Ammolnatäöchü fän iten ewe Angangen Asukul
1. Pwata sipwe ekieki ach sipwe älisatä än ewe chon käeö aücheani met a käeö seni Paipel?
1 Lupwen sia käeö ngeni emön ewe Paipel, mi lamot sipwe ammolnatäöchü ika sia mochen amwökütü ewe chon käeö le angang ngeni Jiowa. Epwe uwaaöch ach angang ika sia älisi i le alapalo an aücheani minne a käeö seni Paipel pun ina met epwe wesewesen achüngü letipan. (Tut. 6:5; SalF. 4:23; 1 Kor. 9:26) Nge ifa ussun sipwe föri ei?
2. Ifa ussun iotek a tongeni älisikich le ammolnatä fän iten eü käeö?
2 Iotek Atun om Ammolnatä: Pokiten Jiowa a wisen ämääraatä ewe pwikilin enlet lon letipen ewe chon käeö, mi lamot sipwe eäni eü iotek mi titchik lupwen sia ammolnatä ewe lesen fän iten ewe chon käeö me ekieki met mi wesewesen lamot ngeni. (1 Kor. 3:6; Jem. 1:5) Ena sokkun iotek epwe älisikich le silei met sipwe pwal tongeni föri le älisi ewe chon käeö le aüralo letipan ren ewe “tufichin silei” ussun letipen Jiowa.—Kol. 1:9, 10.
3. Ifa ussun sipwe ekieki ewe chon käeö lupwen sia ammolnatä?
3 Ekieki ewe Chon Käeö: Jises a silei pwe lipwäköchün emön lon ewe angangen asukula aramas a kapachelong an epwe ekieki ekkewe chon aüseling. Chommong aramas ra eäni ei sokkun kapas eis ngeni Jises nge esap lon eü chök fansoun: “Met ngang üpwe föri pwe üpwe manaueni manau esemuch?” Iteiten a pölüweni ei kapas eis a sokkofesen napanapan an pölüweni, pun a pwäratä pwe a ekieki nonnomun emön me emön leir. (Luk 10:25-28; 18:18-20) Atun sipwe ammolnatä eü lesen fän iten emön chon käeö mi lamot sipwe ekieki met epwe wesewesen lamot ngeni. Menni lein ekkewe wokisin upwe älleani ngeni? Ifa ükükün ewe lesen upwe käeö ngeni? Menni pworaus lon ewe lesen epwe weires le weweiti are etiwa? Ika sia ekieki ekkoch kapas eis ewe chon käeö epwe eis, ach ammolnatä epwe älisikich le pölüwenöchü.
4. Met sipwe föri lon ach ammolnatäöchü ewe lesen?
4 Enniwili ewe Pworaus: Ikaamwo sia fen käeö ewe puk fän fite, nge iei chök ewe äkkäeüin fansoun sipwe käeö ei lesen ngeni ewe chon käeö. Ika sia mochen achüngü ewe letip a mmen lamot ach sipwe ammolnatäöchü fän iten eü me eü käeö. Ammolnata ewe lesen pwe ewe chon käeö epwe pwal äppirük. Ekieki ewe chon käeö lupwen sia enniwili ewe pworaus kapachelong ekkewe wokisin mi mak me esissilla ekkewe menlapen pworaus.—Rom 2:21, 22.
5. Ifa ussun sipwe äppirü Jiowa?
5 Jiowa a fokkun ekieki feffeitään emön me emön chon käeö. (2 Pit. 3:9) Sia äppirü än Jiowa tong ika sia pwal awora fansoun le ammolnatä lon eü me eü käeö.