Eú Mettóch mi Álilliséch fán Iten Ach Angangen Afalafal
1. Ikkefa ekkewe ruu popun a kawor ewe napanapen afalafal itelapan: “Eú Napanapen Afalafal Ngeni Chón Imw”?
1 Lón ekkan rán, epwele wor ei itelap lón Ewe Leenien Mas: “Eú Napanapen Afalafal Ngeni Chón Imw.” A wor ruu popun a kawor ena napanapen afalafal. Áeúin, pwe epwe pwári ekkewe káit seni Paipel lón eú napanap mi ámmeseik, oruuan pwe epwe áitingenikich ifa usun sipwe pélúweni án aramas kapas eis fán fáiro. (1 Pet. 3:15) Ifa usun sipwe tongeni alamota ekkena lesen?
2. Ifa usun sipwe tongeni néúnéú ewe sókkun napanapen afalafal lón ach angangen afalafal?
2 Néúnéú lón ewe Angangen Afalafal: Eli ka mochen isoni ekkóch kapiin Ewe Leenien Mas mi wor ena sókkun napanapen afalafal lón. Atun emén chón imw are emén mi pwapwaiti le aúseling ika emén chón káé a kapas eis wóón ekkena esin kapas eis mi fen mak lon ena lesen, iwe kopwe ngeni eché kapiin ena lesen me ereni pwe oua tongeni fósfengen wóón. Ika ese wor noum kapiin ena lesen, iwe eli ka tongeni kapiinawu me wóón internet seni jw.org.
3. Ifa usun sipwe tongeni néúnéú ngeni emén chón imw eú me lein ekkewe napanapen afalafal?
3 Ifa usun ka tongeni áeá ekkena afalafal ngeni emén? Ekkóch ra mut ngeni ewe chón imw an epwe leúwommóng le álleani alon ewe chón imw kewe, nge ewe chón afalafal epwe pwal pwisin álleani an kewe. Ekkewe chón afalafal ra kúna pwe ei esin napanapen pwóróus ngeni chón imw a múrinné pokiten ekkewe chón imw ra tongeni etittina ach kewe lúkú lón eú napanap epwe kinamwe ren.—Tut. 32:2.
4. Ifa usun sipwe néúnéú ewe napanapen afalafal le pwisin áitikich?
4 Pwisin Angangéchúló me pwal Áiti Ekkewe Ekkóch: Atun ka álleani ekkena napanapen afalafal, kopwe ppiiéchú ekkewe wokisin, kapas áwewe me napanapen áwewe. Nengeni napanapen unusen ewe afalafal. Mwirin sótun eáni lón óm angangen afalafal. (SalF. 1:5; 9:9) Iei alon emén fefin Chón Kraist: “Ai álleani ekkena napanapen afalafal, usun itá nge ua káé seni emén pioneer mi ‘fókkun lipwákéch’ mi kan silei met a fich an epwe apasa!”
5. Ifa usun sipwe tongeni álisi néúch kewe chón káé le mmólnetá fán iten ewe angangen afalafal?
5 Ka tongeni néúnéú ei taropwe pwe epwe álisi noum we chón káé an epwe mmólnetá fán iten ewe angangen afalafal. Oupwe álleanifengeni ewe afalafal me mut ngeni ewe chón káé an epwe wisen álleani ekkewe kinikin fán iten ewe chón afalafal. Ren ena, ekkewe chón káé repwe tongeni praktis le pwáraatá ar lúkú fán ewe súfél. (Kol. 4:6) Mi pwúng, ena napanapen afalafal ina eú me lein ekkewe chómmóng mettóch Jiowa a álisikich ren pwe sipwe “unusen apwönüetä” ach we angangen afalafal.—2 Tim. 4:5.