Alamotaéchú Ekkewe Kinikin lón ewe Puk Paipel A Apasa

Lupwen emén chón káé Paipel a weweiti minne ewe Paipel a wesewesen apasa me apwénúetá minne a káé, epwe mááritá me uwaéch lón an lúkú. (Kölf. 1:1-3) Sia tongeni álisi néúch we chón káé le feffeitá ren ach alamota ekkewe pwal ekkóch kinikin lón ewe puk Paipel A Apasa.

Kapas Eis Lepoputáán: Lepoputáán eú me eú sópwun a wor ekkewe kapas eis nge pélúwer a nóm lón ena sópwun. Ka tongeni eáni ekkena kapas eis pwe epwe efisi án ewe chón káé mochen káé ena pwóróus. Are kopwe pesei le ekis uwawu meefian usun eú me eú ekkewe kapas eis. Ika a mwáál an pélúweni, ese lamot kopwe áwena lón ena atun. Minne a apasa a tongeni álisuk le silei tefen ewe pwóróus a lamot kopwe menlapei me awora fansoun le asukula.​—SalF. 16:23; 18:13.

Pwal Ekkóch Áwewe: Ika ewe chón káé a weweiti me tipeeú ngeni ekkewe pwóróus lón ewe sópwun oua káé, ka tongeni chék pesei an epwe pwisin káé ewe kinikin Pwal Ekkóch Áwewe mi weneiti ena pwóróus. Iwe lón ewe fansoun oupwe káésefál, neman kopwe awora fitu minich pwe kopwe ppii ika a weweiti ewe pwóróus. Iwe nge, ren an epwe álilliséch ngeni, awora fansoun atun ámi káé le pwóróus usun ewe kinikin Pwal Ekkóch Áwewe are álleani fitu chék parakraf lón me eáni ekkewe kapas eis ka ammólnatá me mwan.

Pwórun Enniwili: Ewe pwórun enniwili mi nóm lesópwólóón eú me eú sópwun, ikkena pélúwen ekkewe kapas eis lepoputáán ena sópwun. Ka tongeni alamota ei kinikin pwe kopwe silei ika noum we chón káé a weweiti ekkewe pwóróus mi lamot me a tongeni pwisin áweweei. Ámi me rúúemén oupwe léúwommóng le álleani eú me eú ekkena pwóróus me pwal ekkewe wokisin. Mwirin pesei noum we chón káé le néúnéú ewe are ekkewe wokisin le áweweei ika pwata a pwúng ena pwóróus.​—Föf. 17:2, 3.