Ámúrinnééló Tufichich lón ewe Angangen Afalafal ren Ach Áiti Néúch Kewe Chón Káé ewe Napanapen Káé mi Múrinné

Pwata A Lamot: Ren án ekkewe chón káé repwe feffeitá ngeni ásimaw lón pekin lúkú, a lamot resap chék amasoua ekiekiir me letiper ren ekkewe káéén lepopun lón Kapasen Kot. (Ipru 5:12–6:1) Káé a wewe ngeni angang weires. Kapachelong lón ena, ina ach sipwe ekieki ririin ewe mineféén pwóróus ngeni minne sia fen silei me mirititi álilliséchún. (SalF. 2:1-6) Lupwen ekkewe chón káé ra eéreni ar repwe pwisin kútta pwóróus, ra tongeni kúna pélúwen kapas eis usun ewe Paipel ren ar néúnéú néúch kewe puk. Ar tinikken le apwénúetá minne ra káé epwe atufichiir le likiitú fán ekkewe sóssót repwe kúna lón manawer, manawen Chón Kraist.—Luk. 6:47, 48.

Usun Ach Féri:

Menlapei lamoten ach sipwe kútta án Jiowa álillis lón iótek me mwen eú me eú káé.—Joh. 14:26; 1 Kor. 2:10.
Seni chék lepoputáán, apéchékkúla ngeni noum we chón káé an epwe ammólnatá lesenin an káéén Paipel. Áiti ngeni noum we puk ka kan néúnéú le káé, me asukula an epwe erii are esissilla ekkewe chék kapas mi lamot.
Emmweni noum we chón káé an epwe pélúweni ekkewe kapas eis lón pwisin an fós. Túmúnú pwe ewe káé esap wiliti eú kókkótun eáni kapas eis me pélúwan ese wor apwapwaan pún a chék álleani pélúwen ekkewe kapas eis seni ewe puk.
Pesei noum we chón káé an epwe álleani Kapasen Kot iteiten rán. Eú minen álillis ren an epwe féri ena, áiti ngeni ewe kókkótun álleaan Paipel wóón jw.org (a kawor lón fósun Merika). Ese mecheres an epwe féri pwe an álleani Paipel iteiten rán epwe eú eéreni lón manawan, nge an achocho esap fókkun lusmwáál.—Kölf. 1:2, 3.
Áiti ngeni noum we chón káé ifa usun epwe kúna pélúwen kapas eis usun ewe Paipel ren an néúnéú ewe Watchtower Library are ewe Watchtower ONLINE LIBRARY. Álisi an epwe esilla ekkewe mesen mak fén iten ekkewe puk sia kan néúnéú atun ach kewe mwich. Áwewe chék, fg a wewe ngeni ewe puk Pwóróus Allim seni Kot!

Sótuni fán Ei Maram:

Lesópwólóón eú itelap kisikis are sópwun, eisini noum chón káé epwe apasa lón fitu chék sentence menlapen met a kerán káé. Nge ika ese wor noum chón káé, asóssót le apasa lón fitu chék sentence menlapen eú pwóróus seni ewe Paipel are eú parakraf seni Ewe Leenien Mas pwe epwe álisuk le ámúrinnééló óm tufichin wewefichiti minne ka álleani.