A Álilliséch Ach Akkanéúnéú Mineféén Magazine Ngeni Emén
1. Pwata seni lóóm án Jiowa we mwicheich a pesei ekkewe chón afalafal ar repwe kan akkanéúnéú mineféén magazine ngeni emén?
1 Chómmóng aramas rese mochen káé Paipel rech nge ra pwapwaiti le álleani néúch kewe magazine. Ina minne seni lóóm, án Jiowa we mwicheich a fen pesei ngeni ekkewe chón afalafal an epwe wor ar magazine route, weween pwe repwe anéúnéú ekkewe mineféén magazine iteitan ngeni emén. Atun ekkewe aramas ra álleani néúch kewe magazine iteitan, fán chómmóng a efisi ar mochen káé án Kot Kapas. (1 Pet. 2:2) Ló, ló, ló, ra pwapwaiti minne ra álleani, iwe a efisi ar repwe etiwa eú kókkótun káéén Paipel.
2. Ifa usun sipwe tongeni alapaaló pwapwaan chókkewe sia kan anéúnéú ngeniir ekkewe magazine?
2 Étútúi Pwikilin ewe Enlet: Lap seni óm kopwe chék ngeni ewe chón imw ekkewe magazine me mwittir ló seni, kopwe poputááni ámi pwóppwóróusfengen me sótun ámááraatá ámi sissilefengenikemi. Ina met epwe álisuk le silei nónnómun, met a pwapwaiti me met a lúkú, iwe epwe álisuk le fós ngeni fán mirit. (SalF. 16:23) Mmólnetá iteiten kopwe chuuri. Ika mi tufich, ekis menlapei eú pwóróus seni ekkewe magazine me ekkewe wokisin mi weneiti me étútúi pwikilin ewe enlet lón letipan. (1 Kor. 3:6) Makkeetiw iteiten ránin óm chuuri, ekkewe puk ka anéúnéú ngeni me ekkewe pwóróus me wokisin oua pwóróus wóór.
3. Fán fite kopwe kan liwiniti chókkewe ka kan akkánéúnéú ngeniir magazine?
3 Fán Fite Kopwe kan Liwin? Kopwe kan liwin fán eú lón eú maram ren óm kopwe uwouto néún emén ekkewe mineféén magazine. Iwe nge, neman kopwe chuuri lap seni fán eú lón eú maram, alóngólóng wóón nónnómun me ika a sani. Áwewe chék, eú are ruu wiik mwirin óm anéúnéú ngeni ekkewe magazine, kopwe tongeni chuursefáli me apasa: “Ua ekis chuuruk pún ua mochen áiti ngonuk och mettóch seni ekkewe magazine ua likiti ngonuk.” Ena mettóch epwe efisi an epwe álleani ewe pwóróus. Ika a fen álleani, iwe kopwe tongeni eisini met a ekieki usun ewe pwóróus me ekis pwóróusfengen wóón. Are ika eménnewe a pwapwaiti le álleani ekkewe magazine, iwe atun ka liwiniti kopwe áiti ngeni ewe tract, brochure are puk sia anéúnéú fán ena maram.
4. Fán ekkóch met kopwe tongeni féri ren óm kopwe silei ika chókkewe ka kan akkánéúnéú ngeniir ekkewe magazine ra mochen káé Paipel?
4 Kosap witiwiti án ewe chón imw epwe akkomw tingoreok fán iten eú kókkótun káéén Paipel. Kopwe fen akkomw fós ngeni usun. Ikaamwo a fen apasa me lóóm pwe ese mochen káé Paipel, nge fán ekkóch kopwe menlapei ewe itelap lón ewe Leenien Mas “Án Paipel Kewe Kapas Eis Ra Pélú” me ppii ika a mochen pwóróus wóón. Neman kopwe tongeni poputááni eú káé ppen asamen imwan. Iwe nge, ika kese tongeni poputááni eú káéén Paipel, kopwe tongeni sópweló le akkánéúnéú ngeni ekkewe magazine pwe epwe mááritá an mochen.