin wóón unuselapen láng me fénúfan. (Ais. 30:20, 21) Nge, ifa usun Jiowa a asukulakich? A awora an we Kapas mi pin, ewe Paipel, ina eú puk mi kon múrinné lap seni meinisin. Ifa usun ewe asukul me ren Kot a tongeni efeiéchúkich lón pekin aion, ekiek, memmeef me lón ach riri ngeni Kot? Atun epwe fis ach ruu ránin mwichelap fán iten 2014 service ier epwe pélú ena kapas eis. Itelapen ewe prokram, “Án Kot Kapas A Aúchea Fán Iten Afalafal,” mi lóngólóng wóón 2 Timoty 3:16.
2. Ikkefa ekkewe kapas eis repwe pélú pwe epwe menlapei ekkewe pwóróus mi lamot?
2 Ppii Ekkeei Pwóróus mi Lamot: Pélúwen ekkeei kapas eis fan, epwe menlapei ekkewe pwóróus mi lamot lón ei prokram:
• Ifa usun ewe asukul me ren Kot epwe amúrinnéló manawach? (Ais. 48:17, 18)
• Met mwirilóón ach achocho le siwili nónnómun manawach pwe sipwe angang ngeni Jiowa full-time? (Mal. 3:10)
• Met a lamot ach sipwe féri ngeni ekkewe “afalafal mi mwäl”? (Ipru 13:9)
• Ifa usun sipwe tongeni áppirú napanapen án Jesus afalafal? (Mat. 7:28, 29)
• Pwata ekkewe chón afalafal lón ewe mwichefel repwe pwisin afalafaler? (Rom 2:21)
• Án Kot we Kapas a aúchea fán iten met? (2 Tim. 3:16)
• Met a fis ngeni aramas ren ewe angangen amwékútúkútú ekkewe mwúún fénúfan? (Ak. 2:6, 7)
• Met Jiowa a núkúnúkú rech? (Ef. 5:1)
• Pwata a lamot ach sipwe fókkun achocho pwe sipwe amwéchú án Jiowa afalafal? (Luk. 13:24)
3. Pwata a lamot sipwe fiti me aúselingéch ngeni ewe prokram mi fichiiti ach ei fansoun?
3 Me mwen án Paulus makkeei ewe wokisin itelapen ei prokram a lóngólóng wóón, a áweweei lepoputáán 2 Timoty sópwun 3 usun weiresin ewe ránin lesópwólóón. A erá: “Nge ekewe aramasangau me soulängatuputup repwe chök fokun ngauala, ra atupu aramas o püsin küna atuputup.” (2 Tim. 3:13) Ren ach sisap tupuló, a ifa me lamoten ach sipwe aúseling ngeni me apwénúetá ewe asukul me ren Kot! Ina popun, amwo itá sipwe tipeppós le fiti me aúselingéch ngeni ei prokram mi fichiiti ach ei fansoun.